Pages

28 July 2008

السقا مات







السقا مات ........ السقا مات

فى ركنة البعيد الهادى

وارتفع

صوت الاعادى

وبان اوى بعد الرحيل

مين ولية

مفيش دليل

كل الحقايق مطمسة

زى الضباب ؛

بعد الطوفان

مفيش طريق

كل الجرايد صممت

سبب الوفاة

كان ثقب فى جدار إربتة

ادى الى تسرب قطرات الحنين

مخزون حياة العطشانين

للذكرى أو كلمة أمل


الكدب مشموم فى الخبر

طلق الغبا مسموع اوى

بيعلن ميلاد اول

غبى

بعد ما مات السقا مات

طب سين سؤال

ابن مين هذا الغبى ؟



فى البداية

نفس نقطة النهاية

دايرة طموحنا الضيقة

اليك يا سيدى مطلبك

هذا الغبى

سليل عائلات الضمير

لما انحرف

ابن السِبات ....... ابن الهِرم

ابن تعابير الالم

اللى اترسم

بفعل معزوفة بلاهة

على سمع كل اللى اختشوا

او مختشوش

فى الحقيقة ........... وبدون رتوش

هذا الغبى ...... ابن كل الاغبيا

اللى استقروا فى حزننا

ونقشوا على جدار ضعفنا

لوحة مالجهل المبين

بركات جراحكوا يا حزنانين




والسقا مين ؟؟؟

السقا بحر مالحنين

ع .. جبينو منقوش اليمين

وف ... قلبة مفتوح المزار

لية طوبة

فى اساس كل دار

السقا بيحب النهار

سجين فى صالة الانتظار

لكنة رافض الانهيار



عبى روحة فى ازايز

من غير علامة مسجلة

لاجل ما يسقى العطاشى

ويصد موج المهزلة



تقصد تقول انو انتحر

السقا بيحب الحياة

ناياتى سارح فى البلاد

بيغنى للخرص الحكاية

فنان وداير عالمسارح

فى كل انحاء الوطن

وف كل ودن

يقول يا ناس

انا اسمى فجر

واستنى يسمع يوم ادان

ومجاش ادان

لانو فجر ملوش ادان




يبقى مات والموت قدر


والفكر برضوا مات قدر !


السقا مات والموت قدر

والفكر برضوا مات قدر !!

وف البداية نفس نقطة النهاية دايرة طموحنا الضيقة

والسقا مات والموت قدر

والفكر برضوا مات هدر


يوووووووووة اقصد قدر


طلق الغبا مسموع اوى بيعلن ميلاد اول غبى

والسقا مات والموت قدر

والفكر برضوا مات قدر







28 comments:

Che_wildwing said...

كان مات قدر
كان مات هدر
أهو برضه مات زي البقر

د/اجدع بنوته said...

بصراحه اروع ماكتبت

واروع ما قرات ليك

تحياتى .......

عروسة ننوسة said...

بجد الكلام معبر جدا ....بشكرك على البوست
تحياتى

كراكيب said...

والسقا مات والموت قدر
والفكر برضوا مات هدر
يوووووووووة اقصد قدر

طول ما انا عمالة اقرا اخد كوبي اقول هي دي اللي هحطها في الكومنت
ألاقي جملة تانية غيرها احلي اقول هي دي بقى اللي هحطها,, لحد ماوصلت للآخر وعجيبتني الحتة دي اوي اوي زي كل الجمل اللي فاتت اللي معرفتش اجيبهم كلهم

اول مرة اجي عندك
وقريت دي و خريطة الروح
وبصراحة انت هايل جدا
ولولا اني عايزة انام اوي كنت كملت قراية,,,
اصحى بس واقعد اسنتف بقى في البلوج

miro el niro kwaniro

ركن الدين said...

انبهاري فاق كل تصور لي أن اخط نقد
---
سرحت معاك بكل إحساسي
شعرك عالي اوي ف العاميه وليه موسيقى بترن ف الودن
وفلسفه ضمنيه خطيره كانك بتقول مقال ف شكل طلقات شعريه عارفه شكتها تمام زي السهم الموجه الذكي
--انت حد عارف هو عايز يقول ايه
وعنده ملكه التعبيره الصارخه
---
ربنا معاك
حقيقي فرحت بيك
سلام

نونو said...

يا سلام على البوست الجامد
حلو اوى
دومت مبدعاااااااااااا

مؤمنه said...

22002@yahoo.comالسلام عليكم ورحمة الله وبركاته
شكرا على تصويرك لأعداء الخير والنجاح بالغباء كلمة ما كانت لتكون الا ليهم
عجبنى اوى الوصف المفصل للغبى وللسقا والمغزى من وراء هذين الرمزين
بوست اكثر من رائع
وفى انتظار المزيد والمزيد
دومت بخير
والسلام عليكم ورحمة الله وبركاته

حمامة said...

يمنع منعا باتا التعليق اذا كان بنية تسجيل حضور و السلام او كان بغرض فتح باب للمجاملات لا يتسع لها تفكيرى الذى يعانى بطبيعة الحال

علشان الجملتين دول
اقولك انا مش فهمت اوى
اصل انا فهمى على قدى :D

بس انا جاية اقولك انى زعلانةمن حضرتك جدا طيب قولت عايز فترة توقف
مش لما ترجع تكح او تعمل اى منظر

هاقرا تانى يمكن افهم :D

هبة النيــل said...

مخزون حياة العطشانين

للذكرى أو كلمة أمل


الكدب مشموم فى الخبر

طلق الغبا مسموع اوى


فعلا احلى حاجة قرأتهالك

فوووق الرااائعة

حائر في دنيا الله said...

الموت قدر
نعم
الغباء قدر
لا اعتقد


ربنا يشفي البعدا

Desert cat said...

السقا دا كان ميلاده حزين
ولما كبر كان الشقا هد التعابنين
عاش على الظلم ووهم السنين
استنى الفجر يتولد
عمر الفجر ما هيتولد
بين ايدين عايشه لقتل بذرة اول جنين

Saydalanya Mat7oona said...

السقا مات ....السقا مات

فى ركنة البعيد الهادى

وارتفع

صوت الاعادى

وبان اوى بعد الرحيل....

تعرف...حاسه فيها بنفس احساس حسرة أحمد فؤاد نجم لما كتب جيفارا مات

سبب الوفاة كان ثقب فى جدار اربته أدى الى تسرب قطرات الحنين مخزون حياة العطشانين للذكرى او كلمة أمل ....مصدقاها جدا...وصف سهل جدا و رايق قوى ميطلعش غير من عندك أنت بالذات...وصفت الحال ان كان للأشخاص ولا للبلد فى ضربة قلم....بجد أحييك على الوصف ده
طيب سين سؤال....
ابن مين هذا الغبى ؟...أعتقد انه بصورة أو بأخرى ابن غير شرعى لعلاقة الشعب بالنظام ...بالحكومة...بنفسه

فى البداية

نفس نقطة النهاية

دايرة طموحنا الضيقة
مليش تعليق عليها غير انها عبقرية فعلا

الموت هدر هو القدر يا عزيزى

ارجع و أقولك تالت بيفكرنى أسلوبك بصلاح جاهين...بس انا شايفة فيه المرة دى تراكيب و تعابير رائعة...حسيت ان ده عقلك أنت و تفكيرك أنت

فرحت جدا لما لاقيت عنوان البوست السقا مات...عارفة انها خدت منك كتير و انك بتحاول تكملها من فترة...سعيدة بيها جدا لأنها خرجت أخيرا للنور...و بالفعل خرجت رائعة

خالص تحياتى

سلامات يا فنان

واحد مش فاهم حاجة said...

فى البداية

انا اسف جدا انى اتاخرت فى الرد


عارف انك هاتسامحوا



Che_wildwing


اهلا يا باشا

قدر هدر اكيد كان فى ناس هايحزنها موت السقا

وهايجى من بعدة واحد تانى يختار يكون سقا

وموتة رغم كل اللى حاصل هايجى يوم ويبقى حياتة وموتة اثر


منورنى


---------------------------

اجدع بنوتة

شكرا جدا جدا

وانا برضوا حاسس انها احلى حاجة كتبتها

ويارب من احسن لاحسن

متغيبيش عن المدونة تانى

تحياتى


------------------------------
عروسة ننوسة

اهلا بيكى هنا
وشكرا اوى على رايك

ويارب البوست الجاى يعجبك اكتر


------------------------------
كراكيب

اهلا بيكى يا ميرو فى اول زيارة

سعيد اوى ان البوست لاقى اثر حلو عندك

انا بجد تعبت فية وكنت خايف اوى ميطلعش حلو

بس كدة فل والحمد لله عجبك وعجب باقى الناس اللى قرت

ويارب تكونى سنتفتى براحتك والكلام عجبك

--------------------------------

ركن الدين

سعيد اوى بوصف مقال
لانى فعلا كنت عاوز اخرجة بصورة مقال

احط فية افكار كتير بجمل قليلة

ابين فية فكرتى والاقى اللى يناقشنى فيها

بجد سعيد بوصفك للكلام

وسعيد اكتر باعجابك بية
ويارب اكون دايما عند حسن ظنك

ومستنى تعليقك فى كل بوست باذن الله


-----------------------
نونو

ياسلام على تعليقك

ويارب من احسن لاحسن

منورة


---------------------

مُزمُز said...

جميل

كل الحقايق مطمسة
ايوة جدا جدا جدا

مجرد رايي الضئيل ان النص طويل شوية
عامة ده شعوري الشخصي بعدم حب التطويل اصلا

ده لا يمنع اعجابي بفكرته وجمالياته
لكن اذا كان يجب التطويل
يبقى احتاج حذف وعدم تكرار
مقصدش وجود تكرار كتير في النص
اقصد بشكل عام

وبشكل عام برضه
لغتك وصورك بتاخد خصوصيتها اوي اوي

يا باشا
استمر
وانا مستني منك دايما الاجمل

......

مجرد ملحوظ على الكومنت اللي فات ملهاش علاقة بقصيدتك اللي انا قايللك لسه ان ليها خصوصيتها

انا مبحبش فؤاد نجم اوي الحقيقة
اي شاعر هيبقى احسن منه لو تجنب المشي على خطاه

:))))

NilE_QueeN said...

ممكن سؤال وجيه

هو مين السقا دا ؟؟

زى الهوا said...

جمييييييييييييييييييييييييييل اوى , رائع بجد , عجبنى اوى وصف السقا والغبى , وعجبنى كمان العنوان جداااااااا

واحد مش فاهم حاجة said...

مؤمنة

انا اللى سعيد جدا انى قدرت اوصل بالفكرة وانها تعجبك

كنت عاوز اخوض شوية فى الوصف للنوعين بس

خوفى من الاطال هو اللى منعنى واعتقد كدة احسن

انا اللى هابقى اسعد لما اكون من مزيد لمزيد كويس

منورانى

-----------------------------
حمامة


اممممممم كنت عارف ان الكلمتين دول

عاملين ليا صورة كدة واخد مش طايق نفسة وبتاع

بجد انا مقصدش كدة خالص

وعاوز اتاسف جدا على خطاى انى معرفتكيش برجوعى

وبعتذر على تعثرى فى توصيل الفكر

انا كنت بعبر عن السقا اللى هو اى انسان بيحمل للناس علم او فن بينتشلهم بية من الوقع فى افكار غبية

وصفت فكرتين وحاولت اعبر عن الصراع اللى مابينهم

وحاولت اتوقع نهاية او حل

بين رابطة السقايين و الاغبيا

بكرر اسفى


----------------------------

عاشقة الوطن said...

السلام عليكم

ازيك ايه اخبارك

السقا مات
جميلة اوى
وفعلا
"والسقا مات والموت قدر

والفكر برضوا مات قدر"

تحياتى

صباح الصباح said...

البروفايل شديييد.. انتا كمان بتحب حميد؟
احييك اوى اوى

قهوة بالفانيليا - شيماء علي said...

جميلة أوي أوي أوي ..
طريقتك في الكتابة جميلة فعلاً ..
انت مختلف.. ليك خط لوحدك ..
خليك كدة .. و ماتتأثرش بحد ..:)

3ala asm masr said...

حلوه اوى قريتها تلات مرات
وكل مره اقف عند السقا مات والموت قدر
والفكر برضوا مات هدر
يووووووه اقصد قدر
كتير اوى فى حياتنا حاجات بتروح هدر

Nada said...

بوست جاااااامد
ما شاء الله

مؤمنه said...

السلام عليكم ورحمة الله وبركاته
ايه يا استاذ مصطفى جديدك وحشنا هو صحيح الموضوع يستاهل يقعد اكتر من كده بس مش قوى كده
عل المانع خير
دومت بخير
والسلام عليكم ورحمة الله وبركاته

المهاجر الى الله said...

ادعوك لزيارة مدونتى المتواضعة والمساهمة بارائك وتعليقاتك
www.eyuon.blogspot.com
وشكرا

اجري على الله said...

سلام عليكم
فكرتني بمحمد السقا شهيد جامعة الاسكندريه
اللي مات بردو قدر وقالوا عليه جاني
قصدي اللي اتقتل قدرا

تمنياتي لك بالتوفيق
الشاعر ابن هلال

بسنت said...

السقا كان ممكن يعيش ويموت قدر بس مش هدر
هو بايده يدى اللى يستاهل ويمنع عن الغبى
لان الغبى مش ابن حد معين دا ممكن يكون ابن اى حد عايز يكون كدا

النص فيه فلسفه بالرغم من لغته السهله الجميله

عاشقه الفردوس said...

بتعرف تدمج واقع بخيال ازاي

الله اكبر والله مش بحسد بس بدخل عندك علشان اطلع مندهشه

واحد مش فاهم حاجة said...

انا اسف جدا جدا جدا

ويمكن اول مرة اعملها انى اتاخرت كدة فى الرد على التعليقات

وسعيد جدا بكل تعليق وكل واحد عجبة الموضوع

عاوز اقول حاجة لمزمز

يمكن انا برضوا حسيت بطول النص وانا زيك بضوا مش بفضل طول النص

بس انا فعلا حسيت بصعوبة انى اخرج بالنص صغير من غير ما اوصل الفكرة

كنت عاوز احط زى تعريف او مفهوم لكل طرف من الاطراف

ودة اللى اخد منى كلمات كتير

وكمان كنت عاوز ابرز النهاية اللى هيا نفس النهاية المتكررة


سعيد اوى بكل الاراء والنصايح