Pages

02 December 2007

صورة وكلمة وكام ذكرى

عشرين غريبة
غربة وغرابة
عشرين كئيبة
وفيها طيابة


عشرين تفرح

عشرين تبكى

عشرين بتحلم
ومالحلم تشكى

عشرين يا عاشق

والقلب واقف
مفيهش نبضة
بتقول يا حب
والبنت نايمة

لسة فى خيالى

مستنى يجمع مابينا سهم

عشرين مسامح
عشرين بغنى
عشرين وبظلم
والظلم خانى
المعنى عندى
حسة فى ملامحى
بيبان فى خوفى
مسموع فى صمتى

بيبان فى حلم
ساكن جوارحى

عشرين دى نسمة
عدت عليا

قالت لى
اصرخ


صرخة قوية





سنة اولى تدوين



19






السنة العشرين




20 comments:

mohamed emera said...

السلام عليكم
كلامك جميل قوى وكل سنه وانت طيب ويبقوا 140مش بس 20 بس انت عملت اهم حاجة انك فكرت فى العشرين دول كانوا ازاى والتفكير بدايه لمعرفة المزايا والعيوب ومحاسبه النفس
بجد قصيدة جميله قوى وكلام حد واعى بيفكر
تحياتى

مؤمنه said...

السلا عليكم ورحمة الله وبركاته
عشرين سنه وحضرتك طيب
ياعم ما تفكها باءه وشوية تفاؤل على شوية أمل أحب أقول لحضرتك ما ينفعش نقول لا اله الا الله بقلبنا ويكون عندنا تشاؤم ويأس ربنا موجووووووووود ازاى باءه نضايق ارمى حمولك على ربنا وفكها
وبعدين انا عندى العمر بيكون عدى منى فعلا هباءا ان كنت ما عملتش حاجه فيه مفيده وترضى ربنا ولو اتسألت عنها يوم القيامه ما أكونش ضيعته كده هباءا
أو حتىيكون كان مرحله للى أحسن
وأنا حاسه ان شاء الله ان حضرتك هتنجز كتير ان شاء الله
وتانى تعليق
والسلام عليكم ورحمة الله وبركاته

Bossy said...

السلام عليكم ورحمه الله وبركاته

كل سنه وانت طيب يا مصطفي
وعقبال يارب مليون سنه والسنه اللي جايه تكون حققت كل شئ اتمنيته وربنا يكتبلك الخير دايما

حسيت من كلامك نفس احساسي اما بفكر اني عايشه بقالي عشرين سنه
تحس اننا عايشين بقالنا كتير
مش دي المشكله المشكله اننا لسه مش فاهمين نفسنا
كل سنه وانت طيب

max.adams said...

عشين زنه يا واد سبقتني يا عفريت
ألف كل سنة و انت طيب ويارب السنين اللي جاية تبقى أحلى و أفيد و أمتع
ويارب تنسى كل شئ سيء حصل فيها وتفتكر الحاجات الحوة بس .

عقبال اليوبيل الفضي وبعد كده الذهبي

سلام يا برنس صاصا

Unknown said...

محمد


شكرا على رايك الجميل
بس معتقدش ان اهم حاجة عملتها انى فكرت
ونصيحة منى ليك اوعى
تفكر

مش عاجباك النصيحة
طيب خلاص يا سيدى فكر براحتك

تحياتى يا باشا

Unknown said...

مؤمنة

تعليقك حباية مهدئة

لا الة الا الله

Unknown said...

بوسى الجميلة

انا قررت خلاص مش لازم افهم

بس هافضل اعرف الناس انى مش فاهم

بس قرارى دة مش قرار نهائى
اصلى بصراحة لازم افهم

Unknown said...

ابو الفناكيش

وانت طيب يا ابو الفناكيش

متخفش قاعد هنا شوية هاستناك
بس متتاخرش ونحتفل بالفضى سوا
باذن الله

تحياتى

Hadota ... حدوتة said...

الكلمات جميلة اوى د
خدتنى من دنيا للتانية فى لحظة
انا حتى عمالة اقول لنفسى انتى ليه جايب تاريخ حياتك كله فى القصيدة
اتارى العشرين دى طلعت عشرين سنة
عيد ميلادك

كل سنة وانت طييييييييييب
ويارب يتحقق لك كل الحاجات اللى بتحلم بيها وتكون سنة سعيدة
:)

مؤمنه said...

السلام ليكم ورحمة الله وبركاته
ممكن حضرتك تقولى ايه اقتراحك الى انا طلبته فى البوست عندى فى المدونه
اه فعلا التعليقات كانت مقفوله بس الحمد لله اتفتحت
عايزه اسمع الاقتراح
والسلام عليكم ورحمة الله وبركاته

Esmat said...

كل سنة وأنت طيب
وديما للأحسن وعامك القادم تتحقق امانيك
ما اجمل ما كتبت تلقائية وبساطة
وحلوة قوى العشرين ياااه فكرتنى بيها
لكن الحقيقة عشرينى كان الزمن أجمل من الان
مكنش الفساد دايس اوى كده فى الدنيا
يا رب وانت بتحتفل بعامك ال 21 يكون
الحال افضل فى بلدنا املنا كبير فى الله
لازم نأمل خير فى القادم
اتمنى لك كل الخير والتوفيق ومستقبل باهر
بإذن الله-

Unknown said...

حدوتة

من كيبوردك لباب السما يارب

بشكرك على رايك دة

تحياتى

Unknown said...

مؤمنة


تمام كدة

Unknown said...

عصمت

اة احسد انا دلوقتى ولا اية

مش هاتفرق تعيشى فى الفساد دة العشرين
او حتى التلاتين

بس ادينا عايشين فية

ويارب يبقى بكرة احسن

OldCatLady said...

كل سنة وانت طيب ...و الاهم من ده كله انك تحرص بقا ان السنة دى متكونش زى العشرين اللى فاتو...كانو وحشين..او حتى حلوين...خليها حلوة بجد تستاهل تفتكرها بجد..ربنا يعزك و يوفقك فى كل خطوة و يارب دايما طيب و بخير

Anonymous said...

السلام عليكم ورحمه الله


عشرين امل في السنه الجديده وعشرين فكرة

وكل سنه وانت طيب وعقبال عشرين ابتسامه

بوسي بتسلم عليك كتيررررررر

Unknown said...

انا بسلم عليها اكتر منها
ياريت تعرفيها انى مفتقدها جدا جدا جدا


شكرا على مرورك ورايك الجميل
مع انى شاكك انك بوسى

Bossy said...

السلام عليكم ورحمه الله وبركاته
شكك مطلعش في محله يا مصطفي

ازيك يا مصطفي اخبارك ايه اخبار الامتحانات ايه شد حيلك كده وزاكر كويس وادعيلنا

ana doda
دي اختي وقررت تقطحم عالم التدوين وحظها انك كنت اول مدونه تدخلها
وبصراحه المدونه عجبتها جدا خلاتها تصره انها تدخل العالم دا
وهي بتكتب التعليق كنت انابقي بذاكر جنبها فقلتها تسلم عليك
دخلنا النهارده نشوف الرد علي التعليق

وبس
يبقي شكك مطلعش في محله وبعدين مش معقول انا هستخبي ورا نيك نيم

خبر تاني بقي اني قررت اسيب عالم التدوين ومش ناويه اعمل ماتش اعتزال يعني فجاه كده مش هتلاقوا لمدونتي وجود بس اكيد هفضل ادخل مدونات الناس المحترمين اللي زيك

يلا بقي طولت انا اوي
ادعيلي لان خلاص زهقت من الشئ اللي اسمه مزاكره

نسيت اقولك كل سنه وانت طيب

Unknown said...

بوسى

بجد الخبر اللى انتى بتقولية دة صعب
لانك رفيقة درب
ومن حقنا عليكى كاصدقاء تدوين اننا نعرف منك السبب ونحاول نساعدك
لان مفيش سبب مقنع انك تسيبينا بالطريقة دى
واطن ان خبرك الجميل اللى سبق خبرك الوحش
يعتبر حافز ليكى انك تستمرى فى التدوين
مع اختك اللى اكيد هاتضيفلك وهاتضيفيلها
وانتم الاتنين هاتضيفوا للتدوين


ومش عاوز افكرك بكلمتك اللى انتى كتبتيها
فى اول مدونتك

انها حقا كلمات ، ولكنها ليست مجرد كلمات...فهي احساس حرك القلم ...وواقع اثار التفكير لكنها كلمات


بانفصالك عن التدوين
معنها ان الاحساس معدش موجود
واظن ان دة شى مش منطقى خالص

ولازم تدخلى مدونتك تانى
وتقرى بوستك دة


انا من اول ما عملت البلوج دا مفكرتش اني اقفله او اتوقف عن التدوين لاني حبيت الجو دا جدا

بس حاليابفكر اني ادلت البلوج واختفي من عالم التدوين لاني اول ما دخلت التدوين
عرفت مدونات كتير بس في مجموعه كده ارتبط جدا بدونتهم وبعتبرها مدوناتي بحب كتابتهم جدا

ومبحسش اني نزلت بوست غير لما يعلقوا عليه
بس للاسف معظهم دلوقتي مش موجودين

ياريت يرجعوا لان التدوين ملوش معني من غيرهم

هما

كلام لوجيك

مش فاهم حاجه

وقطر الندي

عالمي ازرق



مش انتى اللى كتبتى دة

بجد يا بوسى لو خرجتى من التدوين
الشجرة الحلوة اللى بحب اقعد تحتها هاتنقص فرع كبير
لازم تردى عليا
ولازم ترجعى للتدوين

دة امر

واهلا باختك فى عالم التدوين
وانا كنت عارف ان مش انتى اللى علقتى المرة اللى فاتت

عشان بس تعرفى انى فاهم كل حاجة
انا قولت انى شاكك فى اختك على انها بوسى

عشان لو مش انتى فعلا تتدخلى انتى وتعلقى وتعرفينا اخبارك

مستنى ردك

Bossy said...

السلام عليكم ورحمه الله وبركاته

عندي امتحان بكره دعواتك معانا


اولا بجد انا اشكرك جدا وشرف ليا اني اكون صديقة درب
انا مش هنكر يامصطفي حبي لعالم التدوين وللمدونات وللجو دا
بجد غيرتوا فيا اشياء كتير واستفدت من افكاركم وكلامكم وارائكم
عالم محترم عقليات نظيفه ناس محترمين
اعتبرت نفسي واحده منكم


يمكن انسحابي من بينكم انا بعتبره عقاب بعاقب نفسي بدا
وانا فقدت الاحساس بالحياه بجد

يمكن الاسباب كتير بس لاالوقت ولا المكان مناسبيين
اشكرك جدا يا مصطفي علي اهتمامك
واوعدك ان النقاش بينا في النقطه مستمر بس ان شاء الله ربنا يكرمنا ونخلص امتحانات

سلام يا مصطفي