Pages

19 July 2008

خريطة الروح






برغم عبورى بوابة العشرين عام

لازلت اقع كالاحمق

فى عشق كل فتاة

تحمل فى وجها ذاك المدعو النمش

لازلت اعتقد فية

خريطة للروح

اتحسس فية دروبها

وخباياها



برغم عبورة بوابة العشرين

لازال احمق بلا خريطة


----------------------------

احبك

وانطرد

عصفور

واسبح فى الهوا والنور


واملا الكون باغانيا

ولو كان الجناح مكسور


احبك

تستكين الريح

فى قلبى

والامانى تصيح

بحبى

واعشق التصريح

ودربى فى الضباب مغمور

احبك

تبتدى البدايات

تاخدنى ضحكتك بالذات

تعيبنى

روح وقلب و ذات

تزيدنى

كشف للمستور

احبك

ضى روحى يبان

واعبر

ضلمة الحرمان

احبك

واهجر

لعبة الاحزان

واحقق حلمنا المسحور

احبك

تستكين الريح

فى قلبى

والامانى تصيح

بحبى

واعشق التصريح

ودربى فى الضباب مغمور


على الحجار

21 comments:

محمد ياسر said...

جميلة الاغنية دى من اكتر الاغانى اللى بحبها للحجار

و كل سنة و انت طيب عقبال 100 سنة

و اسمع بقى امبارح كان عمرى عشرين

سلامات يا جميل

مؤمنه said...

السلام عليكم ورحمة الله وبركاته
بقى بعد ما مققت عنيه فى البلوج حرصا على فهمى للمعانى عشان اعلق صح
تتطلع لعلى الحجار
على العموم
كل سنه وحضرتك طيب كلمات الاغنيه جميله اوى على الحجار باءه هيكتب حاجه وحشه يعنى
دومت بخير
والسلام عليكم ورحمة الله وبركاته

princess dodo said...

للروح باب
قد يعبره من لا يحمل خريطه

ولكن لن يعبره ابداً
من خشى أن يقرعه


اقرع باب الروح
وستعبر

...


جمييييل


مودتى الصافية:)

لولا said...

كلمات جميله ومعبره

فوكيره said...

"
ضى روحى يبان

واعبر

ضلمة الحرمان
"

الجــمله دي حلوه اوي ... ضي روحي يبان ...

ممممم ...الـصوره الي اختارتها للبوست ...شدتنى
وقت طويل عدى وانا ببص في عين البنوته ...صحيح موصلتش لحاجه
لكــن اتبسطت :)

كــل سنه وانت طيب يا مصطفى

ســـــــهــــــــــر said...

البوح بوابة روح
لكن الوشوش مش دايما خريطة روح
كتير بتكون خادعه

يمكن اكون صح .. و يمكن اكون مش فاهمه حاجه .. و يمكن اكون ما بعرفش اقرا مفاتيح الخريطه

دايما هنا فكر بيعجبنى اتحاور معاه

لكن المره دى كمان لقيت اغنية على اللى بحبها جدا

واحد مش فاهم حاجة said...

محمد ياسر

انا حبيتها برضوا من ساعة لما منير غناها

يارب عقبال ميت سنة ليا وليك

بس انا لسة بدرى على عيد ميلادى

فى الاوت المرة دى يا جميل

منور

واحد مش فاهم حاجة said...

مؤمنة

اسف يا ست الكل على اللبش اللى حصل فى البلوج دة

هو غلطان على الحجار اية اللى يجيبة يكتب عندى

وكل سنة وانتى بخير وسلامة

ملحوظة على جنب كدة

على الحجار دة بيغنى

:)

شوفتى بقى

لو انتى دخلتى البلوج واخدتى الكلام

حسب مزاجك انتى مش مزاجى انا

مش هاتحتاجى تركزى

مش عارف انا وصلتلك اللى انا اقصدة ولا لا

انا اقصد انك متخليش الكلام هو اللى ياخدك للحالة اللى هو فيها

لا خدى انتى الشعر لحالتك

بحس ان بكدة متعة الشعر بتزيد

ويمكن دة اهم اختلاف بينة وبين الرواية

منورانى يا ست الكلام

واحد مش فاهم حاجة said...

princess dodo

اممممم
لاقيتنى متفق معاكى اوى

يمكن من اسباب بقاء الاحمق دة اللى بنتكل علية يعنى على نفس حماقتة

انة مجربش يقرع الباب

برغم انة بيحمل ميزة عن باقى الطارقين

انة معاة خريطة ما بعد الباب

سعدت بتعليقك

مودتى الصافية

واحد مش فاهم حاجة said...

لولا

مرور بعد غياب

منورة

واحد مش فاهم حاجة said...

فوكيرة

انا بصراحة حابب الاغنية كلها

يمكن فى جملة شدتنى اكتر من دى


احبك

تبتدى البدايات

تاخدنى ضحكتك بالذات

تعيبنى

روح وقلب و ذات

تزيدنى

كشف للمستور

لاقيتها فيها نوع من الصفاء النفسى بين الغنى او المتحدث يعنى وحبيبتة

حاجة كدة زى كل واحد يفتح كتاب التانى

براحتة


بالنسبة للصورة

انا تقريبا قعدت حوالى ساعة الا ربع

اتامل فيها

حسيتها عاوزة تقول

بس انا مش فاهم اللغة

وكل سنة وانتى بخير

بس لسة بدرى على ما السنة تخلص

عاوزين تكبرونى لية

:)

منورانى

واحد مش فاهم حاجة said...

سهر

مادام قولتى رايك

فا انتى صح صح

البوح والوشوش هما نوعا من الخرائط كلاهما

لا يحمل الحتم الرسمى

ولا يعتد بها كدليل رسمى اما قضاة الروح


يمكن يكونوا بيكملوا بعض

انا بقى مش بسمع غير الاغنية دى

بقالى يومين

عجبتنى اوى

منورانى

Desert cat said...

كل سنة وانت طيب
سعيد ميلاد جديد سعيد عليك
على الحجار انا وهو مش متفقين مع بعض اوى
لكن كلمات الاغنية هنا مختلفه
تحياتى

ســمـــر احمد said...

دوما كنت اتخيل انه فى بعض الليالى تسقط مجموعة من النجمات على وجه طفلة ...فتنتشر على وجهها .. مشيرة الى طالع حسن و بما ان النجمات يراقبها شهاب عاشق فى رحلة هبوطها .. يكون شعر الفتاة احمر ..
فليس احمق من انتظر العمر فتاه مسحورة ...
شوية حواديت كده ع الهامش ...
تحياتى

مؤمنه said...

السلام عليكم ورحمة الله وبركاته
ملحوظه كان عندى علم بانه بيغنى

ثانيا يعنى بجد مش عارفه اقول ايه جزاك الله كل خير على النصيحه دى على فكره وصلتنى فكرة حضرتك
اخد الشعر من منطلق احساسى مش منطلق احساسه هو
فكره حلوه بس افرض انا مش عايشه التجربه دى اخدها ازاى من منطلق احساسى
على العموم هحاول
هتوفر عليه مجهود جامد
بس يارب تبقى تعليقاتى مناسبه
وبراحه شويه علينا يا استاذ عامل مش فاهم حاجه
بجد احيانا بتبقى البوستات خارج نطاق عقليتى خالص قربت اشك فى نفسى
بس هعلق برده
دومت بخير



كلمه على حمب
امال فين المناقشه الى على البوست بتاعى الى حضرتك وعدتنى بيها
الكيبورد خلص حبر ولا ايه



فى انتظار البوست القادم
والسلام عليكم ورحمة الله وبركاته

ساعه الغروب said...

اقوك ايه بس ؟

اقولك انه الحماقه ما بتحلاش الا بعد العشرين ؟؟؟

اقولك انه الواحد بيبقى فى بعض الاحيان فاكر انه بيفكر بمنتهى المنطقيه فى حين انه بييبقى اخد قرار فى منتهى الحماقه واحيانا العكس بيبقى صحيح برضو مش كله هيبقى حماقه يعنى

عارف هقولك حاجه انا بعملها يمكن تكون غلط بس اهى بتنجح يمكن لانها بتبقى من القلب اوى "اتعامل بطبيعتك ومن غير ما تفكر "
ثق فى انه تفكيرك اتسستم على الصح يعنى اتعود يعمل التصرف اللائق دينيا واجتماعيا واخلاقيا يعنى زى ما بنتعلم كدا القراءه والكتابه مثلا بيبقوا حاجه جوانا ثابته من غير ما نفكر بنقدر نؤديها "اه ساعات بنهنج "بس شغال يعنى فثق فى انه تفكيرك كمان هيتصرف صح وان شاء الله بما انه التصرف خالص لله ايا كان صغير او كبير فان شاء الله هيبقى خير
:)

وربنا يكتبلك دايم اللى فيه الخير

اما بالنسبه للحجار بقى فدا استاذ بس اختيارك انت كمان للاغنيه دى بالذات بجد رائع خاصه الجمله دىىىىىىىىىىىىى

بجد حلوه اوى اوى اوى



****
ضى روحى يبان

واعبر

ضلمة الحرمان

احبك

واهجر

لعبة الاحزان

واحقق حلمنا المسحور


******

انا بجد مش عارفه اقولك غير شكرا
بجد شكرا

Desert cat said...

اصدقائى الأعزاء المدونين والمدونات
موعدنا السبت 26/7/2008 مع حلقة جديدة من برنامجنا الإذاعى
أنت تسأل والكمبيوتر يجيب
الذى يذاع يوميا الساعه 9.10 صباحا على اذاعة البرنامج العام ماعدا يوم الجمعه
والحلقة تتضمن رودو المدونين الأعزاء على بوست " حمدان وبهانة "
والتعليقات التى ستذاع
ابراهيم

محمد الكومى
سلوى سمير
واحد مش فاهم
جيهان على
دعوه للأمل
ياسر الوشاحى
امل
صبرنى يارب
استراليا
طارق الغنام
طهقاته

كما يمكنكم سماع الحلقة مباشرة فى نفس موعد اذاعتها الساعة 9.10 صباحا
من خلال موقع البرنامج
http://dear.to/cairo
تمنياتنا بدوام التواصل

Saydalanya Mat7oona said...

عبور الواحد بوابة العشرين سبب أدعى لجعل الشخص يزداد فى الحماقة...بس صدقنى دى مش حماقة..دماغ الواحد بتحاول تشيل الضغط من عليه بأنها تفكره بكل فترة انه يعمل حاجة أو يبص على حاجة هو بيحبها عشان ميطقش
تعرف يمكن تكون كل يوم بتشوف بنت عندها نمش بس الأكيد انه فى أيام بتاخد بالك فيها أكتر من غيرها...
اتكلمت كتير أنا عن النمش صح ؟؟
:))
برغم عبوره بواية العشرين لازال أحمق بلا خريطة

و أعشق التصريح و دربى فى الضباب مغمور

فيهم معانى الدنيا كلها

من الواضح انى وصلت متأخرة جدا البوست ده لسه ظاهر النهارده لما فتحت عندك...مش مريبة الحركة دى؟؟

:))
سلامات

زى الهوا said...

جلوة الاغنية دى , بس اول مرة اسمعها

واحد مش فاهم حاجة said...

قطة الصحراء

كل سشنة وانتى بخير وسلامة

بس لسة بدرى على عيد ميلادى

على الحجار كلمات اغانية جميلة اوى

بس الالحان مش فى مستوى الكلمات

منورة



-----------------------------
سمر احمد

عامى بيعجبنى كلامك

فصحى بيشدنى ويسحرنى

وبعد ما افتكرتة احمق
لاقيتة سيد العاقلين


هاستنى تعليقك كل بوست

-------------------------

مؤمنة

اممممم

يعنى الحجار يغنى ويجى الغلط عليا

ربنا يسامحة بقى :)

مش لازم تكون عايشة الحالة

ماهو الشاعر مش بيعيش كل حالة بيكتبها وانتى برضوا مش لازم تعيشى كل حالة تقريها عشان تحسيها

لا انتى بس اعملى الطريقة دى

واى تعليق هاتقولية هايبقى فى نفس اطار الموضوع

ههههه انا ماشى عالهادى خالص اهو

البوست بتاعك ملقيتش عندى افكار للمناقشة

انتى كتبتيها كلها

منورانى دايما

-----------------------
ساعة غروب

مبتحلاش الا بعد العشرين

اية الراى الصادم دة

عارفة يمكنا انا بمشى بنفس الطريقة دى

وبتبقى برضوا المحرك الاساسى لها انها طالع مالقلب

بس بتيجى لحظة عاملة زى المشهد الاساسى فى الفيلم

انك تراجع نفسك عشان تضيف للداتا بيس بتاعتك نوع جديد مالافعال الصح

ويتحول لفعل طبيعى

يااااااة هاتبقى حاجة جميلة

لما الداتا بيس بتاعت البنى ادم تتملى افعالا صح

ويوصل لمرحلة ان 99 فى المية من افعالة صح


على الحجار بتشدلى فى بعض الاوقات

كلمات اغانية عبقرية

اخدتى بالك من تعبير ضلمة الحرمان

شكرا ليكى بقى عالتعليق

منورانى دايما


:)

-------------------------

قطة الصحراء

شكرا يا ست الكل عالتنبية

هههه اسمى منور ازاى

انا للاسف مسمعتش الحلقة

حاولت بس مقدرتش

متعوضة فى الحلقة الجاية

المشمهندسة said...

كلمات حلوة جدا ... اختيار جميل
والبلوج كله عاجبنى جدا