Pages

02 November 2007

تفريغ الطاقات السلبية

محتاج افضى كشكولى
من الكلام
اللى كتبتة ومحطيتوش على البلوج
عشان اكتب شى جديد
واعبر عن معانى جديدة
بطريقة جديدة



حالة



شعر هايش كالكنافة
وجسم وكلاة النحافة
ووش مليان بالشقوق
وعيون بتحلم بالشروق

جلجلت شعرى
بلبس شرابى
ريحة العفونة دوختنى
وفيها اية؟
لو البس الجذمة
من غير شراب
زى معنى
حبى للمشى
فى الضباب
شى غريب
عيونى محاوطها السواد
دة حزن ولا
من كتر شوفى للضباب
مش هاتفرق
المهم
الجذمة مليانة تراب
من كتر لفى
فى الشوارع
ببص فى عيون كل البشر
على معنى فضلوا
يقولوا راجع
قالوا هايهدى المواجع
قالوا هايطفى الشجون

ولسة تاية فى الشوارع
ولسة تايه فى العيون

والجذمة تتعفر تراب
والعفونة تلزق فى الشراب
وعيونى محاوطها السواد





بلدنا بتتحرك




واحد قهوة يا جابر
هات الشيشة يا صابر
خلينا نشوف الحاضر
ونمخمخ ويا المستقبل


دة الجبر طريقى وهندستى
والصبر حياتى ومدرستى
والحلم بيندب على حوستى
وانا قاعد فى الليل بستهبل

منقوع فى الكوسة و موكوس
وشعارى منحوس منحوس
احلامى مرمية فى كوز
والكوز بيقولوا مخروم

لو اسال ميين خرم الكوز
يقولولى الريس خرمة
لية تخرم كوزى يا رايس
دة انا ماشى جنب اللحيط
قاعد عالقهوة بشيش
وفكوزى احلامى محيط


من خرم الكوز راح نعبر
كلنا سوا للمستقبل
وبلدنا يعينى بتتحرك
وانا قاعد عالقهوة استهبل






بحلم


بحلم اكمل الغنوة
واطرد حزنى من راسى
وامسح دمعة ورا دمعة
وادفن برد احساسى
واخلع نفسى من يائسى
والبس توبى وانا راضى
واقول الكلمة ترسمنى
شعاع ضى
فى ليل عاتم
لكن برجع اشوف نفسى

اقوم
شاتم
والعن كل ليل عاتم

بيزرع فينا انات
ويزور لينا حكايات
ويزرع شوك فى ايامنا
ويسرق مننا الاوقات

لو اعزف لحنى بسكوتى
بشوف بين النغم الوان
واسمع فيها صوت خوفى
ونشاذ اليائس
بين النغم بيبان

وبحلم اكمل الغنوة
واطرد حزنى من راسى
وامسح دمعة ورا دمعة
وادفى برد احساسى

21 comments:

عصفور المدينة said...

يا عم والله فاهمين
جمعت التنكيت والتبكيت
شكرا لقلمك الرايق

Hadota ... حدوتة said...

ايه الحلاوة دى
فنان بجد
انا اول مرة ازور المدونة وحبتها جدا

كل دا فى الكشكول بتاعك؟؟؟
طب يللا الحق اشترؤى كشكول جديد عاوزين من دا كتيييييير

:)

تحياتى يا عم المبدع

الحمقاء المضلله innominate x said...

يا عم انت عندك موهبة الزجل كويسه جدا

max.adams said...

أنا فعلا دلوقتي مش فاهم حاجه

اذا كانو خبطتين في النافوخ بيوجعوا فمابالك بتلاته من بقك الكريم

التلاته بجد مالهمش حل

NilE_QueeN said...

وبحلم اكمل الغنوة
واطرد حزنى من راسى
وامسح دمعة ورا دمعة
وادفى برد احساسى

اهى احلام شعب ف بلد منحوس

كلامك جميل
حاول تشحن الكشكول الجاى بحاجات اجابيه واكيد هتلاقى

Unknown said...

عصفور مدينتنا

شكرا ليك انت على مرورك الرايق والهادى والجميل

ويارب ميكونش فى تبكيت تانى
ونقضيها تنكيت على طول

تحياتى

Unknown said...

حدوتة

الحلاوة من عندك

فى مدونتك عالرف اليمين هاتلاقى شوال مليان حلاوة

مدونتك

جميلة اوى عجبتنى جدا

بالنسبة للكشكول
انا قدمت على طلبية كشاكيل

من الصين
هاتجيلى مع والواد هانج يانج اللى بيشتغل فى البريد

Unknown said...

اللى مش محمقاء واللى يقول غير كدة
هاقطع رقبتة

انا على فكرة وبصراحة معرفش الفرق بين الشعر والزجل

ومش بعرف افرق بينهم

يمكن انتى قصدك على

بلدنا بتتحرك

انا كنت عاوز اقضيها سخرية عالمدارى
عشان كنت ناوى ادخل مسابقة الشعر فى الجامعة
بس معرفتش اقضيها عالمدارى
فقضيتها عالمكشوف

تحياتى على مرورك الجميل

Unknown said...

ابو الفناكيش

على رايى المثل
العيار اللى ميصيبش يدوش

يا عم ادهم بتحرجنى انت كدة

طيب انا ارد ازاى دلوقتى

وبعد كدة لما تحط رد كحرج بعد كدة

لازم تسيبلى فى المدونة علبة مناديل
عشان العرق مع الاحراج وحش


تحياتى يا باشا

Unknown said...

NilE_QueeN

الكشكول علشاحن يا فندم

بس خايف تحصل قفلة

خصوصا ان زيارتك للمدونة
بتعمل زيادة فى الاضاءة
فبتاثر عالكهربا

بس لازم تزوينا كل يوم
وميهمكيش الكهربا

صاحب البوابــة said...

حقاً أكثر من ممتازة

كلمات القت بظلال الواقعية على معانيها

تحياتي عزيزي

Ana keda said...

بحب اوى الحالات بتاعتك

بجد انت حد حلو اوى وشعرك حاجة حلوة

وربنا يعلى قلمك وانا عارفة انى مقصرة معاك بس عارفة ان اخويا هنا ومقدر كل الى انا فيه

بس خلاص

حائر في دنيا الله said...

جميل
ورائع
بس قولي
الكشكول دا بسلك ولا من غير
اصل تفرق كتير في القصد
:)


لك تحياتي
السلام عليكم

loumi said...

العزيز
إللي فاهم كل حاجه

جميله محتويات كشكولك

الكلمات بسيطه بتتوصل للقلب بسهوله


تحياتي

Unknown said...

صاحب البوابة
اظن اى حد بيكتب دلوقتى
لازم يروح للواقعية
لان الهروب منها بقى شى صعب
الواقع بيصدمنا حتى فى احلامنا

مرورك اسعدنى

Unknown said...

ana keda

والله من ناحيتى مقدر جدا
ومع انى مش راضى عن الحالة اللى باينة على صفحات مدونتك

انما من الناحية التانية
اللى هو راى مدونتى ذات نفسها
لازم تخدى رايها فى غيابك دة
المدونة ياعينى

قعدت تسالى هو التاية واللى غايب نلبسلة اية
ولما يائست من اجابتى

لبس زى مانتى شايفة

Unknown said...

حائر

انا فاهم قصدك

انت تقصد لو بسلك
كانت حدود الخيال هاتتحدد بالسلك دة

انا عاوز اطمنك واطمن كل الشعب المصرى

الكشكول من غير سلك

بقالة 26 سنة

مش عارف لية الرقم دة بالذات

بس اهو حبة تنفيس

تحياتى

Unknown said...

loumi

الجميل هو مرورك

ورايك اللى بعتز بية

تحياتى

وابعتى سلامى
للقمر وجيرانة

مؤمنه said...

السلام عليكم ورحمة الله وبركاته
يا جماااااااااااااعه
لما قولت اختار الاسم دى بيخاف من الحسد ما غلطش
ايه دى هو حضرتك تغيب تغيب وتفاجئنا كده
طب ما فيش تمهيد مسبق
يالا ما يجراش حاجه
بس ياريت حضرتك الكشكول القادم يكون فيه طاقات ايجابيه
حاول تدور ان شاء الله تلاقى
عايزين نفرح شويه باءه
ولا ايه
وحمدلله ع السلامه ولو انها متأخره تلات شويات
والسلام عليكم ورحمة الله وبركاته

Unknown said...

فعلا متاخرة حبة شويات
بس نظرا لشرف مرورك قررنا العفو عن التاخير

دة لانك لازم تزورى المدونة عشان يبقى لها جديد

ويارب يكون الكشكول الجديد كل ايجابات

بس منين يا حسرة

اجيب منين ايجابيات

سعيد جدا بمرورك

OldCatLady said...

و تقولى مش فاهم حاجة؟؟ :)

مبصيتش ع البلوج بتاعك بقالى زمن...و لقيت شوية حاجات بصراحة ملهاش وصف...بجد هايلة أوى...البوست ده ملوش حل..و بعد يوم طوييييييل ملوش حل نجحت فى رسم ابتسامة على وشى ....شكرااااااااااااااا