Pages

22 December 2008

إنت..إنت







إنت .. إنت

ايوة إنت ... قوم بارزنى

قوم بارزنى بضحكة صافية ؛

ضحكة طايشة ف كل ناحية

انزع الخوف من شفايفك

وانفجر بالضحك ارضا

وابقى قولى كسبت اية ؟



وكسبت لية !


ً

30 November 2008

التدوين والسينمات الرخيصة

فى البداية

كان فى مكان البوست دة بوست غيرة كتبتة عشان يتماشى مع مناسبة ان المدونة تمت عامها التانى وكارثة انى وصلت لعامى ال 21

لكن بعد ما خلصت البوست قريتة ملاقيتش غير بوست مفتعل اوى والكلام اللى فية تحس ان اللى كتبة خلاص ياعينى ماشى ومش راجع تانى والمفروض بقى ان اهل كفر عنابة جايين كلهم على محطة القطار بيودعوة وكلهم بقى ماسكين مناديل الرجالة مناديل بيضة والستات مناديل وردى وتدخل الموسيقى التصويرية اللى بتبدا بصوت ناى وتنتهى بصوت طبلة عالى فى اللحظة اللى بيكون فيها بطل الفيلم بيجرى بيين شبابيك القطار عشان يحضن حبيبتة اللى يعينى جاية وعيونها غرقانة دموع وهنا يتدخل المخرج ويقول استوب كفاية استخفاف بعقول البنى ادمين

ومن هنا وقبل ما نكمل بقولك ان اوبشن الاستوب بالعربى الوقوف ( تناكة ) فى ايدك انت لان الكلام التالى استخفاف برضوا




انا جيت التدوين من حوالى سنتين جيت وشايل دماغى اللى هى كانت فاضية وهى ماكنتش فاضية بمزاجى بجد انا حاولت قبل كدة املاها بحاجات كويسة بس ملقيتش حد يساعدنى فخفت عليها تتملى بحاجات وحشة فقررت قرارى الحاسم انى اسيبها فاضية
اية بقى علاقة الدماغ الفاضية بالتدوين
عارف احساس الاتنين الصحاب اللى قطعوا سوا تذكرتين سينما من السينمات الرخيصة اللى بتعرض فيلمين او تلاتة فى حفلة واحدة اللى هى غالبا 3 ساعات بس

فى السينمات الرخيصة انت ممكن تدخل لاكتر من سبب بس الاكيد والمؤكد انك مش داخل عشان تتفرج على سينما
ولهذا السبب قررت انا وصاحبى اللى دخل معايا وواحد كمان اتعرفنا علية فى السينما الرخصية واللى تشاء الاقدار ويطلع اسمة تدوين شوفت الصدف قررنا نهجر السينما الرخيصة وندخل سينما بجد بجد فعلا ماللى وانت بتقطع تذكرتها بتبقى عارف انك بتقطع تذكرة ذهاب لحتة كدة فى احساسك وعواطفك ووراقعك حتة عديت عليها كتير بس مخدتش بالك من جمالها قبل كدة
وانا خارج من السنما الرخيصة اشتريت سندوتش كرشة من عربية عم صلاح كلبوش ومشيت انا وصاحبى الجديد اللى شاء الصدف وطلع اسمة تدوين قم اية عدينا على ميدان التحرير تقولى ازاى اقوولك معرفش وفجاة تدوين وقف وقالى شايف الناس اللى هناك دول كلهم اصحابى ومن هنا تبدا الموسيقى التصويرية اللى هاتلازمنا لحد اخر الفيلم فى اللحظة اللى بيظهر فيها على الشاشة شوية شباب زى الفل واقفين بيغنوا اغانى الشيخ امام فى وسط ميدان التحرير ميدان التحرير يا اسيادنا انتوا متخيلين المشهد وشوية ويظهر فى الكادر واحد كدة حسيت انى اعرفة ايوة الراجل دة شوفتة قبل كدة دة البنى ادم اللى كان بيطلع فى صور عالنت ووماسك يافطة مكتوب عليها عايز حقى
هو ببصت عنية اللى تحسها بتطلع شرار شرار وامل دة صاحبك دة يا عم تدوين ؟ ايوة ياعم صاحبى انا حبيت الراجل دة
شوية ويتملى الكادر بواحد تخين واقف بيوزع منشورات فى عرض الشارع ومش فارقة معاة اى حاجة امسك المنشور واقراة
الاقىهم كاتبين احنا شباب مصر الحلوين اوى اوى اللى واخدين بالنا من دبة النملة فى البلد دى بس كنا منفضين بس جة الوقت اللى نخرج فية عن صمتنا ونتكلم واحنا مش حزب وطنى ولا معارضة يا اسيادنا احنا ومالاخر المدونين ويتقلب الكادر بواحد لابس حاجة غريبة كدة على دماغة وبيقول المدونين ببساطة ناس بتدون كل اللى بيحصل بروقان ومن هنا كان صعب على مخرج صغير زيى انة يكمل المشهد كان لازم اعمل استوب كلمة روقان فى حد ذاتها كلمة ثورية انا مرة شوفت فى فيلم اجنبى ان الثورة من غير رقص متبقاش ثورة عشان كدة رنت فى دماغى مقولة ان الثورة من غير روقان متبقاش ثورة يعنى بتوع المعارضة والناس اللى بتتشنج وتتحسر وتتوجع وهيا بتقف ضد الظلم دول مش ثوار انت فاهم معنى الكلمة انت فاهم معنى انك تكون بتدور على حق بروقان يعنى انت اللى بتفكر يعنى انت اللى بتضرب الضربة الاولى وانت برضوا اللى بتضرب الضربة القاضية

نروح للمشهد اللى بعدة ماشى انا والواد تدوين لابيا ولا عليا قم اية يجى واحد من اصحاب تدوين يخطف حتة مالسندوتش بتاعى سندوتش الكرشة انتوا نسيتوا ولا اية قولت يا واد طنش دة صاحب تدوين اكيد واد جدع يعنى وفجاة وانا جوة الفيلم دة بتفرج على فيلم تانى فيلم عماد الكبير اللى نسى الفيلم دة واللى اتعمل فية والحق اللى اتشد من بؤ الاسد يرجع يشوفة تانى بصراحة درس يدرس فى كليات الروقان فى جامعات العالم كلها وبقيت اخرج من فيلم ادخل فيلم ومع نهاية كل فيلم دماغى بقت تتملى بعد ايام الفضا ومع نهاية كل فيلم كان السندوتش بيقل حتة وانا اقول يا واد نفض دول اصحاب تدوين واكيد ناس جدعان يعنى

لحد ماروحنا لفيلم عمال المحلة ومن هنا اتقلبت الاية بقى المدونين هما اللى يتشنجوا والعمال هما اللى رايقين
بقيت اشوف العمال وهما معتصمين اخر سلطنة ومزاج واكلين شاربين ومزاجهم عال العال والمدونين ياعينى واخدين كل حاجة على صدرهم زى اهل كفر عنابة هوب الحكاية كبرت وبدل ما كانت اعتصام لشوية عمال فى شركة فى مدينة بقت اضراب لمصر كلها
الموضوع صعب يتاخد عالصدر الموضوع لازم نطلع فية كل مخزون الروقان بتاعنا
انزل انا بمنتهى السذاجة اشوف الناس عاملين اية فى البلد ( المحلة ) عشان اكون ولاول مرة محشور فى الاحداث وفجاة كدة وبدون مقدمات

عالشمال ناس شكلها غريب غبى كئيب بتحرق فى مدرسة ابتدائى ومن ورايا ناس شكلها طيب بيكبوا الحماس اللى جواهم فى اى جنب اصل ملقوش حتة مناسبة يكبوة فيها ومن قدامى عساكر امن مركزى واقفين للاستفزاز الناس مش اكتر وكر وفر وانا فى النص بعمل اية مش عارف وجيت الحتة دى لية مش عارف برضوا كل اللى اعرفة انى خرجت من المنطقة دى وانا مش فى ايدى سندوتش الكرشة
انتوا نسيتوا ولا اية سندوتش الكرشة اللى اشتريتوا من عم صلاح كلبوش اللى هو كان اول واحد يدخل مصر عربية كرشة بموتور

واستكمالا لفاصل السخافة دة بطالب بحملة موسعة لاستعادة سندوتش الكرشة بتاعى بانرات بقى وافتكاسات بس بروقان



ملحوظة : معرفتش اوصل للسينما اللى بتحس وانت بتقطع تذكرتها كانك بتقطع تذكرة لحتة كدة فى احساسك وعواطفك وواقع حتة عديت عليها قبل كدة بس مخدتش بالك من جمالها

28 November 2008

سور المدرسة



اخيرا شوفتك بعد اربع سنين


انت من اربع سنين قاعد فى دماغى وحاطط رجل على رجل

وانا من اربع سنين بحاول اوصفك فى قصيدة شعر


اية دة انت بقيت تكتب شعر

لا بحس باحساس الشعراء فقط لاغير

وانت ؟ زمانك بقيت اخوانجى كبير

لا انا بقيت اكرة السياسة

وياترى حبيت ميين عليها ؟


عشقت الطب لدرجة الجنون


ووقعت فى هوى الموسيقى الكلاسك


وغرقان فى بحور التامل لشخصية ليناردو دافنشى


فاضلى واحدة وابقى وصلت لحدود المسموح بية فى الشرع


وانت ؟


بقيت افهم روايات نجيب


وبحب دستيوفسكى


وبحب السيما كمان



*********************


فاكر اخر مرة شوفتك فيها ؟


فاكر انت ؟


امتحان الفيزياء .... كنت خارج بتجرى


ناديت عليك ... لية مرديتش عليا



كنت ابتديت اخاف منك


فكرتك نسيت العهد عهد الحلم


الحلم الاكس لارج


زى جلابية عم ميدو



انت اللى خنت العهد الاول


مش كنا زمايل تحتة واحدة فى الاعدادى


اة التختة الاخيرة


لية فى الثانوى سبتنى وقعدت فى التحتة الاولى


وانت عارف انى بكرها


لان اتفاقنا كان اننا نفضل نكبر نكبر لحد ما نبقى الاول


انت وقفت كتير ورا


*******************

بص كدة


دة بحث انا عاملة يعتبر اكتشاف جديد فى الطب


فى حالات من مرضى السكر بيموتوا والطب بيحلل موتهم بالموت المفاجى


اللى ملوش سبب


اينشتاين مات كدة


انا بقى اكتشفت سبب



انا بقى اكتشفت نظرية البلوتوث

بقيت اعرف اعمل هاك على ضمير الناس

فى الشارع فى الجامعة فى البيت حتى

بقيت ادخل اسرق كل الداتا اللى فى دماغهم واخرج

بسرق كل حواديتهم وماضيهم وهمومهم

كل دة من نظرة واحدة

****************

انت اكبر بلطجى شوفتة فى حياتى

انت اللى علمتنى البلطجة

وانت اللى علمتنى الطيران

من فوق سور المدرسة








21 November 2008

حلم انانى

آدى وآدى


غول مستنظر



آدى وآدى


ماضى اتمنظر



عالمخاليق


آدى


النار بتبل الريق


بكرة اتعلق فى المتاريس


حتى الفرح ف قلبى خسيس


كل مازورة من الناحية دهية


يهرب هو مالناحية دى



آدى وآدى



حلم انانى



غرب فكرى عن الاحداث


خرجنى برة البرواز


ولقط الصورة بحبيب غيرى


هوب حبيبك



ثار و اتمريس فيكى وفيا


وعمل حاوى


سطر جرحى خطين حمر


وقرر يعبر بينهم ليكى


وادى المشهد


واقف هو بزهو شموخة


بيقول خطبة فى سحر جلالتك


يا بهية ....... انا قادر


اوقف جرى النهر الهادر


وافض بكارة حلم عويل


واوصل بيكى لشهئت نشوة


بعد ممارسة فعلى الفاضح


فى الانحاء



وامنح هذا الابن العاق


صك الرحمة


سهم ف شرفك المبدور


وابقى الشارى وهو البايع


واهدم فيكى حصن وسور


لاجل مايعبر سيدى الغول


باقى نهاية


للحدوتة


قبلة اخيرة بين العاشق والمعشوق


هانخلدها وهاننحتها فى صورة ذكرى


هانعلقها فى باب الدنيا


لاجل ماتبقى ذكرى لخوف


خوف شيطانى


حلم انانى


وشوق مش عارف رايح فين


قصيدة كتبها


ف مليون كلمة


شاعر هايم من مجاذيبك


عن قبلة اخيرة


عندك مانع ؟

16 November 2008

مسطول






وقفت فجاة


كتبت اسمى


وقلب صغير


بصباع روج


على شباك احلام مقفول













عدى يا بكرة


بسرعة اكتبلى


جنب الاسم


مليون طظ





اما صحيح الهوى مسطول


07 November 2008

انـــــــــــــــــــــــــــــا

انا الفاسد فى اوطانك

مليش وردة ف بستانك

انا الراهب فى احزانك

ضمير بيهز اركانك

وبتهجد

وبتعبد

لاجلن يعود سحرك

و اضيع اكتر

واموت اكتر

واتبعتر

مابين شعرى والحانك

06 November 2008

وصول


الوصول لاحاسيس النشوة

وبلوغ القمة الاعلى للسعادة

وتحقيق الاحلام جميعها

هو العدو الأول لإنسان

أصر على إطلاق العنان لتمردة

لازال هذا الأحمق المتمرد بداخلي

يحب التشرد عن التفرد

ويعشق صعود الجبال

دون وصول

26 October 2008

اسطورة فى الذاكرة

يعود الصباح ليذكًرنى بامرآة اسطورية تسكن قمم الجبال

امرآة تقيم علاقة سادية الأبعاد مع ذاكرتي تأتيني كل صباح , تتراقص أمام مرأتى , تتلاعب بخصلات شعري , تخرج من فنجان القهوة التي طالما فضًلت عليها الشاي الممزوج بالحليب

تراها ألان تقف على أعلى قمة في مملكتها تحتسى القهوة بدلاً من الشاي

كانت القهوة قديما مشروب صباحي للرجال دون النساء ولأنها أمرآة اسطورية ستشربها صباحاً لتتجمل اسطورتها بنوع من الصمود الذي كان صفة لا يختص بها إلا من خلدتهم الأساطير من الرجال

حتما ستشربها , ستشربها فى الفنجان المزين بقطة بيضاء تقف فى ابتسامة بريئة بجوار قلب احمر اعرفة كان يوماً قلبي , وربما تبدلت الألوان وصار القلب ابيض كقلبها , هي الألوان تتفنن في تعذيب ذاكرتي , تغتصبها في فعل سادى كأسطورتها

يحدث أن يخرج هو مرتدياً الأسود بمثابة إعلان صريح عن رجل غامض يمشى في الطرقات , يحدث ان يقابل هو أمواج من بنات حواء يرتدين الأصفر الفاضح في الأخضر القاتل فى صورة هزلية كتلك التي تمثلها هفواتة وسقطاتة في الأسطورة , اسطورة امرأة تسكن قمم الجبال

الألوان والأماكن وكل ما ليس لة روح في حكاية اسطورية هو ما يغتصب الذاكرة في فعل سادى

ستموت كل صباح ستموت بين الألوان أو ربما على فرع شجرة رأيت تحتها ابتسامة لامرأة اسطورية ستموت في الطرقات والحارات ستموت حتما على ضفاف الأنهار وصخور البحار ستموت وتبقى الأسطورة لتعيدك إلى الحياة مرة أخرى لتموت فكل الأساطير كانت بنهايات حزينة ولكن مع تغير ألازمان أتى حمقى آخرون لم يكونوا طرفا في الأسطورة ليضعوا لها النهاية السعيدة في سذاجة لا يعاتب عليها الحمقى والحمقى فقط


11 October 2008

قديمة يا ريس

وربنا قديمة

عاملها قبلك من ايام ابلة رتيبة

وفصل خامسة تالت

قديمة ياريس والله قديمة



الضحك عالدقون

واللعب فى المضمون

من جوة ظالم

ومن برة يا ننوس امك مظلموم

انا اللى سرقت السندوتشات من ايهاب

وانا اللى سامحتة لما طالة العقاب

ومن يومها

وانا رئيس الفصل

ومن يومها وايهاب كداب

مع ان انا اللى سرقت سندويتشات ايهاب


04 October 2008

ازايز الاحلام






مفتتح :


سرقوا الضحكة ... عبّوا الخوف جوة أزايز الأحلام

قرب وإسال .... يا اللى لساك قادر تحلم

قولى يا عمّو الحلم بكام

إرفض وإخلع

كل مظاهر جهل العالم

إشخط وإنطر

وإعلن رفضك للتطبيع

ويا قانون الخوف الازلى

ضاع من عمرك عمر بحالة

شايف ضعفك وانت قوبالة

وازاى ساكت ؟ !

فاكر صورتك

لما اتسرقت منها ألوانها

متبقاش غير ابيض واسود

فِكرك لية ؟

لأجل ماتحزن

وف ضلمة حزنك ترجع تحزن

تكبر جوة ضميرك عتمة


تفقد شوفك

تخبط تكسر

تقلع شجرة حلمك منك

تصبح بوّر

جواك ساكن شىْ مكسور

مسجون حلمك فى البتارين

عاجز وسط احلام تانين

واحد يضحك

واحد يغمز فى استخفاف

واحد يسال

عموً يا عموً

قولى بسرعة الحلم بكام


24 September 2008

عصر الطرابيش وتحولات الطراطير


لازال عقلى الباطن القابع بداخلى منذ انقسم عقلى الصغير لعقلين

احدهما اصر العزلة فى ما يشبة كوكب بداخلى

لازال يحلم بزمن الطرابيش والسلطنة على طرب ام كلثوم

وحياة الباشوات والست زينب هانم و رد قلبى

وسذاجة متفق عليها بين عامة الشعب من اجل هدف اسمى وهو الحياة

لا اعلم حقا من هو الطرف الذى اصر على كسر بنود اتفاق السذاجة السابق ذكرة

وقرر الدخول لحياة الطرف الاخر لتتخلى السينما المصرية عن ثوب الكلاسيكية

وترتدى ثوبا اخر اقرب للفهلوة ويتراجع عامل الفانتزيا فى حياة هذا الوطن

هل فعلها احمد مظهر بعد ان فشل فى اطفاء نار الحب التى كانت قد اشتعلت

بين اختة الاميرة انجى وعلى يا ويكا ابن الجناينى

فقرر الانتقام بان يتسلل الى قهوة المحطة ليداعب قلب الراقصة

التى سبق وان سلبت قلب عواد اللى باع ارضة

او ربما فعلها عواد وكان الاسبق فى كسر بنود اتفاق السذاجة

حينما ودع قريتة على انغام كورال مسرح القرية

باغنية عواد باع ارضة واستقر بة الحال فى قلب ليلى بنت الاغنياء

على كل الاحوال فدائما ما يلعن قلبى ذاك الاثم الذى كسر بنود الاتفاقة

فى اخر روايتى مع ذلك الاثم عندما انتهيت اخيرا من تحميل فيلم سواق الاتوبيس

وقررت الاختلاء بنفسى لقضاء بعض الوقت مع الفن السابع

اذا بذاك الاثم يطل بوجة القبيح

يطل مع نهاية كل مشهد ليخبرنى بانة مازال هنا يتنفس قبحا

يطل ويسبقة لسانة فى ابلغ تعابير السخرية منى

يطل ليعلن من فترة احداث الفيلم

بانها منطقة كسر وشرخ انحدارى اخرى فى ايدلوجية ذلك البائس

المسمى على حسب المكان مصرى

حقيقة مسلم بها

عندما تتمدد الطرابيش راسيا تعرف فى قاموس اللغة العامية

طراطير

لما قريت فى مدونة وائل عباس

عن حلمة بان يكون المدونين المصريين اول من يعزل رئيس جمهورية

زى ما عملتها ووتر جيت

لاقيتنى متضامن معاة

ونفسى اشاركة حلمة

نفسى اقلع الطرطور

17 September 2008

انتاج مصرى مصرى مشترك



الفيلم شغال

السيناريو مظبوط

الممثليين مليقش بتمثيلهم غير الاوسكار

المشهد داخلى او خارجى

الوقت هو وقتنا

عاوز كوميديا

بص فى الشوراع هاتشوف كوميديا

عاوز تراجيدى افرح ياعم

التراجيدى موجود فى كل حتة

اقسم باللة ممكن تشوف فيلم تراجيدى فى عين كل واحد

قوم كدة وبص فى المرايا

عايزها اكشن

بالصلاة عالنبى افلامنا عدد اللى بيموتوا فيها بالالوف

عاوزها خيالى

عيش بقى احلى جو فانتازيا


الانتاج مصرى مصرى مشترك

دلوقتى تقدر تصدق

اننا شعب بيمثل فى كل حتة

احنا شعب بيمثل على نفسة

بس للاسف مفيش موسيقى تصويرية

30 August 2008

فكر عارى







فكر عارى


خرم ف جدار القمر


بيزيد ظلامك يا ليالى


تحريف لمعناة الكلام


والعرف بدل طلتة


وطل بالوجة القبيح


الوطن


مخنوق يا ريح


وقبل ما نغوص ف الكلام


خد منى اول خبر










قبل الفجر


ما يشنق نفسة


كان اتامل عجزة


ف مات


مات مفزوع مش مشنوق


ف نطت حكمة


ف جوف الشاعر


فزادت صمتة ......... الام وخضوع










فيين المعنى


واقع منى ف بحر غويط


تقصد يعنى سوء تخطيط


اقصد ان الغُلب محيط



تيجى ازاى ؟







تعرف قصة من غير عاشق


او ضحكة ملهاش انسان


او نسمة من غير عنوان




اذكر قصراَ او تفصيلاَ


معنى العاشق


وما كينونة فعل الحب ؟



اِستخرج من كلمة ضحكة


شى بيخص بنى الانسان







وقبل ما يرسم فكرك رد


اكتب زيى ف وسط السطر


قبل الفجر


ما يشنق نفسة كان اتامل


عجزة فمات


مات مفزوع مش مشنوق


20 August 2008

28 July 2008

السقا مات







السقا مات ........ السقا مات

فى ركنة البعيد الهادى

وارتفع

صوت الاعادى

وبان اوى بعد الرحيل

مين ولية

مفيش دليل

كل الحقايق مطمسة

زى الضباب ؛

بعد الطوفان

مفيش طريق

كل الجرايد صممت

سبب الوفاة

كان ثقب فى جدار إربتة

ادى الى تسرب قطرات الحنين

مخزون حياة العطشانين

للذكرى أو كلمة أمل


الكدب مشموم فى الخبر

طلق الغبا مسموع اوى

بيعلن ميلاد اول

غبى

بعد ما مات السقا مات

طب سين سؤال

ابن مين هذا الغبى ؟



فى البداية

نفس نقطة النهاية

دايرة طموحنا الضيقة

اليك يا سيدى مطلبك

هذا الغبى

سليل عائلات الضمير

لما انحرف

ابن السِبات ....... ابن الهِرم

ابن تعابير الالم

اللى اترسم

بفعل معزوفة بلاهة

على سمع كل اللى اختشوا

او مختشوش

فى الحقيقة ........... وبدون رتوش

هذا الغبى ...... ابن كل الاغبيا

اللى استقروا فى حزننا

ونقشوا على جدار ضعفنا

لوحة مالجهل المبين

بركات جراحكوا يا حزنانين




والسقا مين ؟؟؟

السقا بحر مالحنين

ع .. جبينو منقوش اليمين

وف ... قلبة مفتوح المزار

لية طوبة

فى اساس كل دار

السقا بيحب النهار

سجين فى صالة الانتظار

لكنة رافض الانهيار



عبى روحة فى ازايز

من غير علامة مسجلة

لاجل ما يسقى العطاشى

ويصد موج المهزلة



تقصد تقول انو انتحر

السقا بيحب الحياة

ناياتى سارح فى البلاد

بيغنى للخرص الحكاية

فنان وداير عالمسارح

فى كل انحاء الوطن

وف كل ودن

يقول يا ناس

انا اسمى فجر

واستنى يسمع يوم ادان

ومجاش ادان

لانو فجر ملوش ادان




يبقى مات والموت قدر


والفكر برضوا مات قدر !


السقا مات والموت قدر

والفكر برضوا مات قدر !!

وف البداية نفس نقطة النهاية دايرة طموحنا الضيقة

والسقا مات والموت قدر

والفكر برضوا مات هدر


يوووووووووة اقصد قدر


طلق الغبا مسموع اوى بيعلن ميلاد اول غبى

والسقا مات والموت قدر

والفكر برضوا مات قدر







27 July 2008

....................



انت يا بنى خايف لاكسب القضية

لا اطمن هاخسرها


99 فى المية هاخسرها


وللمرة المليون


هايقولوا عليا محامى حمار



حمار بيترافع عن حمار



وعايزنى اكسبها



سلام يا جو


19 July 2008

خريطة الروح






برغم عبورى بوابة العشرين عام

لازلت اقع كالاحمق

فى عشق كل فتاة

تحمل فى وجها ذاك المدعو النمش

لازلت اعتقد فية

خريطة للروح

اتحسس فية دروبها

وخباياها



برغم عبورة بوابة العشرين

لازال احمق بلا خريطة


----------------------------

احبك

وانطرد

عصفور

واسبح فى الهوا والنور


واملا الكون باغانيا

ولو كان الجناح مكسور


احبك

تستكين الريح

فى قلبى

والامانى تصيح

بحبى

واعشق التصريح

ودربى فى الضباب مغمور

احبك

تبتدى البدايات

تاخدنى ضحكتك بالذات

تعيبنى

روح وقلب و ذات

تزيدنى

كشف للمستور

احبك

ضى روحى يبان

واعبر

ضلمة الحرمان

احبك

واهجر

لعبة الاحزان

واحقق حلمنا المسحور

احبك

تستكين الريح

فى قلبى

والامانى تصيح

بحبى

واعشق التصريح

ودربى فى الضباب مغمور


على الحجار