عالهامش
عايش وبعانى
احاسيس الحزن بتغوينى
دمعات الفرقة اللى فــــــــ قلبى
بتغير شىء من تكوينى
قوانين الهامش
عرفية
طالبتنى بتصريح متوثق
من حاكم ارض الاشواق
لاجل اعبر
واهرب من خوفى
وذكرى
واستوطن ارض الاحياء
تفتكرى لو يرفض هاخضع
للهامش
وقانونة العرفى
راح اراجع تاريخى السابق
قبل طوفان الحب الاول
اضراب العشاق التالت
لما افتكروا العشق مسالك
لبلوغ النجمة المجنونة
يا طبول الحرب يا ميمونة
عاوز اسمع دقك من تانى
اللى معايا
يكسر صمتة
ويقول باطل
كل اناس الهامش هبوا
وقولوا ورايا
الهامش باطل
مولاتى الحسناء فى الهودج
هل لى ان امحو
تلك البسمة
اللى عشقتك
لاجل دلالها
بعد طوفان الحب الاول
واتلو عليكى بيان الثورة
حبك باطل
يا مولاتى
التوقيع
واحد من ارض الاحياء
27 comments:
هل لى ان امحو
تلك البسمة
اللى عشقتك
لاجل دلالها
بعد طوفان الحب الاول
واتلو عليكى بيان الثورة
................
عجبني قوي المزج بين بعض المصطلحات السياسية البحته ...مع المشاعر والحب
القصيدة يبان ان هي سياسيه ..مش عارف لما قارتها افتكرت أغاني منير
لكن انا ماعرفتش اربط بين حياة الهامش ..والحب والحبيبة
مع انه المفروض يكون دافع مش العكس..لانثور عليه
.........
على فكرة ان بلدياتك ..أتمنى التواصل
يعني التدوينه دي
بتحسسني بمليون حاجه
كل كلمه بحس لها دلاله مختلفه
مهما يكن مافهمته من الاستاذ مش فاهم
الا اني بجد مذهوله من روووووووعه التدوينه دي بالذات
رسملى الدنيا ع الورقه
موجة احلام
و قاصد يخدع ايامى برتوش اوهام
لكنى لكدبته صاحى
و لسه بداوى ف جراحى
فقررت اسكن الهامش بلا اوجاع
و لا نقابل
و لا نفارق
و لا ننباع
و يبقى القلب نخاسى
و اكره دنيتى و ناسى
سكنت الهامش المرسوم طريق ضيق
لقيت الناس تبص عليا تتريق
تقول مجنون ليه بتضيق
و ادامك ده كون و براح
و مين مرتاح
سندت الامى ع الحيطه اللى كت جنبى
لقيت الذكرى طفل و جاى لى بيحبى
و تضحكلى ..
براءة وشه الظاهر
و ده الظاهر
و فجأه الوش يتغير
و يطلع م الحيطان مارد
يقول ممنوع تكون شارد
و تنسى الصوره م الماضى
لهيب الامس جوا القلب مش هادى
يكون الهم شىء عادى
و يبقى لسكتى فارش
اكون عايش
و مش عايش
و بتضيق سكنة الهامش
***************************
سامحنى انى افتكرت شوية كلمات ( على الهامش ) و كان عنوانهم على الهامش
راى صغير
عجبنى اوى اوى النص العامى
و الجمل الفصحى اللى فى الاخر كان ممكن يتحطوا لوحدهم بفاصل
بجد عمل جميل جدا
على هامش ثورتى والدمع ...
بعلن لك ..
مافيش اوجاع
دا قلبك ضاع
يوم فكر .. يخاصمنى
و تألمنى ؟؟!!
و تزيد القسا و اللوم ..
و تحرمنى !!
صدقنى ابتديت اقدر
ومش هرجع انا و اسهر
ويا الشوق يعاتبنى..
وع الهامش
خسرت كتير !!
*****
بوست رائع .. ومن غير مااشعر طلع منى الكلام .
human
منور يا جميل
مش عاوز اضحك عليك واقولك اة انا حاطط فيها معانى سياسية والمعنى فى بطن الشاعر
بس انا كتبتها كدة مقصدتش فيها معنى متدارى
بس لما خلصتها وقريتها
منكرش انى حسيت شوية فشخرينة من بتاع الزعماء دى
اقولك احلى حاجة الشعر انك تاخدة بمزاجك
والحمد لله انى قدرت اخاطب مزاجك
------------------
انت بلدياتى
يبقى اضربلك السلام المحلاوى
تحيا سندوتشات البغل
وتيفا لا
لا
وتحيا العربيات الاصفر فى كحلى
ابيض فى اسود لا
منور يا جميل
وانا اكيد هاسعى للتواصل
منورنى
عاشقة الفردوس
مليون حاجة يعنى مليون مزاج
انا معملتش حاجة فيها ابداع او خارقة للطبيعة
كل الحكاية انتى قريتى بمزاجك
وانا كتبت بمزاجى
وانا اتمتعت بالكتابة
وانت برضوا
بس اللى فرح اكتر بيها
اكيد انا
لانها عجبتك
تحياتى
سهر
بحترم جدا الهامش بتاعك
وبعتبر الشعور دة هو اللحظة الاهم اللى هاتحدد هانخرج مالهامش ولا هانستنى فية
سعيد جدا بتعليقك
واسعد بكلماتك
واسعد برائيك
بصى
انا لما فكرت اكتبها
كان فى خيال اعمل حاجة كدة مزيج من الفصحى والعامى
دة كان غرض اكتابة فى الاساس
بس لانى لسة مش خبير اوى فى الشعر
فضلتى العامية تجرنى لحد ملاقيت القصيدة خالية من اى فصحى
فحشيتها باخر كلمتين
كان ممكن اغيرها
بس اصيرت اصيبها عشان اتعلم من اى حد يقول راية
وهابقى سعيد برايك فى كل بوست جاى
تحياتى
سمر احمد
تعرفى كان نفسى يبقى عندى الموهبة انى اقدر ارد على شعر بشعر
بشوف الحوار الشعرى دة دايما مفتوح فى مدونتك
بحس فية التعبير الابلغ
عجبتنى كلماتك اوى
واتمنى دايما زيارتك ورايك
لانة يهمنى
عشان لما اعدى على مدونتك مبقاش من سكان الهامش
بيعجبني اسلوبك وكتاباتك
بس دا ميمنعنيش اعترض على الموضوع
اسمحلى اقولك
الحب _اللى بجد_بجد جميل
كلماتك معبرة لدرجة حسيت انى واقفه قدام قاضى المعارضات
:)
تحياتى
عارف ايه الجمال هنا ؟؟
انك بتكتب بلا تصنع ..
بتكتب انت .. عشان انت . انت !!
تعابيرك كلها حقيقية .. و عشان من القلب .. بتوصل للقلب .
سلمت .
نص جميل
عجبتني لغتك جدا
وخصوصية التعبيرات والمفردات
والبناء الجميل المحكم
والتصاعد المنطقي اللي فيه لحد الوصول للنهاية الجميلة القوية
حبك باطل يا مولاتي
المتفائلة برضه الى حد كبير
تضفيرك بين الفصحى والعامية ناجح وطبيعي ومهضوم جدا ولا توجد فيه اي منغصات
والجراة اللي بتكتب بيها سبب مهم لجمال وخصوصية النص ولغته
ده غير اهم حاجة بقى
ان التعبير ده
...
كل اناس الهامش هبوا
وقولوا ورايا
الهامش باطل
...
ده ادهشني ولمسني جدا
نفسي انا كمان يا اخي اهب من الهامش
الهامش بتاع الاستعباد اللي ممكن يكون اسباب سقوطنا فيه متفاوتة لكن كله هامش وقاسي وقوانينه زي ما قلت عرفية
سعيد بقرائتك جدا
:)
بجد والله
اسوب رائع وكلمات هايله واحساس عالى
وانت فى الحقيقه مبدع
عجزت عن التعبير بمدى ابداعك
أولاً تقبل مرورى..
ثانياً تقبل تعليقى..
ثالثاً تقبل تحياتى..
ولكن الحقيقه انا حسيت بكلامك نوع من الإسلوب الناعم الممزوج بالسخريه..
مش قادره أحدد..بس فى حاجات تانيه ممزوجه فى بعضها..
وفعلاً زى ماعلق كتير من الناس..فيها شويه نازع سياسى..
الحقيقه انا متلخبطه..
ولكن أحسن شئ إنها من نوع فريد..ومعبره عن أفكار دفينه..
تقبل تحياتى..
الكلام ده ملوش مكان عالهامش
ده كلام يتبروز ويتعلق في الصالة
جنب شهادة التخرج
دمت مبدعا
ودمت مش فاهم حاجة
وتفهم ليه
اللى بيفهم بيتعب
الله عليك بجد حلوة جدا جدا التعبيرات المستخدمة فى البوست والمنوعة كمان ودة اللى خلاها مختلفة وجميلة وعجبنى ختامك حبك باطل حلو جدااااااااا
nile queen
ازيك يا ست الكل
انا مش معترض ولا حاجة
انا معاكى لاخر الخط
بس الحب فى منة حب باطل وحب بجد
زى مانتى سمتية
فى حب بيحصرنا فى الهامش وحب بيطلع للسما
هااااا تثورى على ميين فيهم
منورة
قطة الصحراء
قاضى المعارضات
بصراحة المصطلح غريب عليا
انا اعرف ان فى معارضة وفى قاضى عسكرى
انما قاضى للمعارضات جديدة عليا
يسلم رائك
ويارب دايما تبقى الكلمات معبرة
منورة
شيماء على
تعليقك وقفنى كدة لحظة اندهاش
اقولك انا اية الجمال فى التدوين بصفة عامة
انك مش مجبرة تقرى وانا مش مجبر اكتب
كل واحد بيكتب لمزاجة
انتى دخلتى وسلمتينى مزاجك
وانا مهمتى انى احافظ علية
ولو نجحت باخد جرعة سعادة عن طريق تعليقك
خايف تحسى فى تعليقى انى بتفلسف
بس مش قصدى فلسفة قد ما هى البساطة
يارب دايما تلاقى عندى كلام مالحقيقى
اللى بطلع من القلب يروح طوالى للقلب
من غير ما يخبط
تحياتى الشديدة
مزمز
متعرفش سعادتى قد اية لما لاقيت تعليقك هنا
مدونتك كهف النشوة
من المدونات اللى شدتنى للتدوين
كهف النشوة بلونها الاسود لو الذاكرة مخانتنيش
كانت هادية نوع من الهدوء اللى بيرح
بشكر جدا على التعليق الجميل دة
اللى كان زى اشارة بليغة بتقولى انت ماشى فى الكتابة صح
واتمنى بتكرار الزيارة والتعليق
حتى لو كان نقد ضدى
منور يا جميل
ويارب كل سكان الهوامش فى اى قضية انسانية
يهبوا
شكرا
مواطن زهقان
شكرا ايها المواطن
منورنى
ومبروك النجاح
ويارب من ابداع لابداع
ليا وليك
تحياتى
ميادة عمر
اولا انا متقبل مرورك وتحياتك وتعليقك من غير اى كلام وسعيد بية منك ومن اى حد فتح صفحة التعليقات وقرر يعلق
او حتى قرى ومعلقش
سخرية اة انا قصدت سخرية
نوع من الاسلحة الاخيرة اللى بتتبقى لسكان الهامش عشان يحاربوا بيها
على راى نجيب سرور
مساكين بنضحك مالبلوة ... زى الديوك والروح حلوة
كلمة ممزوجة اللى فى تعليقك بعتبرها علامة صح ليا انى كتبت احساسى
وانتى دخلتى قريتى باحساسك
اقصد انى كتبت احساس واحد
وانتى استلمتية منى احاسيس كتير
يبقى انا نجحت
تحياتى
---------------------
عالهامش
اولا وثانيا وثالثا
حسيت انى قاعد فى مكتب رئيس الوزراء
وانا محبس احس انى رئيس وزراء
لما تدخلى مدونتى تانى ودة اللى اتمناة
اتخيلى انك بتكلمى واحد قاعد بيبع طماطم فى السوق
الاحساس دة هايريحنى جدا
منورة
Che_wildwing
منورنى يا جميل
بكلامك اللى قل ودل وبينزل عليا زى البلسم
ويارب دايما مش فاهم
ويارب دايما تتمتع بكلامى
واتمتع بكلمتك اللى ابرك من عشرة
princess bery
اية رايك فى روح الثورة دى
حاجة كدة زى انا جدع
بس انا برضوا تمتعت جدا بالنهاية
بعتبر ان مفتاح اننا نخرج مالهامش
اننا نقول اسف فى التعبير
نقول لل اعور يا اعور فى عينة
منورانى
إزيك ياسيدي ...
إميلي
human_hv2010@yahoo.com
ماتنساش تضيفوا ...وأنا يسرني جداً التواصل
...
السلام عليكم ورحمة الله وبركاته
عارف يا استاذ مصطفى احسن شئ فى الحزن
انا بقول كده على اعتبار ان الحزن فيه حاجات كتير حلوة
وليه لاء ما تيجى نعتبر الحزن مصاحب للفرح عشان ما نزعلش
قولت احسن شء فى الحزن ان هو بيحسسنا بقيمة الفرحة لما تمر علينا واحده قالتهالى قبل كده لقيت كلمها صح
بس ياترى امتى الفرح ييجى
اقول لحضرتك بدام ادركنا حقيقة وقوفنا حيث كانت على الهامش
وادركنا حقيقة شعورنا حيث كان باطل
سياتى منت هنا ان شاء الله الطريق للتمركز والحق وتكن السعاده
اهنى حضرتك على هذه التدوينه الرائعه
واعتذر على طول التعليق بس حبيت اكتبه بدل ما اكلم نفسى
سؤال اخير
هو فيه حاجه اسمها حب اصلا يا استاذ مصطفى
كله بيضحك على كله واقرأ دى فى بوستى القادم
الحب فى وجهة نظرى اى كانت حالته افضل ان تقراها فى تدوينتى
والسلام عليكم ورحمة الله وبركاته
human
ازيك يا عم الحاج
انا ضيفت الميل بقالى يومين
بس انت شكلك مبتدخلش نت
لما تدخل كلمنى
-----------------------------
الاستاذة الفاضلة مؤمنة ( انتى اللى اصريتى)
حضرتك
انتى قولتى الحزن فية حاجات كتير جميلة
عارفة انا كتير كتبت فى البلوج ان الحزن علام
تقدرى تتعلمى منة لو بتفهمى اللغة بتاعتة
يمكن يكون الحزن تمن للفرح
وممكن يكون عواميد النور اللى بتنور طريقنا لسكة الفرح
انتى قدرتى تصاحبية
وظفية بقى فى الوظيفة المناسبة
انا قريت البوست بتاعك
بجد من عقلانية وواقعيتة
مقدرتش اكتب تعليق
بس اوعدك انى اعدى تانى
انتى عارفة
بحب المناقشة
شكرا جزيلا لحضرتك
:)
Post a Comment