Pages

05 April 2008

برافو يا قراقوش


tongue

بلدنا عالترعة بتغسل شعرها

يا ترى هانقدر ندفع مهرها

يا ترى عرابى جهز حصانة

وجاهز يقابل الخديوى

ويقولة لا

يا ترى لسة بنحب موال النهار


دايما بخاف اتعلق فى الحبال

مش لانى مش بعرف اتعلق

بس لانى دايما بخاف مالحبال الدايبة

بخاف اقع

بس لو بالمنطق

احنا اصلا فى القاع

ازاى هانقع



الفوضى الخلاقة


دايما كنت ببص لنظرية الفوضى الخلاقة

على انها المنفذ الوحيد اللى يقدر يعبر منة

المظلومين اللى بيواجهوا ظالمين منظمين

احساس الفوضى متوفر اوى فينا

حتى فى مبدا الاضراب

اللى اساسا بيقوم على التنظيم او الاتفاق الشعبى

صيغة الاضراب مش واضحة

حتى اهداف الاضراب مش واضحة

ودى فى حد ذاتها بعتبرها ميزة مش عيب

وكونها اتعددت

دة سببة عمق الظلم اللى احنا فية




حاسس باية ؟


فرحان اوى

مبسوط اوى


ومتحمس اوى

ومستعد استعداد تام انى اقع


متخيل انى شايف الفراخ وهى بتتنطط فى القفص

وبتبص عالسكينة

بخوف ورعب

مش عاوز اكتر من نظرة الخوف دى فى عيونهم

خـــــــــــــــــــــــــــــــــــوف


فى النهاية هاقول

برافوا يا قراقوش

كدة الاضراب نجح




10 comments:

بنت الصالحين said...

برافو ياقراقوش

طيب خبر طازة

كبيرنا عمل حاجه
والله ضربه معلم

عمل ايه بقي
بعت لكل المؤسسات والهيئات الحكوميه ان اللي هيضرب وهيغيب عن عمله اليوم ده هيتخصم منه 10 ايام ايه رايك بقي

مش ضربه معلم

هو حسبها

هما اتحركو علشان المم
خلاص نخوفهم بالمم


ربنا يرحمنا برحمته

WhatEver?!!! said...

بجد يا رب الرحمة برحمتك الواسعة

مش بس هيتخصم منة 10 ايام زى ما عاشقة الفردوس قالت
دة كمان هيتحول للتحقيق!!!!!!!!

والنهاردة عمال الغزل فى المحلة يتقبض على 150 منهم والباقى تحت حراسة مشدده!!!!!!

فى الشون فى قتلى وجرحى سمعت ان من ضمن القتلى طفل عنده تشع سنين!!!!!

وفى منشية مبارك كل سوشية تعدى دوريات الامن ويمروا على المدارس علشان يتأكدوا ان المدرسين مش اضربوا

ولسة الاخبار كلها النهاردة باليل وبكرة الصبح

فعلا بلد الحريات والكرامة!!!!!

تواشيح سياسية said...

بوست رائع

ودمت متميزا


ولا يهمك من خصم ولا غيره اضرب عن العمل وكلنا معاك ههههههه

انا اول واحد مضرب حتى ولو هموت

OldCatLady said...

مش عارفة بجد يا مصطفى
انا حاسة ان الاضراب ده منجحش اطلاقا
المفروض انه الاضراب يفضل مستمر لحد ماناخد حقوقنا....يهددونا نعند أكتر مش نطاطى
امبارح فى الجامعة نزلت عشان اشوف شكلها هيبقا ازاى مكنش فى تواجد امنى من أى نوع
دول حتى مش خايفين من قوة الشعب اطلاقا
على الأقل عندى هنا فى مدينتى
طلعولنا لسانهم بمنتهى الهدوء لأ وكمان هددونا بلقمة العيش
أعوذ بالله بجد زعلانة من اللى حصل
بس انا سمعت ان فى المحلة انتوا وقفتوا بجد....تحياتى ليكو
عجبنى أوى انك اديتنا حتة من عقلك و تفكيرك فى البوست ده
و زعلانة منك و عليكى يا مصر

محاولة لكسر الصمت said...

فعلا كفاية نظرة الخوف في عيونهم....بس بلاش حكاية عرابي دي...كده يبقى بنفول من أولها

shirry said...

علي فكرة يا واحد مش قاهم حاجة
الظاهر انك مش عايش في قلب المحلة ولا متابع الاخبار
لانك لو كنت نزلت في قلب الشوارع كنت لقيت ان محلات البغل اتكسرت بالفعل
ولو مش مصدق ممكن تبقي تسأل الناس اللي متابعين وتعرف ان اشرف البغل صاحب سلسلة المحلات دي اتصل علي برنامج القاهرة اليوم واتكلم فيه

وعموما انا مش بجيم كلام من بيتنا والكلام اللي بقوله متأكدة منه

وميرسي علي كل حال

بطوط حبوب said...

الفوضى فوضه ومفيش فوضى خلاقه وخلافه
الى عايز يثور لازم يكون منظم مش فوضوى
انت بتتعمال مع نظام ميختشيش هيضرب فى المليان ومتقوليش ايه يعنى يمووووووووت مليون طالما هناخد حقوقنا
لان المليون اكيد هيموتوا والحقوق مش اكيد هتيجى

max.adams said...

الخوف وقفنا و كتم الحق جوانا و حقنا دلوقتي نخلي الخوف يخرجهم برا الطريق السليم خليهم يمنعوا عن الناس القوت و لقمة العيش و الناس مش هيبقو على حاجة و هيعملوا فيهم زي الثورة الفرنسية بس بالعربي

حائر في دنيا الله said...

عارف
قراقوش زمان
كان غلبان
بالمقارنة مع قراقوشات دلوقتي


ربنا يخدهم

حمامة said...

برافو يا قراقوش :D

اهى خطوة والسلام

بس المهم نكون عايزين نغير بجد

اصل فى ناس بتهيص ف الهيصه