Pages

04 October 2008

ازايز الاحلام






مفتتح :


سرقوا الضحكة ... عبّوا الخوف جوة أزايز الأحلام

قرب وإسال .... يا اللى لساك قادر تحلم

قولى يا عمّو الحلم بكام

إرفض وإخلع

كل مظاهر جهل العالم

إشخط وإنطر

وإعلن رفضك للتطبيع

ويا قانون الخوف الازلى

ضاع من عمرك عمر بحالة

شايف ضعفك وانت قوبالة

وازاى ساكت ؟ !

فاكر صورتك

لما اتسرقت منها ألوانها

متبقاش غير ابيض واسود

فِكرك لية ؟

لأجل ماتحزن

وف ضلمة حزنك ترجع تحزن

تكبر جوة ضميرك عتمة


تفقد شوفك

تخبط تكسر

تقلع شجرة حلمك منك

تصبح بوّر

جواك ساكن شىْ مكسور

مسجون حلمك فى البتارين

عاجز وسط احلام تانين

واحد يضحك

واحد يغمز فى استخفاف

واحد يسال

عموً يا عموً

قولى بسرعة الحلم بكام


10 comments:

OldCatLady said...

أوبااا....
حلو اوى أوى تشبيه أزايز الأحلام ده

على قد اللى معاك ..على قد حجمك فى المجتمع من وجهة نظر مصنفينه هتاخد ازازه...ممكن فاضية...نص مليانة..مليانة ( بس مش لينا)...أو بلاها ازازه خالص
بس القضية بقا مش ان عمو هيقولك الحلم بكام و أنت هتدفع اللى هيقول عليه

لا ده عمو هيقول التمن و هتدفع أكتر منه و هتطلع من الصندوق بلا ازازه

الا اذا.....

تسلم بجد...رائع جدا جدا

هبة النيــل said...

قولى يا عمّو الحلم بكام


عجبتني أوي أوي أوي دي

بس واضح ان تمنه دا غالي علينا أوي

أرق المنى

بنت الصالحين said...

جواك ساكن شىْ مكسور


مسجون حلمك فى البتارين


عاجز وسط احلام تانين


واحد يضحك


واحد يغمز فى استخفاف


واحد يسال


عموً يا عموً


قولى بسرعة الحلم بكام




حلوي اوي دي

الحلم بكام


بس ياتري حتي لو دفعت تمن الحلم هتحصل عليه برده

مؤمنه said...

السلام عليكم ورحمة الله وبركاته
مين يقدر يسرق مننا ضحكنا واحلامنا
عارف مين بس مش يسرق لا ينهيها هو الموت
امتى نبطل نحلم لما نموت هنا توصل الامانى لمنتهاها
ما حدش يقدر يمنعنا من الحلم ايحنا الى نقدر نمنع نفسنا لما ما نحلمش
حياتك انت حر فيها عيشها زى ما خيالك استهوى ازاى يعيشها



كل سنه وحضرتك طيب ورمضان كريم تقبله الله منا ومكنكم والمسلمين اجمعين وبلغنا اياه امن شاء الله
والسلام عليكم ورحمة الله وبركاته

فوكيره said...

"
عاجز وسط احلام تانين

"

كلمه سمعتها وسابت فيا اثر ... لو محلمتش لنفسك
هتبقا جزء من حلم ناس تانيه وبردو هتتعب

!!

عندى ازايز ميانه احلام ... محتاجه تفور ويخرج اللي جوها على السطح ...

تعليقي اسقاط شخصى على بوست
عجبتنى اووي طريقه التعبير فيه

key of life said...

"جواك ساكن شىْ مكسور"
لأ دى اشياء
احلامنا حلوة وجميله واحلي ما فيها ان نصها مستحيله
بس يا تري لو حتى دفعنا واشترينا احلامنا هنبطل نحلم !!
تقبل كل احترامى للمدونه الجميله
سلام

Desert cat said...

الحلم = عمر كامل

Unknown said...

أنا أسعد و الله :)
بتتكلم عن الأحلام ؟؟
الزمن دة الأحلام فيه غرقت في عبارات ..
و على سواحل ايطاليا و اليونان..
أحلام ايه؟
أحلام لقيطة !!
مش لاقية حد يحلمها ؟؟
صدقني..
الزمن دة زمن اخطف و اجري..
مش زمن الاحلام ..
للأسف.
بعيد عن كل دة .. النص جميل.. جميل جدا.

Unknown said...

صيدلانية مطحونة


الا اذا ..........


وإعلن رفضك للتطبيع

ويا قانون الخوف الازلى

الحلم لو بقى لة تمن يبقى حلم ميت مفقود

واهلا بية فى بحر الظلمات

تسلم دماغك اللى قرت كلامى


----------------------

هبة النيل

عارف اللى ميتقدرش بتمن يبقى هودة الحلم اللى ماشى فى سكتة صح

اما الحلم اللى لة تمن فاكيد صاحبة هايبان ارخص منة وهايجى غيرة يخطفة منة


واللى ارخص من حلمة اكيد مش هايقدر على تمنة

Unknown said...

عاشقة الفردوس

لو دفعت تمن الحلم هاحصل على حلم حد تانى

مفيش حد بيشترى نفسة ممكن تشترى غيرك



----------------------------

مؤمنة

الموت هو الشرط الاهم فى الاتفاق

عارفة كنت قريت كلمة لجبران خليل جبران

مش فاكرها بس المعنى انة شبة الحياة ببحيرة المية فيها مستقر لما جينا بقى احنا للحياة اللى هيا البحيرة ازعجنا صفحات المياة وبدات تهتز وطول طريقنا للقاع واحنا مستمرين فى عمل امواج بتبتدى كبيرة لحد ما تصغر
لحد مانوصل احنا للقاع ونصبح فى سكون تامعارفة المفارقة اية

انك وانتى بتقاومى مية البحيرة مش بتلحقى تشوفى نتيجة عملك دة

طبعا مفهمتيش حاجة

ودة لانى مش عارف افهمك

اقولك

كل سنة وانتى طيبة

--------------------------

فوكيرة

اسقاطك الشخصى واسك ايد اسقاطى الشخصى بردوا وبيحاولوا يخرجوا من البتارين

اسقاطات مع بعض بقى

منورانى


------------------

key of life

وهو الحلم يبقى جميل الا لو كان فية نسبة استحالة

نحلم بمزاجنا بس من الاحلام ما قتل

ممكن بسبب الحلم

تصبح بور جواك ساكن شى مكسور


---------------------------
قطة الصحراء

بصى عاوز اقول مقولة جبران خليل جبران اللى كنت عاوز اشرحها ل مؤمنة بس معرفتش

بس كان فيها نفس المعنى


------------------------
شيماء على

بلاش تخلى حلمك يتسجن فى بترينة ويجى اللى معاة فلوس او اللى بيعرف يخطف ويجرى ياخد حلمك


حتى لو كنا فى زمن الاحلام اللقيطة


بس خلاص