كلام
عقاب
هموم
سراب
شياطين بتسبح فى الضباب
عيال بتلعب فى الحوارى
الامل فى القلب جارى
تعرفش اسمى ؟؟؟؟
او حتى صورتى
فالمرايا
طب شوفت رسمى
لما ريشتى تكون معايا
طب قولى كلمة
طب غنى غنوة
يا عين يا ليل
يا شمس بتبعتر حنين
يا نعش تفكيرى اللى كان
لساة جنين
مكبوت فى صدرى كلمتين
متلعبكين
مش هاقولهم
لاجل صمتك يا كلام
لاجل خوفى مالعقاب
لاجل احتراى للحياة
من غير هموم
لاجل تقديسى للامل
من غير سراب
21 comments:
مكبوت فى صدرى كلمتين
متلعبكين
مش هاقولهم
قول اللى ف نفسك قبل ما يبقي على الكلام ضرايب
ما بين الحلم و التانى
بكون غافى
لكن تسرقنى احلامى
لاعتابها
و رغم الخوف من الاحلام و سكتها
بسكتها
حروف خوفى
و اكمل فى طريق الحلم من تانى
-------------------
بقالى كتير ما صافحتش ابداعك
فجيت استمتع
كلام
جميل
حلو
ولذيذ
تحياتى
الله الله اية الجمال دة اية التعبيرات والكلام الكبير دة بجد بجد تحفة
بهنيك على شياكة كلاماتك وياريت متحرمناش من الحاجات الجميلة دى
بهنيك ... تحياتى
مكبوت فى صدرى كلمتين
متلعبكين
يا عم قولهم اياك تموت وانت كابت جوه قلبك كلمتين
لو كنت كده كده هتموت طلع كلمتين فى ابداع
حتى لو كان لونه حزين
دمت لنا مبدعا
اتكلم ولا يهمك
بلاش تحبس الكلمتين
عاجبنى الامل اللى فى كلماتك
بالتوفيق وتقبل مرورى
الكلام غامض فى الحقيقة.....كلامك المرة دى عامل زى ما يكون واحد بيحلم حلم مختلطة فيه كل حاجة....عارف الجو الكابوسى شوية...متزعلش منى فى التعبير
بس بصراحة حسيت انى بشوف تخاطيف من ذكريات و أحاسيس
حسيت بالكلمتين اللى نفسك تقولهم
زى ما تكون كده واقف وسط ناس كتيييييير و عايز تقول حاجة...خايف تقولها ليقولو عليك مجنون حاجة عايز تقولها و فى نفس الوقت مش عايز الناس تعرفها...
بوست المرة دى زى المشاهد اللى بتيجى قبل الفيلم فى صالة العرض
مش عارفة....بس انا حسيته كده
و عاجبنى أوى أوى
خالص تحياتى
يا نعش تفكيرى اللى كان
لساة جنين
مكبوت فى صدرى كلمتين
متلعبكين
مش هاقولهم
لاجل صمتك يا كلام
لاجل خوفى مالعقاب
لاجل احترامى للحياة
من غير هموم
لاجل تقديسى للامل
من غير سراب
والله والله بقالى بتاع اكتر من 10 دقايق عملت الاقتباس ومنتظره الاقى كلام اقوله !!!
!!!
!!!
بجد مش عارفه اقول ايه
ماشاء الله عليك
ربنا يديم عليك احساسك
يمكن ساعات بيبقى نقمه عليك"لانك اكيد بتفكر فى غيرك قبل ما تفكر فيك قبل اتخاذ اى قرار " بس صدقنى دا نعمه كبيره اوى يكفى انه بيسعدك اللى حواليك
شكرا ليك جدا بجد
السكوت مرفوض بس ساعات يبقى مطلوب والخوف شعور انسانى لكن الجبن دا شئ تانى
الاحسن تتكلم وتعلى صوتك حتى لو بتتألم
وعلى كل الاحوال
الكلام أدب مش هز أكتف
ودمتم
nile queen
لو كان الامر بيدى
كنت قولتهم
هاحاول اوشوشهم لنفسى
وبجدة الضريبة هاتقل
--------------------------------
سهر
كلماتك
بتحسسنى دايما بالخجل
للما بتتحط جمب كلماتى
حروفك مليانة ابداع
ورغم شعورى بالخجل من كلماتى
بستمتع برضوا بكلماتك
شكرا على كلامك
واتنمى تزورينا دايما
----------------------------
مدحت محمد
ردك لذيذ
جميل
وانا سعيد بمرورك
يا باشا
facemoon
شياكة
تصدقى راى غريب
بس سعيد بية اوى
وياريت انتى بس متحرميناش من
زيارتك
--------------------
بطوط حبوب
اضحك قبل الضحك ما يغلى ويتعبى فى قزايز
هانقول ياعم
محدش واخد منها حاجة
صباح الفل
اولا احب اعتذر عن المهزلة اللي حصلت في المدونة بتاعتي بس انا بجد كان بقالي فترة مش تبعتها لان كان عندي امتحانات ولو كنت اعرف مكنتش سمحت بيها من الاول
انا بجد اسفة واتمني انك تقبل اعتذاري واشوف تعليقاتك علي البوستات اللي بعد كدة
اما عن البوست دا فهو بجد جميل
وكلماته كمان جميلة
وانت بجد موهبتك رائعة
انا اتمني لك التوفيق
علي فكرة انا مسحت كل الكومنتات اللي حسيت انها مش كويسة ومش تزعل بقي دا احنا الاتنين محلاوية وملناش غير بعض
No comment
انا شايفه انك المفروض تتكلم متكبتش فى نفسك
علشان لو فضلنا ساكتين يبقى هنفضل متهانين
تحياتى
مكبوت فى صدرى كلمتين
متلعبكين
اسوأ حاجة الكبت ده طلع كل اللى جواك
تحياتى لك
هى كلمه واحده ... مهو مش كل مره حاجى هنا
واخرج ومعرفش اقول حاجه
(انت حد دماغه عااااليه اوى )
تحياتى ... بجد
عاشقة الفردوس
حتى الكلام ولة اوانة
لما يجى اوانة بقى
-----------------------
موناليزا
عارفة الامل لما يكون مخنوق
مبيبقاش لة لازمة
تقبلى انتى هرتلاتى
وخالص تحياتى
--------------------------
صيدلانية مطحونة
لما تيجى تبصى فى لحظة معينة
وتبصى تلاقى كل مشاكلنا الحياتية
سببها اننا مش عارفين نقول
بيبقى فعلا جو كابوسى
حبيت اخد من كل بيت مشهد
واحطة فى كلمتين
بس برضوا معرفتش
خالص خالص خالص تحياتى
-----------------------------
ساعة غروب
عاوز اقولك الرد بتاع
ردك دة وسام على صدرى
والحوارات دى
بس حاسسها مش لايقة جنب احساسى الكبير
اللى بحسة لما كلامى بيلاقى حد يحسة
او يحبة
ويمكن حبى لكلامى رغم انة كلامى
بيجى من احساسى بحب الناس لية
خلاصى الرد
مش عارف اقول حاجة بعد تعليقك الجميل دة
وبشكرك جدا
--------------------------------
صاصا باشا تيفا
عارف قريت ردك اكتر من مرة
وكل مرة
خايف اصدمك
بس هو حقك عليا انى اصدمك واقولك الحقيقة
انت بتحلم زيى بالظبط
لو اعتبروا الكلام ادب
انا مستعد ابطل هز اكتاف
ودمتم يا باشا
-------------------------------
shirry
حصل خير يا ست الكل
وعلى راى المثل
ما محلة الا بعد عداوة
واكيد هاجى البوست الجاى واللى بعدة
وعاشت جمهورية المحلة الكبرى
----------------------------------
ana keda
يارب يكون الكلام عجبك
-----------------
قطة الصحراء
ملعون يا داء السكات
لما تكون مالخوف
وملعون يا داء الكلام لما تكون ملفوف
وبين اللعنة الاولى
واللعنة التانية
بدور على كلام
----------------------------
بوس بوس
منورانى بعد غياب
معاكى فى رايك
بس -----
انا بموووت ف الصورة دى
كل يوم فى امل جديد بيتولد
مابين طرفة عين وانتباهتها.. يغير الله من حال الي حال
:)
تقبل مرورى
يا شمس بتبعتر حنين
يا نعش تفكيرى اللى كان
لساة جنين
الله الله
ايه التصويرات الرااااااااااائعة دي
ماشاء الله
ربنا يحميك يبني بجد
Post a Comment