Pages

28 November 2008

سور المدرسة



اخيرا شوفتك بعد اربع سنين


انت من اربع سنين قاعد فى دماغى وحاطط رجل على رجل

وانا من اربع سنين بحاول اوصفك فى قصيدة شعر


اية دة انت بقيت تكتب شعر

لا بحس باحساس الشعراء فقط لاغير

وانت ؟ زمانك بقيت اخوانجى كبير

لا انا بقيت اكرة السياسة

وياترى حبيت ميين عليها ؟


عشقت الطب لدرجة الجنون


ووقعت فى هوى الموسيقى الكلاسك


وغرقان فى بحور التامل لشخصية ليناردو دافنشى


فاضلى واحدة وابقى وصلت لحدود المسموح بية فى الشرع


وانت ؟


بقيت افهم روايات نجيب


وبحب دستيوفسكى


وبحب السيما كمان



*********************


فاكر اخر مرة شوفتك فيها ؟


فاكر انت ؟


امتحان الفيزياء .... كنت خارج بتجرى


ناديت عليك ... لية مرديتش عليا



كنت ابتديت اخاف منك


فكرتك نسيت العهد عهد الحلم


الحلم الاكس لارج


زى جلابية عم ميدو



انت اللى خنت العهد الاول


مش كنا زمايل تحتة واحدة فى الاعدادى


اة التختة الاخيرة


لية فى الثانوى سبتنى وقعدت فى التحتة الاولى


وانت عارف انى بكرها


لان اتفاقنا كان اننا نفضل نكبر نكبر لحد ما نبقى الاول


انت وقفت كتير ورا


*******************

بص كدة


دة بحث انا عاملة يعتبر اكتشاف جديد فى الطب


فى حالات من مرضى السكر بيموتوا والطب بيحلل موتهم بالموت المفاجى


اللى ملوش سبب


اينشتاين مات كدة


انا بقى اكتشفت سبب



انا بقى اكتشفت نظرية البلوتوث

بقيت اعرف اعمل هاك على ضمير الناس

فى الشارع فى الجامعة فى البيت حتى

بقيت ادخل اسرق كل الداتا اللى فى دماغهم واخرج

بسرق كل حواديتهم وماضيهم وهمومهم

كل دة من نظرة واحدة

****************

انت اكبر بلطجى شوفتة فى حياتى

انت اللى علمتنى البلطجة

وانت اللى علمتنى الطيران

من فوق سور المدرسة








13 comments:

TAFATEFO said...

مبعرفش أقول حلوه أوي وبس .. علشان كده كتير مبعلقش

بس دي حلوه أوي .. وبس

key of life said...

إسلوب رائع في تقديم الموقف
وياما بتحصل
سلام

فوكيره said...

عميقه
فيها سكون كده
و لمعه عين بنظره عتاب ممزوجه بفرح وأسى

..!! هي تركيبه عجيبه ..

اثرت فيا وعجبتنى اوي ..

تحياتى

حمامة said...

حلوة
بحب انا اوى الحوارات دى
اللى مبيفهمهاش بالظبط غير اللى كاتبها

انت دماغ
بس دماغ حلوة اوى

ياريت كل الناس مش فاهمه حاجة زيك كده

:)

Saydalanya Mat7oona said...

عارف أسلوب الcatching up بالأمريكانى....اعذرنى مش عارفة ألاقيلها حاجة أليق بالعربى...اتنين صحاب بقا بينهم حاجة تشبه كده و يمكن قد أو أكبر من سور المدرسة...بيحاولو يدوبوه بدردشة عن اللى حصل فى وقت ممكن يجيله عشرين سنة أو أقل...حسيت كل واحد فيهم لسه جواه الطفل اللى اشترى حاجة مش موجودة عند صاحبه راح نام عشان يصحى عشان يشوف زميله تانى يوم و يوريله الحاجة لمجرد انه يشوف النظرة اللى فى عينيه هيبقا شكلها ايه

حسيتها كده...او يمكن انا حبيت أحسها كده

بس حلوة

حلوة أوى كمان

max.adams said...

عاش سور المدرسه و عاش الطيران من فوقه وتستمر الدنيا في كونها كالحق الصغير الذي تتوه حبيبات النشوق داخله وتتلاقى بعد فتره فتحكي شكل الجدران الأخرى للعلبه و كيف أن الحبيبات الأخرى لم تكن أحن عليها من زميلاتها الأول و تستمر المسيره و يستمر هز و تقليب النشوق ....


ملحوظه
عاش من قرالك يا مستر "صاصا"

Hannoda said...

حلوة قوي
اقولك فهمتها ازاي؟؟

فهمتها انه هو نفسه اتنين
اتقسم اتنين من يو ما قرر يتغير

قرر يسيب اليلبية و الضياع
و يكبّر جواه المجتهد الايجابي

شفت اجتهاد و تقدم واخد شكل عملي بيقتل الروح و الاحساس

اتلخبطت كتير في البوست
لقيت النعاني بتقرب و تبعد

عجبتني جدا
جدددا

ذو النون المصري said...

حلوه حكاية الهاك علي عقول الناس دي
خيال علمي لكن ممكن يتحقق
غسيل المخ و اهو حصل
ايه المانع من اللي بعده؟؟؟؟؟؟؟؟؟؟

اقصوصه said...

احس ان الناس اللي نتعلق فيهم

او الاحداث اللي تمر علينا

ايام الدراسه

اشياء لا تنسى ابد

ما نقدر ننسى تأثرنا بهالامور

وما نقدر ننسى

الناس اللي تركوا بصمه واضحه فينا

على مر السنين

تدوينه جميله

وكل عام وانت بخير

وتقبل مروري من هنا

واحد مش فاهم حاجة said...

طفاطيفو

يا عمونا يشرفنى مرورك وتعلقيك سواء حلوة او وحشة فمابالك بقى انك بتقول حلوة


منور


-----------------------
key of life

شكرا على رايك

ولازم هاتحصل كتير طول مافى وقت بيجرى



---------------------------

فوكيرة

انا فعلا وانا بكتب كنت قاصد فيها الفرح ولمسة العتاب ومكنتش اتمنالها انها تخرج باسى بس مادام خرجت بنوع الاسى الجميل دة مفيش مانع منة

منورة البوست


-----------------------
حمامة

بلاش تفهميها زى مانا فاهمها

افهميها بطريقتك


وياريت كل الناس تفهم وافضل انا مش فاهم

عشان بحب التميز مش اكتر


شكرا على تعليقك


--------------------------
صيدلانية مطحونة

هى فى الاصل علاقة بين اتنين بياثروا فى بعض بصمتهم كل واحد علم التانى حاجة بمجرد وجودة فى لحظات متفرقة حنبة
ولما حصل الغياب

حصل الحوار دة

عشان يستعيدوا لغة الصمت وقواعدها ويبتدوا ياثروا فى بعض من جديد


---------------------------
ابو الفناكيش

تعليقك احسن مالبوست نفسة

هى الحكاية كلها حبيبات النشوق اللى بتتلاقى بين فترة والتانية عشان الحكى نوع كدة مالحكى اللى بيعلم مش زى كلام الليل يطلع علية الشمس يدوب

لا دة نقش فرعونى خالد فى ذاكرة كل حبة


انا بقى بستمتع بتعليقك اللى من نوع خاص عندى عامل زى النقط على حروف كل بوست بكتبة

تحياتى يا سيادة اللواء


--------------------------

hannoda

اقولك انا بقى فهمتها ازاى

هما اتنين قرروا فى لحظة ميعينة انهم يبقوا شى واحد كيان واحد وكل واحد بقى يدى اللى عندة للتانى

وكانت نتيجة المعادلة جزى قابل للانشطار لجزئين كل جزء مختلف عن التانى


سعيد بجد بتعليقك وسعيد بتدوينك



----------------------------

ذو النون المصرى

بجد الحكاية دى مش خيال علمى ولا حاجة

انا ضييعت وقت كتير عشان اثبت صحة النظرية دى وساعات احسن انى فعلا وصلت للاثبات وساعات احس انى لسة نونو اوى فى البحر دة

لو فاضى ايدك معانا


انا اكتشفت مدوناتك قريب وبصراحة انبهرت بمحتواهم


---------------------------

اقصوصة


نفس الاحساس اللى عندى عندك

بس هى العلاقة مش بينا وبين ايام الدراسة

اكتر ماهى بينا وبين طموحات الدراسة والاحلام اللى اترسمت على كل تختة قعدنا فيها


كل سنة وانت بصحة وسلامة

alshared said...

كثيرا ما يحدث
أن أقابل صديقا قديما
ربما لم أعره أهتماما
وربما شعرت أنني ملكت القمر

.
أعتقد أنك ملكت القمر
.
.
مصافحه أولي لحرف المتميز للغايه

دمت بكل الود

Ahmed Al-Sabbagh said...

كل سنة وانتم والاسرة بخير

SLVI said...

لو فيه كلمة أحسن من (( الله )) كنت قلتها ....

الله