Pages

08 April 2008

قلة ادب

فى البداية انا داخل اقل ادبى
اصل احنا شعب قليل الادب
شعب المحلة كلة قليل الادب
لما نطلع من بيوتنا ونقول اتخنقنا من الحكومة وفسادها
نبقى شعب قليل الادب
لما نتهان فى شوارعنا من اول يوم الاضراب
ونبقى زى الحيوانات اللى ماشية فى الشارع
نبقى وسخين ومعندناش ادب
لما نطلع نهتف فى مظاهرات
ويكون الرد مالامن قنابل ورصاص
وناس تقع وناس تموت
نبقى احنا ولاد ستين كلب
معندناش ادب
انما اية هو الادب
الادب ان عساكر امن الدولة يرعبوا الناس فى شوارعهم
الادب ان الظباط فى الشارع بدل مايقولك لو سمحت متعديش من هنا يقولك يا ابت الكلب ويابن مش عارف اية
وعشان تتادب وتبقى زى الناس المادبة
لازم تتخنق مالغاز
وتتعور مالرصاص
لا ولازم لما تتعور متتنرفزش
ولا تكسر فى حاجة
هو دة الادب
تعظيم سلام للادب
انضرب وقول شكرا عشان تبقى مؤدب
اكتم بؤك ومطالبش بحقك عشان تبقى مؤدب
بشكر كل قوات الامن اللى علمت المحلة الادب
بشكر الاعلام اللى مرضاش يورى العالم قلة ادبنا
وبوجة تحية لشعب مصر كلة
المحترم المؤدب

5 comments:

NilE_QueeN said...

لا تعليق

كلامك اعجزني

Ana keda said...

مصطفى

مصطفى

مصطفى

ربنا يخليك بجد

سمعتك وانت بتتكلم عن الموضوع ده وعارفة انه مضايقك اوى والى ضايقك اكتر ان محدش عرف حاجة

بس هى دى مصر يا مصطفى

بنادى عليك عشان انت مش قليل الادب برغم كل الكلام ده

مش عارفة اكتبلك حاجة بصراحة

Desert cat said...

يا فندم احنا عارفين ان اللى حصل فى المحلة ده المحلاوية ملهمش يد فيه لان اول ناس فكرت فى اضرابات واعتصامات كان اهل المحلة وبالتالى انتوا على عينا وراسنا من فوق
تحية احترام وتقدير لاهل المحلة جميعا

max.adams said...

قد يكون هناك لا تعليق
ولكن ماقلته كان حقا ... لما احنا نبقى عندنا قلة أدب لدرجة ما مهما كانت هل نتحول الى أهداف لتمارين الأمن المركزي حتى يطلقوا فينا الذخيرة الحية حتى يلقى فتى - في ريعان شبابه - حتفه لمجرد خروجه من البلكونة ليرى ما يحدث ... وهل تتعدى قلة أدبنا الحدود لدرجة أن يتلقى أحد المواطنين 3 أعيرة نارية في صدره ، يمكن كان حدفهم بطوبة زعلتهم فقررو انهم يخلوه يهمد للأبد
احنا قللات الأدب اننا معملناش اضراب من زمان ... و كل الدلائل في الشارع بتقول ان دي مش النهاية
وبعد كل اللي حصل مدير أمن الغربية عايز يأدب المحلة !!!!

تكرم عينك يا مصطفى

nody_1987 said...

عليك نور
الادب فضلوه عن العلم
وبما ان مافيش علم ومافيش اكل ومافيش دوا ومافيش سكن
يبقى نتربى ونمشى جمب الحيطه ومش مهم حتى نجوع ونموت تحت رجلين الامن
ونتعلم الادب
شعب بيئه صحيح