Pages

31 December 2007

لسة بلف





بلف فى دايرة
بمركز
ومحور
وزاوية انحناء
بلف فى سما بطول وعرض
ومحيط واســــــــــــــــع بغباء
جربت اقسم سرعة الالتفاف
على مقدار الغباء فى اللفة
لاقيتنى راح الف الى ما لا انتهاء

20 December 2007

مش لاقى العيد

بعد بحث شامل
وتفتيش ونكش فى الدماغ عن العيد
فى كلمات

ملقيتش غير
العيد دة

انا والخروف

14 December 2007

قبل الفراق


لو يوم هاترسم الطريق
ابقى افتكر
لحظة فراق
بتبكى فيها وبغباء
بتربى احساس اشتياق
برغم حقيقة الرحيل
وقع الجدار من بيت كبير
بيتبنى
كان حلمة يوصل للسما
ويقولها
انة هنا
لكنة وفى لحظة انهيار
افتكر
ان جدار من بين خمسين جدار
ممكن يقع

فعلا وقع
والحلم يدخل لحظات انهيار
راجع حطانك كلها
شوف عزمها
بين كل طوبة
شوف الفروق
وسدهـــــــــــا
ولو حجر حسة ضعيف
بدلة
قدرة كدة
عمرة انتهى
هزات كتير هاتعيشها وانت فى الطريق
يا هاتقلبك
يا هاتعدلك

الحلم نقش بنرسمة
فى لوحة الفخر الكبيرة
اكتب حروف اسمك وبعزيمة
ولو حرف ممكن يميل
هايميل الاسم كلة
ومش راح ينقرى

راجع حطانك كلها
راجع حروفك كلها
وابنى حلمك
وصلة
للسما
يقولها
انة هنا



الانسان عشان يحقق حلمة ويوصل بية للغاية اللى كانت فى خيالة لازملة منظومة كاملة من العوامل اللى مينفعش يكون اى عامل منها مش سليم ولازم يبقى عندة بدائل للعوامل دى كلها عشان ممكن عامل من العوامل دى يبوظ فى الطريق ولو عامل بايظ يبقى من الطبيعى ان الحلم كلة هايبوظ زى مثلا لو حلمى كلة مبنى على كون بابا راجل واصل وبعدين مش بابا دة ممكن يموت هاوصل انا بقى ازاى لو الحلم دة كان بيساعدنى فية صديق والصديق دة غدر بيا تفتكر هاقدر اكمل لو معنديش بديل لازم نعمل حساب الصعب عشان نهتقدر نتعامل مع الصعب والسهل

انا عارف ان الاسلوب بتاع كلماتى
الاوزان فية مش مظبوطة
والمعانى فية مش واضحة
بس انا كنت قاصد اعبر عن الفكرة
من غير ماهتم بالاوزان

08 December 2007

طاااااااااااااخ

فيها اية
.
.
.

مفيهاش حاجة


فيها ايه لو

.
.
.
برضوا مفيهاش حاجة


طيب فيها اية لو

طلعت انا مش انا

وطلع هما ناس تانين
غير اللى يعرفهم انا

ويطلع وشى مش وشى
وجسمى مش جسمى

حتى الاحساس اللى بحسة معاهم
مكنش معمول علشانى

برضوا مفيهاش حاجة

صدقنى مفيهاش حاجة

مش راح تفرق كتير




02 December 2007

صورة وكلمة وكام ذكرى

عشرين غريبة
غربة وغرابة
عشرين كئيبة
وفيها طيابة


عشرين تفرح

عشرين تبكى

عشرين بتحلم
ومالحلم تشكى

عشرين يا عاشق

والقلب واقف
مفيهش نبضة
بتقول يا حب
والبنت نايمة

لسة فى خيالى

مستنى يجمع مابينا سهم

عشرين مسامح
عشرين بغنى
عشرين وبظلم
والظلم خانى
المعنى عندى
حسة فى ملامحى
بيبان فى خوفى
مسموع فى صمتى

بيبان فى حلم
ساكن جوارحى

عشرين دى نسمة
عدت عليا

قالت لى
اصرخ


صرخة قوية





سنة اولى تدوين



19






السنة العشرين




29 November 2007

من زمان


سالتنى عمرك كام سنة


لاقتنى عايش

من زمان

سالتنى تانى مين انا

قولتلها طفل

بيتعلم لسة
الكلام

21 November 2007

ترقص ارقص غصب عنى ارقص






رعشة

فى ايديا
بتهزنى
وشى
جوايا
بيشدنى
بيقولى
اكتب
عنها
عن بنت
بكر
وفضها
شوية ديابة
ميعرفوش
ايه
هو
معنى اسمها

قومى
ارقصى
معايا رقصة
بطول الطريق
هانحكى قصة
عارفها التاريخ

اصل
الشرف
مش بس مكتوب عالبكارة
ولا
دايب
دوب
فى
دم العذارى

لا يا حبيبتى
معنى الشرف
فيكى حقيقة
وفيهم
استعارة





كنت عاوز من زمان اجرب الكتابة مباشرة من الكيبورد
للبلوج

ملحوظة


هو تكرار كل نرقص
فى كلماتى اللى بكتبها
دى حالة عادية ؟


مجرد سوال





12 November 2007

حبة امل

1544364348_bb33673a7c_o



المية راجعة للشقوق

والطير ياعينى

بيتعايق

بالشروق

والحلم جاى

بيقولى اصحى

اصحى وفوق

شق الطريق جوة السعادة

وارقص لها رقصة تمنى

على لحن من عزف الامل

تحت الشروق

واشطب فروق

شدة الدموع

من العيون

وبتروى بيها

شجر الخضوع

شباك فتحتة

لية تقفلة

وتبدلة

بحزن ساكن فى الضلوع

اما عبيط

اللى يصدق

كلمة قالها

واحد تانى عبيط

فى لحظة شاردة من العباطة

والهبل

ان الامل

مش من هنا

ولا يقدر يعيش على جونا

ولا عمرة خطى فى ارضنا

خطوة واحدة

للسعادة

مش هى دى برضوا العباطة

والهبل

فيين الامل

الامل

ا

م

ل

الامل فى عيون

عبد تايب

الامل

فى طريق ابن

سايب

ام بتدارى العيون

لاجل الامل

برجوع الحبايب

الامل

عكس الشجن

الامل

زى الطيور

بيعدى سور

من بعد سور

وصعب جدا يتسجن





bogey






وادعا يا من اضحكنى

ضحكة بريئة

10 November 2007

كلمتين وبس

بصى يا مدونتى يا حلوة يا سمرة

الحكاية يا قمر مش حكاية ماتش

ولا حكاية حكم ظلم الاهلى فى ضربتين جزاء

ولا حكاية بركات اتظلم

ولا حكاية ان اللعيبة بتاعنا بيستهبلوا
ولا حتى حكاية ان جوزية هبل فى الخطة

تحبى تسمعى منى الحكاية


بس وحياة ابوك قولها مالبداية


هيا حكاية شعب

بحالة نفسة يفرفش نفسة يعلى
يبقى الاول
لان الشعب دة جواة جينات عاوزاة يبقى الاول
يا حلوة الحكاية
حكاية شعب كان الاول
فى التعليم
دلوقتى مفيش تعليم
حكاية شعب كان الاول
فى الطب
سلميلى يا خالتى عالطب
حكاية شعب كان الاول فى الفن
وسينما وحتى فى الذوق
وعالم الابداع بيطلع منها بروقان
واحلى من الشرف مفيش

حكاية ادباء وفنانين وعلماء وناس غلابة وفلاحين
كانوا الاول

واللى يعرف الاول

يبقى عاوز يموت لما يكتشف انة بقى الاخير

الشعب يا حلوة ياسمرة صحى

لاقى نفسة الاخير
الاخير خالص

وكل اللى يسبقة
يعدى علية ويتف
ويطلعلة لسانة

عرفتى يا هبلة
قصدى يا سمرة
حكاية الشعب





مش كدة ولا اية

الله يرحمك يا فؤاد يا مهندس

كنت راجل رايق
زيك زى الشعب



08 November 2007

اخبطى دماغك فى الحيطة

لما الشتاء يدق البيبان
لما تنادينى الذكريات
لما المطر يغسل شوارعنا
والحارات

الاقانى جايلك فوق شفايفى
بسمتين


بس دة بيقول لما

واديكى شايفة يا حبيبتى

بقينا فى شهر نوفمبر
ومفيش شتا

واحتياجى ليكى
مع برد الشتا
لسة مجاش برضوا

ومع احلامى التانية

ناسى كل الذكريات

ونصحية منى
لدموعك اللى على عيونك

متستنيش المطر

عشان تغسليها

بطلى بخل وانزلى اشترى علبة مناديل

ولا اقولك
بلاش تنزلى
الشارع مليان وشوش
شكلها يبكى اكتر
اقولك
امسحى دموعك
فى مخدتك
عشان تبقى اشارة ليكى
مع كل قصة حب جديدة
تبقى عارفة انها اخرها دمعتين على نفس المخدة
او على مخدة تانية
مش هاتفرق كتير
هيا هيا الدموع
وهيا هيا النهاية

ولو الدموع خلصت

اخبطى دماغك فى الحيطة


02 November 2007

تفريغ الطاقات السلبية

محتاج افضى كشكولى
من الكلام
اللى كتبتة ومحطيتوش على البلوج
عشان اكتب شى جديد
واعبر عن معانى جديدة
بطريقة جديدة



حالة



شعر هايش كالكنافة
وجسم وكلاة النحافة
ووش مليان بالشقوق
وعيون بتحلم بالشروق

جلجلت شعرى
بلبس شرابى
ريحة العفونة دوختنى
وفيها اية؟
لو البس الجذمة
من غير شراب
زى معنى
حبى للمشى
فى الضباب
شى غريب
عيونى محاوطها السواد
دة حزن ولا
من كتر شوفى للضباب
مش هاتفرق
المهم
الجذمة مليانة تراب
من كتر لفى
فى الشوارع
ببص فى عيون كل البشر
على معنى فضلوا
يقولوا راجع
قالوا هايهدى المواجع
قالوا هايطفى الشجون

ولسة تاية فى الشوارع
ولسة تايه فى العيون

والجذمة تتعفر تراب
والعفونة تلزق فى الشراب
وعيونى محاوطها السواد





بلدنا بتتحرك




واحد قهوة يا جابر
هات الشيشة يا صابر
خلينا نشوف الحاضر
ونمخمخ ويا المستقبل


دة الجبر طريقى وهندستى
والصبر حياتى ومدرستى
والحلم بيندب على حوستى
وانا قاعد فى الليل بستهبل

منقوع فى الكوسة و موكوس
وشعارى منحوس منحوس
احلامى مرمية فى كوز
والكوز بيقولوا مخروم

لو اسال ميين خرم الكوز
يقولولى الريس خرمة
لية تخرم كوزى يا رايس
دة انا ماشى جنب اللحيط
قاعد عالقهوة بشيش
وفكوزى احلامى محيط


من خرم الكوز راح نعبر
كلنا سوا للمستقبل
وبلدنا يعينى بتتحرك
وانا قاعد عالقهوة استهبل






بحلم


بحلم اكمل الغنوة
واطرد حزنى من راسى
وامسح دمعة ورا دمعة
وادفن برد احساسى
واخلع نفسى من يائسى
والبس توبى وانا راضى
واقول الكلمة ترسمنى
شعاع ضى
فى ليل عاتم
لكن برجع اشوف نفسى

اقوم
شاتم
والعن كل ليل عاتم

بيزرع فينا انات
ويزور لينا حكايات
ويزرع شوك فى ايامنا
ويسرق مننا الاوقات

لو اعزف لحنى بسكوتى
بشوف بين النغم الوان
واسمع فيها صوت خوفى
ونشاذ اليائس
بين النغم بيبان

وبحلم اكمل الغنوة
واطرد حزنى من راسى
وامسح دمعة ورا دمعة
وادفى برد احساسى

01 November 2007

حالة سكوت

حالة سكوت

بيهزها

دمع الالوف

بتجرها

كل الظروف

لنار بتحرق

فى اللى غدر


شى بيجمع

كل قلب حس بيها

خاف عليها

عاش بروحة

قصة العجز اللى فيها

احساس

بحلم

عودة انكسر


حالة




هى طلعت من دماغى كدة من غير معرف انا بتكلم عن اية او لية ؟

لكن بعد ما قريتها تانى لاقيتها حالة من حالات كتير

تتفهم بمعانى كتير

حالة عقيمة مفيهاش جديد

وعمالين نصبر نفسنا ونقول اكيد فى نهاية

بس النهاية بتاخر لاننا مش عاوزين نطلع نستقبلها

وكل اللى حواليك يقولك النهاية جاية

ايوة ياعم الامور
النهاية جاية

بس تفتكر على ماتيجى

هانلاقى وقت نبتدى قصة جديدة

نغير فيها كل السلبيات اللى كانت فى القصة القديمة

ولا تتر النهاية هاينزل

بنهاية ماساوية

زى نهايات كتير
انت راضى بالنهاية دة
راضى بكونك زى ناس كتير

انت راضى ؟
راضى
اكيد
يعنى انت راضى
ايوة راضى
بس خلاص ملوش لازمة الكلام

10 October 2007

كتبتها

فراق بفراق

وحنين مشتاق

والقلب يغنى على لحن فراق

وشعور مكبوت

مربوط محطوط في ظلام النفس

بيقول يا فراق

والحب حزين

والناي مكسور

والكلمة وكانت كدبة بتنى قصور

أنا رافض

في السجن دة تانى

أنا رافض أبكى

على قصة قديمة هزت

في كياني


فراق ولد




الاسم : مفارق

العمر : كتير

في الحب قديم

الحالة :حزين

المبدأ : رافض

اسكن في الحب

وكلام العشاق فية أنين

أنا كنت عاشق

كان فيا حيرة

دايما وتساؤل

لو حد عاشق زى عشقي

لو حد حاسس نبض قلبي

طب لية يخبى

مايقول ويحكى

الصورة صافية

واللمسة دافية

إحساسنا طاغية

وقلوبنا خايفة

فراق بنت



نرسمها صورة

نكتبها غنوة

نرسمها بسمة

على بنت حلوة

نزرعها حب

نقتلها قسوة

06 October 2007

سيريالية


هل تبكي

من حُزنٍ فى القلب

أم مِِنْ خيبةِِ آمالِك

أم مِنْ غيبةِ أحبابِك

أم من؟

- أبكي

من ألمٍ فى القوْلونْ

وحموضاتٍ

فى الَمعِدَه

وزيادةِ ضربات القلب

وإلخْ

إلخْ..

- لكنْ..

من أورثك الأمراض جميعا

- أورثني الأمراض:

حزنٌ فى القلب..

وخيبةُ آمالي..

وغيابُ الأحَباب..

وإلَخْ.. إلَخْ

إلَخْ!

03 October 2007

طالب بجامعة المنصورة

فراق بفراق

وحنين مشتاق

والقلب يغنى

على لحن فراق

وشعور مكبوت

مربوط محطوط

فى ظلام النفس

بيقول يا فراق

اليوم أستطيع أن أعلنها بقوة وبقسوة وبفرح وبحزن وبكل الأحاسيس الإنسانية
وادعا جامعة المنوفية بكل جدرانها وشوارعها الغبية
وادعا لكل الوجوة العابسة وادعا لكل شي يقتل العواطف والأحاسيس
ومرحبا بجامعة المنصورة مرحبا بذلك المستقبل المجهول الذي لا اعرف إلى أين ياخذنى
اجبرتنى طقوس الروتين الحكومي بالذهاب اليوم في تلك الرحلة التي كنت أحاول تجنبها
كنت أتجنب النظر لملامح ذلك السائق الذي يذكرني بصديقي أبو الهول
ورئيت بين شفتية التي نادرا ما تتحرك كلمتين ارسلهما لي
أنت أية اللي جابك بس ؟
كنت أحاول أن أتجنب السير في ذلك الشارع الذي يجمع مستشفيات الجامعة على جانبية لكنى سيرت فية ورأيت نفس الوجوة المصرية الريفية
يبحثون عن العلاج المجاني عند ميكانيكية الطب البشرى


كنت اهرب بنفسي واختفى وسط زحام الطلاب على بوابة الدخول
حتى لا يرانى ذلك العسكري الذي استطاع إن يقنعني
ان وجهي ذو ملامح إجرامية مع أنى اراة وجة عادى جدا
ولكنة لمحنى بين الصفوف وطلب رؤية كارنيهى
مع أنى متأكد أنة يحفظ كل محتويات ذلك الكارنية اللعين

كلية الحاسبات جامعة المنوفية


كنت أتجنب النظر إلى مبنى كلية الحاسبات والمعلومات اللعين
الذي يقترب في تصميمة إلى مباني السجون والمعتقلات
لكنى رايتة

وحينها وجدت شيئا بداخلي يخبرني
ان الحياة عبارة عن لحظات فراق مرتبة ترتيب عشوائي
لا يحكمها قانون يعتمد علية الإنسان لمعرفة لحظة الفراق القادمة

علمت ان على بعد كل فترة زمنة ان اراجع ذاكرة تليفوني المحمول
وامسح منها عدة أرقام لأسماء جمعتني بهم لحظة فراق

وعادت عيني من جديد تنظر للمبنى اللعين
كل شي كما هو!!!!!!!!!!
نفس ملامح الطلاب
التي دائما تشعرك أنهم استيقظوا في هذة اللحظة من النوم
بعضهم يلتف حول رقعة الشطرنج
والبعض الأخر يلتف حول طاولة البينج
والبعض يندب حظة لدخولة تلك الكلية
والبعض الأخر يحاول أن يقنع نفسة
أنة في الكلية الأفضل


يعود راسي من جديد
لتقليب الأفكار والوساوس
هل حقا هي الكلية الأفضل
أم أنة أنا الطالب السيئ


يا صقـــــــــــــــر
وابتدت لحظات الفراق
ازيـــــــــــــــــــكم يا جماعة

أخر مرة هاشوفكم

انا بكرهك يا فراق

ياسارق النور مالقمر

انا بكرهك

يا مانع الطير مالسفر

بكرهـــــــــــــــــــك

بكرة دمعك فى العيون

بكرة سوادك فى الطرق

بكرة الاعيب الظنون

بكرة معانى هانفترق

رحلة قديمة بتنتهى

ومعاها رحلة بتبتدى

بينهم علامة مسجلة

لحظة فراق

وانا بتقتل

مع كل احساس

اشتياق

28 September 2007

لحظة حب من بين لحظات ضيق


غيري الصفحة القديمة

وابتدى حكايتك معايا

ارسمي في قلبك مدينة

تحضني

وتحضن هوايا


ورد الفوواصل


واكتبي رسالة غرامك

بخط الحلم الجميل

علمي قلبي بكلامك

يداوى احساسى

العليل

نورى شمعة عيونك

تبقى ضىّ

فــــــــــليل طويل


ورد الفوواصل


بينا نشرق

فوق ضواحي الحب

نمسح

كل دمعة في عيون جريح

نبقى قصة

يتحاكى بيها

العاشقين

وبحوار صريح

نبنى بيتنا

يبقى حصن

فى كل ريح


ورد الفوواصل


أدى قلبي

هاتى قلبك

أدى ايدى هاتى ايدك

نرقص رقصة

رقصة أمل

بين العاشق والمعشوق

ندوب بيها

اى فروق

مانعة عيونا

تحس شروق

كل دة برقصة أمل

جوة المدينة



ورد الفوواصل



انا فى حالة استغراب

ازاى اكتب عن حالة حب

فى وسط حالة غباء سياسى

غبــــــــــــــــــــــــــاء


26 September 2007

الاضراب مستمر رغم الغباء الامنى

استمرار اضراب عمال غزل المحلة لليوم الثالت
دخل العمال يومهم الثالث ولم يتحرك اى مسئول حكومى
والنهاردة تم الافراج عن العمال اللى تم القبض عليهم فى اليوم الاول
واتهمهم الامن بتحريض العمال على الاضراب
ولكن فؤجى العمال المعتصمين
بعد الهتافات اللى استقبلوا بيها زمايلهم
ان القيادات العمالية
اللى تم الافراج عنهم
بيدعوا الى انهاء الاعتصام والاستجابة الى طلبات الامن
كان رد فعل العمال انهم هتفوا ضد زمايلهم
وفى نية اللى اعلان اضراب مفتوح عن الطعام
وارتفعت حدة الهتافات
وارتفع صوت الطبول
وسقط بعد المعتصمات من الاغماء

خيمة





مرافق




عزف





وبدا الامن التواجد بكثرة حول الشركة
واخلاء المنطقة من الباعة الموجودين
استعدادا لاقتحام الشركة
مالاخر تحولت المحلة اللى ثكنة عسكرية



هاقول اية غير غباء سياسي من الحكومة والامن بتاعها

25 September 2007

الاضراب فى المحلة بالغباء اصبح على صفيح ساخن


اللى هايفتح بئة
العمال هاتدقوا


الافراج قبل الانتاج


الحرامى ميين
الجبالى اهو


واحد اتنين
زمايلنا راحوا فيين



Image(098)



افطار






حالة تذمر بيعيشها العمال بعد
القبض على خمسة منها
بتهمة تحريض العمال على الاضراب

هاقول اية
غير ان الامن دة المفروض يتحاكم بتهمة الغباء السياسى
عندى احساس ان النية لدى الحكومة
هو تكبير الدماغ
ولا كانهم سامعين العمال
ولا هايهتموا باى اضراب
بس بكدة يبقى قمة الغباء السياسى
العمال عددهم كبير
فوق العشرين الف عامل معتصمين
وممكن ينضم لهم عدد كبير من اهالى مدينة المحلة
العمال عندهم تصميم كبير على مطالبهم
واصبح اول مطلب لهم
الافراج عن زمايلهم اللى تم القبض عليهم النهاردة




24 September 2007

عمال المحلة قالوا كلمتهم فين باقى المصريين





اعتصام جديد يدخلة عمال المحلة




ناس زهقت وقرفت من الفساد




ناس زينا
مننا
بيصلوا ويدعوا
زينا

مش يبقى خير
ليكى يا بلد








دىشركتهم
جوة بلدهم

لية الغربة

اللى عايشيناة
كان هو دا سؤالهم




حتى حريمهم
رفضوا الظلم






دى مطالبهم

حد سامعهم






مهما هايحصل مش هايخافوا








تسمع صوتهم

قرب واسمع




انا بشكر صاحب مدونة
عمال مصر

على تغطيتة الجميلة للاعتصام

ولمزيد من المتابعة


هاتلاقوا اخبار
عن الاعتصام هنا




23 September 2007

انا مالمحلة


يا عمال انا وانتم واحد
اللى سارقنى وسارقكم واحد
ياعمال خطوة لقدام
ف الصف مكانكم قدام


وسرقوا الكستور
عرو الملايين
سرقوا الدوا مالعيانين
هيرحلوا امتى ؟
مش عارفيين!!!!!
اصحى ياعامل
بص يا مجدع
افهم دورك فى الوردية
مهما بتتعب مهما بتشقى
عرقك رايح للحرامية
وصوت الطبلة مع العمال
ضد السلطة وراس المال
شعب الفول يا شباب بيقول
الاضراب مشروع مشروع
ضد الفقر وضد الجوع
ضد السلطة اللى بتدبحنا
وسامع صوت المكن الداير
بيقول بس كفـــــــــــــــــــاية مذلة
وسامع صوت جاى من حلوان
بيقول شدى الحيل يا محلة
معتصمين والحق معانا
ضد حكومة بتتحدانا
ويا رئيس الجمهورية
عمال المحلة الكبرى يعتصمون اليوم الاحد 23/9

21 September 2007

للذكرى واشياء اخرى


باتوة
فى الشوارع
بضيع
فى المواجع
بطوف فى المدينة
وبيوتها الحزينة
بشوف فى العيون
الحلم اللى راجع
تتعبنى الخطاوى
تخنقنى المدينة
ياخدنى حنينى
لبستان الحياة
افرد دراعى احضن هواة
ياخدنى خيالى
لايام صباة
فـــــــــــــاكر
هناك عند الشجر
تحت المطر
اِيدها فى اِيديا تشدنى
تنسينى احساس الخطر
عينها فى عنيا تهزنى
صورة من حسن القمر
محلى بستان الحياة
فى كل ركن ليا دمعة
وفى كل ضلة ليا بسمة
وعلى كل شجرة ليا رسمة
بتحكى ذكرى فى سكتى
بتجسد براءة خطوتى
هنا بنلعب
وهنا بنضحك وهنا بنحكى
وهنا بنرقص مالفرح
بعد نتيجة الامتحان
مر الزمان بس المكان
هو المكان
صورة بتدينى الامل
ذكرى تمنحنى الامان



سؤال لو سمحت عشان افهم هو مطلوب من الانسان انة يحتفظ جواة بكل الذكريات سواء وحشة او حلوة مع العلم حسب تجربة شخصية الذكرى الحلو اكيد ملزوق فيها ذكرى وحشة ولا مطلوب مالانسان انة يفتكر الذكرى الحلوة بس ولا مش مطلوب مالانسان انة يحتفظ باى ذكرى؟؟؟؟؟

11 September 2007

مكسوف

مكسوف
منك يا رمضان
خايف تيجى
وانا مش انسان
منا وطنى دة غابة
بيحكمنا ديابة
فى الليل تسجد
لابن الشيطان

وان جاز لى الصوم
وانا كلى هموم
هايجوزلى
سكوت

هايجوزلى هروب
مكسوف
اوى
اوى
يا رمضان



يارب رحمتك

08 September 2007

واحد مش فاهم حاجة


مبدأ أختارة لنفسي ولا أخشى فية سخرية الساخرين ولا لوم اللائمين

أختارة لأبحث في عقول الآخرين عن ذاتي

اصطنعت السطحية والسذاجة لأصل إلى أعلى درجات التعمق والتبحر في النفوس البشرية

فقد عدت بنفسي إلى الوراء واتخذت من فطرة العقول الصغيرة ستاراَ أتخفى خلفة حتى نهاية رحلتي

فى نفوس البشر

انظر للحياة من زاوية بعيدة لكنها أوضح

أحاول أن استدرك كثيراَ من المتناقضات التي تملآ حياتنا

أحاول إن أتعلم الوفاء والإخلاص ومعاني العزة والكرامة والعطف والاحتياج

أحاول أن أتمعن في كل الأوطان لكي اخلق لي وطناً أجد فية ذاتي وأشياء أخرى وأكون حاكمة فلا أخونة ولا ينقلب علىّ

أحاول أن أتوغل في قلوب نساء الأرض لأجد امرأة

تسلبني خشونة الرجال وتجعلني ملاكاً يعانق حبيبة بكل حنان

أحاول أن أكون بطلا أمام نفسي أمامها فقط ولا غير

هل أنا مخطأ

هل انا افضل ام من يدعى العلم بكل الاشياء

هل انا افضل ام من يدعى الجهل بكل الاشياء

اليس خير الامور الوسط

ها انا ذا اقف فى الوسط

واقدمها دعوة عامة للوقوف فى الوسط

لتفهم الواقع بمعناة الحقيقى



هههههههههههههههههه

سبحان الله

مش فاهم حاجة

29 August 2007

تهيسات قلم


1


دخلت الدنيا مش فاهم حاجة
فضلت اصرخ واقول فهمونى
والناس حواليا يضحكوا
ولا بيعبرونى
فكرت انى حمار
والناس استحمرونى
اتارى البشر
زيى
لا بيفهموا
ولا فهمونى




2

مسا التماسى
عالحمير اللى قاعدة عالكراسى
والغباء
فى عقولكوا راسى
ايوة انتم
يالى انتم
فى الوطن حكام
بيعتوا الوطن بيعتوة
بكام
متر الوطن يتباع بكام
نقطة
كرامة
اتنزفت
فى جيوبكم
تسوى كام





3

بتبكى لية يا ورد
وانت اللى كنت متبسم
بتبكى من شوكك
ولا عرفت ان الفرح متقسم
عرفت الضحكة فيك
اتاريك حزن متلثم
طب ممكن ابكى معاك
ولا الحزن برضوا
متقسم




4

الجذمة ضيقة
والدنيا برضوا ضيقة
الحزن خانقنى
ورباط الجذمة تاعبنى
لا منى
قلعت الجذمة
ولا حتى عرفت اية محزنى
لكنى عارف
ان الجذمة
مقاسى
والدنيا برضوا
ماسى
وبرضوا
الحزن تاعبنى



5



ميكروباص
وكامل العدد
قوم يا اسطى سوقنا
المزة قاعدة جنب
الولد
والرب فوقنا
والغنوة مايصة
مولعة
وجعت نفوخنا
اتارى
نصيبنا ننقلب
وماينجرح
الا البعدا
حبايبنا
مزة
واوسطى
وولد
شكرا ياربى
عالدروس
وحمدلا
على سلامتنا




الكاتب غير مسئول عن تلك التهيسات اسئلوا فيها القلم

28 August 2007

كتابة




منذ زمانٍ

وأنا أكتبُ

فوق الرملِ

كلاماً مجنوناً

منذ زمانٍ

والريح المجنونةُ

تقرأ

25 August 2007

مالك يا قلم


مالك يا قلم ؟

ولية بتنزف مالجروح اوجاع ؟
شد الخطوط رصها
قبل ما صاحبك بالرخيص ينباع
سن السنون
بيع الهموم
وارسم تفاصيل ضحكتى
اشطب دموع
وارفض خضوع
بيكبت ترانيم صرختى
عالسطر ارسم كلمتى
واقتل جوايا السكات
وحيد انا وياك
وبتعلم
معانى جديدة
لكل الحاجات
بتحلم باية خدنى معاك
للحلم
علمنى احس بية



عايزها حرة

ياااااااااااااااااااااااااااااااااة
يا قلم
حلمك جميل
منكرش انى حلمت بية
لكن شوفها


بتتنهد
وبطلع اهة مخنوقة
ويوم تضحك بتبى الضحكة مكبوتة
مزروع الخوف فى حتتها
ونار الظلم حرقتها
لكن ليها
جوة القلب حدوتة


كتاب واسع ملوش اخر
مربى الخوف لحسادها
وطارح قوة لولادها
وضد الظلم يكون دافع



كتاب مرمى ملوش معنى ؟
فى طريق ضلمة مجمعنا!!!!!

ولو تمسح تراب غطاة

يوم الجهل يمنعنا!!!!!!!
لكن
لسة عايش بحلم
وانت معايا
لازم تحلم
مفيش لينا غير الاحلام
يعيش الحلم
او
يدبل

قدر هاتحددة الايام

22 August 2007

مقروف من حبيبتى


قالوا زمان يا ام المداين نورى
وانا هاقول يام البهايم نعرى
هشى الكلاب من فوف كتافك واصرخى
ولا انتى غاوية وسط الزبالة ترمرمى

18 August 2007

بان النهار




بان النهار

على خدك انتى يا سمرة

ماتنورى
اومى بقى
اتشيكى وادورى
والبس فستان الفرح
ضاع الفرح............. !

ميين السبب؟
نار فى الحطب
دود فى الخشب
حالنا انقلب!

والله يا مصر كلامك عجب
وشعبك عجب
مجنون بيضحك مالالم
والفقر ماصص جتتة
وكانة طابور مالغنم
وكلاب بتسرق اكلتة

طب امتى الخلاص؟
ولا خلاص انكتب
اخر سطر فى كتابك
ذل والم

قومى اكتبى
فوق العلم
انا شمس دايمة منورة
لو يوم ازول
الكون يزول
لكنى اوقات بنكسف
من كلب ربيتة
فى حجرى
لكنة غدر

والله يا مصر انتى طيبة

وولادك قلوبهم حجر

13 August 2007

الله على كل شى

الله عالمكان
لما يجمع بالحنان انسان
الله على الذكرى
لما تلون بالامل بكرة
الله على كل شى
بيدارى قسوة شى
كان ساكن قلوبنا برى
وفضل عايش مع الفكرة


الله دى كلمة بتوحد عظمة الخالق
ومش فارق
تكون الدنيا حلوة
او حتى شى مارق

لو المعنى يتبدل
هاتتعدل
وبعد الليل
اكيد هانشوف الامل شارق

ويزول ضجيج كل الخطاوى المزعجة
بعد الزحام
وتدوب دموع كل العيون الطيبة
ويا الالام


هيا حكاية طفل وعايش
وسط الدنيا
باحساس خايف
يزعق يندة
حد يساعد
يلقى صداة بيرد اساعد

كل مايكبر املة بيكبر

لكن شوك الدنيا بيكتر
شوكة فى حبة
شوكة فى فرحة
شوك متبعتر لكنة بيكتر

حب يسافر يلحق حلمة
فى بلاد تانية
لكنة فى ثانية
حاوطة اليائس
فى كل الدنيا
الا مكانة
مكان الذكرى
حنب الفكرة
ويا حنان
مرسوم انسان بيبص
لبكرة

19 July 2007

فراق

فراق بفراق

وحنين ومشتاق

والقلب يغنى

على لحن فراق

وشعور مكبوت

مربوط
محطوط فى ظلام النفس

بيقول يا فراق




06 July 2007

عدنا


الحمد لله

رجعت تانى

وباذن الله

هاحكيلكم على كل حاجة

المهم دلوقتى

انى عاوز اقولكم

انكم حشينى اوى

21 June 2007

فيين الحقيقة يا خال


جربت احلم بالحقيقة
لاقيتنى غرقان فى التمنى
حاولت اختارلى طريقة
لاقيت طريقى الصعب هزمنى
لاقيتنى عايش
انسان عبيط
ماسك فى خيط
دايب ضعيف
وقعنى قسمنى
بين نص تاية فى المعانى
ونص خايف مالحقيقة
عيشت بحلم بالاغانى
كانت مشاعرى لسة بريئة




وفتحت بابى
على شط حلمى
لاقيتة راكب
مركب مفارق


ولية مفارق؟
رد وقالى انا حلم كاذب

لشخص هايم
فى الوهم غارق


شوفت هناك
يافطة بعيد
بتقولى ابعد
بلاش تقرب
انا قولت اقرب
يمكن يكون حلمى الحقيقى هناك
ومتغرب

لاقيتنى برضوا

لسة عبيط
ماسك فى خيط
واقف ببص
عالدنيا ومستغرب