Pages

14 December 2007

قبل الفراق


لو يوم هاترسم الطريق
ابقى افتكر
لحظة فراق
بتبكى فيها وبغباء
بتربى احساس اشتياق
برغم حقيقة الرحيل
وقع الجدار من بيت كبير
بيتبنى
كان حلمة يوصل للسما
ويقولها
انة هنا
لكنة وفى لحظة انهيار
افتكر
ان جدار من بين خمسين جدار
ممكن يقع

فعلا وقع
والحلم يدخل لحظات انهيار
راجع حطانك كلها
شوف عزمها
بين كل طوبة
شوف الفروق
وسدهـــــــــــا
ولو حجر حسة ضعيف
بدلة
قدرة كدة
عمرة انتهى
هزات كتير هاتعيشها وانت فى الطريق
يا هاتقلبك
يا هاتعدلك

الحلم نقش بنرسمة
فى لوحة الفخر الكبيرة
اكتب حروف اسمك وبعزيمة
ولو حرف ممكن يميل
هايميل الاسم كلة
ومش راح ينقرى

راجع حطانك كلها
راجع حروفك كلها
وابنى حلمك
وصلة
للسما
يقولها
انة هنا



الانسان عشان يحقق حلمة ويوصل بية للغاية اللى كانت فى خيالة لازملة منظومة كاملة من العوامل اللى مينفعش يكون اى عامل منها مش سليم ولازم يبقى عندة بدائل للعوامل دى كلها عشان ممكن عامل من العوامل دى يبوظ فى الطريق ولو عامل بايظ يبقى من الطبيعى ان الحلم كلة هايبوظ زى مثلا لو حلمى كلة مبنى على كون بابا راجل واصل وبعدين مش بابا دة ممكن يموت هاوصل انا بقى ازاى لو الحلم دة كان بيساعدنى فية صديق والصديق دة غدر بيا تفتكر هاقدر اكمل لو معنديش بديل لازم نعمل حساب الصعب عشان نهتقدر نتعامل مع الصعب والسهل

انا عارف ان الاسلوب بتاع كلماتى
الاوزان فية مش مظبوطة
والمعانى فية مش واضحة
بس انا كنت قاصد اعبر عن الفكرة
من غير ماهتم بالاوزان

19 comments:

Anonymous said...

انت اهتميت انك توصل المعني باي شكل
وفعلا وصل
ودا ميمنعش ان كلامك حلو اووي
ووصلت لشئ جميل

فعلا لازم نحط بدايل كتير
ونفترض الصعب علشان لو جه نكون قده
علي قد ما البوست شايل حكمه
جميله اوي
علي قد ماانا حاسه بالشجن والحزن فيه
لان دا اكيد وراه تجربه صعبه
خسرت فيها اشياء
وكسبت منها شئ جميل
وهي دي الدنيا

اتمنالك الخير
وانا بجد سعيده اني بقراه خلاصه تجربه بجد افدتني جدا
ولازم احط بدائل كتير

تحياتي

Anonymous said...

رجعت اقرا البوست من تاني

وحبيت اقول حاجتين
الاول بجد الصوره عجبتني جدا

الشئ التاني
الفراق ممكن يكون ليه بديل

انك تفارق شخص عزيز عليك واتعلقت بيه
ممكن تحط بديل لانك تفارق الشخص دا


اشكرك علي البوست الممتع

Unknown said...

الاول كدة منورة المدونة

تانى حاجة بقى
انا خايف ارد على تعليقك
قولى ليه
قولتى لية
اقولك لان من العادى عندى قبل مارد على حد لازم اقراء مدونتة عشان اعرفة الاول

ماعلينا بقى

انا كنت قاصد اعبر عن الفكرة بالشعر لما معرفتش عبرت عنها بالكلام اللى تحت
وكون الفكرة وصلت والكلام برضوا عجبك
دة بيزيدنى سعادة على سعادتى بمرورك
ومش ضرورى ان الراى دة يكون مر بيا
انتى ممكن توصلى حقايق كتير
من نظرة واحدة فى وشوش الناس من غير حتى مايتكلمى
مابالك بقى لو اتكلموا


حكاية ان ممكن يكون فى بديل لفراق
حد عزيز
انا رايى فيها ودة مجرد راى
ان الحياة عمرها ماهتقف على فراق حد
ممهما كان
يمكن هاياثر فينا فراقة
بس اكبر غلطة ان فراقة ياثر فينا على طول

شكرا على مرورك

مؤمنه said...

السلام عليكم ورحمة الله وبركاته
انا شايفه البوست دى ما شاء الله اللهم لاحسد حالة اليأس اتحسنت كتير
يعنى فيه امل يا دكتور
الامل فى ربنا
والامل ان شاء الله موجود
البوست هايل
جميل اوى
والفكره اجمل
وتعبير حضرتك مش بقول اسم حضرتك المستعاردى خوف من الحسد مش اكتر
بالتوفيق


المناقشه مازالت مستمره عندى فى المدونه
والسلام عليكم ورحمة الله وبركاته

بسمه عبدالباسط said...

راجع حطانك كلها
راجع حروفك كلها
وابنى حلمك
وصلة
للسما
يقولها
انة هنا

حسيت قوى بالكام جملة دول ودول فعلا فيهم الخلاصة
لازم الواحد يحطط أسس لحياته ويبنيها طوبة طوبة ويخلى باله من الطوب اللى ممكن يتكسر فى النص

تحياتى لك

حائر في دنيا الله said...

بجد كلامك جميل جدا ويحمل داخله معاني أكبر مما نتيخلها نحن حتى
وحتى الصورة معبرة وجميلة
لك تحياتي
والسلام عليكم

مروة الزارع said...

انا بكتب لك الرد وانا مش شايفة ادامى
وعاملة زى ابو ضبش بالظبط
اصل الانسز بتاعتى اتقطعت الصبح ولسة عاوزة اشوف حل
انا مش عامية يعنى بس بزغلل من الكمبيوتر اوى وبسرعة
عشان تعرف معزتك بس بضبش وبكتبلك اهوة

المهم
كلامك جميل جدا

انت عارف

راجع حطانك كلها
راجع حروفك كلها
وابنى حلمك
وصلة
للسما
يقولها
انة هنا

نفسى اعمل كدة ومش قادرة

تحياتى

Desert cat said...

يا فندم مش مهم الاوزان المهم ان المعنى وصل
طبعا تحقيق الحلم مبنى على ذواتنا
يعنى مش ينفع اعتمد فى تحقيق حلمى على ماما او بابا لانى مش هحس بيه لو اتحقق لان مش انا اللى حققته
تحياتى

Unknown said...

الجميلة مؤمنة
والله يا اختى انا حالتى حلوة الحمد لله
هو بس اللون الاسود بتاع المدونة هى اللى بيخلى الحالة غامقة
اكيد بعد الامتحانات هادى للمدونة وش جديد
اية رايك نعملها اورنج ولا اصفر ولا فحلقى

بشكرك اوى على رايك
اللى انا بعتز بية تحياتى

Unknown said...

bos bos
كالعادة دايما وانا بكتب بوصل لمرحلة اللى عاوز انهى بيها
القصيدة او الكلمات
وبكتبها بتسرع ومن عير تفكير
ودايما الجزء دة هو اللى بيكون احلى جزء
وبيعجب الناس

بشكرك اوى على رايك
ويارب نعرف نراجع حيطانا ونظبط حروفنا

Unknown said...

حائرفى دنيا الله

هو الموضوع اللى بيبقى جواة معانى كتير
موضوع حلمك وحلمى
اكيد لازم يكونوا بيمثلوا لنا معانى كتير
عشان كدة اي كلام عن الحلم فى الحياة
بيصور معناى لكتير للى يقراة

تحياتى ومتغيبش علينا كتير

Unknown said...

مروة الزارع
الكمبيوتر دة وحش جدا
ازاى يزغلل عيون طير جاى من الجنة ووقف عندى فى المدونة ويقول عنها كلام حلو

تفتكرى لو مقدرتش اعمل كدة
قصدى مقدرتش اراجع حطانى وحروفى
معناها انى اكسر جناحى
واقول انا مش طير وافضل عالارض
يا ستى لو مقدرش كفاية انى عيش لحظة التخيل بتاع الحلم دة

واهو برضوا هابقى طير طاير فى الجنة

Unknown said...

desert cat

طيب الحمد لله ان المعنى وصل

هو مش كدة بالظبط
اصل برضوا ممكن احنا نعتمد على حد يكون بيساعدنا فى الحلم دة لحد ما يتحقق
زى ما قولت الحلم دة منظومة من عوامل كتير
ممكن يكون من ضمن العوامل دى انسان قريب منى
بس المهم انى احط احتمال عدم وجود الشخص دة
ولازم يتحطلة بديل

Hadota ... حدوتة said...

المعنى وصل وصل وصل
كلماتك جميلة جدا
انا صحيح مش بعرف فى فنون الشعر والاوزان والقوافى
بس كلماتك جميلة
والمعنى اجمل
:)

تحياتى

كل سنة وانت طيب
:)

ذو النون المصري said...

الهنا ما اعدلك
مليك كل من ملك
............
لبيك قد لبيت لك
لبيك ان الحمد لك
............
و الملك لا شريك لك
ما خاب عبد سالك
...................
انت له حيث سلك
لولاك يارب هلك
..................
لبيك ان الحمد لك
و الملك لا شريك لك
.....................
كل نبي و ملك
و كل من اهل لك
...................
و كل عبد سالك
سبح او لبي فلك
................
لبيك ان الحمد لك
و الملك لا شريك لك
...................
و الليل لما ان حلك
و السابحات في الفلك
.................
علي مجاري المنسلك
لبيك ان الحمد لك
.........................
و الملك لا شريك لك
يا خاطئا ما اغفلك
....................
اعمل و بادر اجلك
و اختم بخير عملك
...............
لبيك ان الحمد لك
و الملك لا شريك لك
....................
هذه القصيده لشاعر الخمريات الشهير ابو نواس، احببت ان اهديها لكم بمناسبة وقفة عرفات و عيد لاضحي المبارك، كل عام انتم بخير ،تقبل الله منا و منكم طيب القول و صالح العمل
.........................

max.adams said...

المعنى واضح و وصل من أوسع الأبواب و مش مهم القافية تكون مضبوطه 100 * 100 أنت مش أبو العتاهية

كل سنة و انت طيب يا مصطفى

NilE_QueeN said...

انا عندى اعتراض
مش اى حاجه بنلاقيلها بديل
لو كان الكلام على الماديات اه عادى يكون فيها تبديل

لكل لما اللى يبوظ ولا يضيع ولا يتوه يكون شيء معنوي مش هيكونله بديل

بنت الصالحين said...

يااستا مش فاهم حاجه
كلام رائع
ومش مهم الاوزان المهم الفكره
ربنا يبارك في حضرتك
وعام هجري جديد ملئ بالطاعات ( وعدم اليأس)

د/اجدع بنوته said...

مين قال ان كلماتك مش ليها وزن وكلام م ده

كلماتك حلوه اوى ومترتبه جدا وبتسيب بصمتها اوى

بس انت بتتكلم ف زمن محدش بقى بيحلم فيه خلاص

الكل عايش علشان عايش

الناس فقدت الامل وفقدت القدره ع الحلم

بس فعلا كلامك هاايل