Pages

24 March 2007

حد يشترى جنسية واحد مصرى


انا داخل اكتب البوست دة
ومش عارف انا هاكتب اية
بفكر اعلن لكل الناس انى مش مصرى
كنت عاوز ابيع جنسيتى لحد عاوز يبقى مصرى
بس ميين هايقبل انة يشترى جنسية لبلد
بلد اية
مش بلد خلاص بقت عزبة
عزبة مبارك

ولو قولت لواحد فى الشارع
مصر هاتبقى عزبة لمبارك هايقولى وهو على وشة مليون علامة تعجب ازاى؟
لو شرحتلة حكاية تعديل الدستور
هايقولى ياراجل واحنا مالنا ومال الدستور بلا هم مش كفاية الهم اللى فينا
اية الشعب دة
اية كمية اللامبالة اللى احنا فيها دى
انا بدات اشك فى ان التاريخ اللى قريناة دة بتاع اجداد الناس اللى عايشة على مصر
طيب
بلاش الناس الناس حلوة وانا اللى وحش
انا اعمل اية
عاوز حد يقولى على حاجة تتعمل
وتمنع المهزلة اللى بتحصل دى وانا اعملها
اعمل مجنون وامشى فى الشارع واقول
مش عاوزين تعديل دستور عاوزينك ترحل وتغور
طب ما ناس كتير عملوا كدة اية اللى حصل
اروح افجر نفسى قدام الهرم
طب واية اللى هايتغير
هايقولوا عليا ارهابى
طب اطلع فوق البرج
واقول هانط من فوق
لو ما افرجتوش عن مصر
هايقولوا عليا واحد مراهق البت بتاعتة نفضتلة
طب جربت اعمل مش واخد بالى
واقفل ودنى خالص بلاش اسمع حاجة
بس برضوا وشوش الناس بتفكرنى
لية يا مصريين
اية اللى بيحصلنا دة

حتى النيل لما روحت اشكيلة اللى بيحصل
لاقيتة زعلان
وغضبان
ونفسة يتف عليا ويقولى امشى يا كلب
لية احنا متعلمانش من النيل
ولسة بيجرى ويعافر ولسة عيونة بتسافر ولسة قلبة لم يتعب من المشاوير
لية انتوا يا مصريين تعبتوا
النيل كان بيكرة الحراس
لية انتوا يا مصريين بتخافوا منهم

مصر
انتى يا حبيبتى
هافضل احبك
بس
انا اسف

اسف
بجد اسف
وعشان خاطرى بلاش تحكى لولادى اللى حصل
خلية سر عندك
ارجوكى عشان اعرف ارفع وشى فى وشهم
واقولهم انا مصر

7 comments:

Bossy said...

انت لازم تفتخر بانك مصري
ازاي بقي
انت في بلد الامن والامان
بلد العجايب
لو اتكلمنا علي الدستور هقولك خليك متفائل في لسه ماده الباشا نسي يعدلها
بتقول ان الشعب وحده هو مصدر السلطات
هههههههههه
اضحك
كونك مصري دي مش جريمة
دا العقاب

مش فاهم حاجة said...

انا كل يوم بتفشخر انى
مصرى
وهاعمل زى كل المصريين واشترى طرحة والبسها
اة انت متعرفيش ان فى قانون جديد
بيحتم عالمصريين كلهم لبس الطرح
كتر خيرهم
عاوزين الشعب كلة يبقى متدين
مبرك يا جمال

... الـبـتـاع ... said...

و الله ما عارف ....الاول قانون الانتخابات و من بعده الانتخابات نفسها .... و دلوقتى الاستفتاء
طب بعد كده ؟؟
هايعملوا إستفتاء على جمال !!... و بعد كده إستفتاء على تحويلها لسلطانية

عاش الزعيم و إبن الزعيم و لا عزاء للمصريين

sokoothansawat said...

شوف يا سيدي حيس انك محتاس كدة ومانتاش عارف تعمل ايه في نفسك انا هساعدك وامري لله...في مثل امريكي جميل قوي بيقول..if you can't beat them join them يعني ما توجعش دماغك بالشعب المطحون....الشعب ياكل تبن..وتوكيل التبن هتلاقية مع علاء عشان جمال مش فاضي للحاجات الصغيرة دي..فانت من بكرة تروح على اقرب مشيخة وتطلعلك كارنية حزب واطي..قصدي وطني...و تبدأ تبص للموضوع بنظرة جديدة..مبارك مش عدوك..مبارك حبيبك الي هيخليك تكبر وتربرب ده غير انك هتستمتع بالنزول للمظاهرات منغير ضرب ولا بهدلة..بالعكس هيدوك اجازة من شغلك عشان ماتضايقش...وبكدة هتلاقي الحياة بقى لونها بمبي...وابقى اجر حد يحجلك بعد ماتموت عشان تدخل الجنة و كدة تبقى كسبت دنيا واخرة...يلا يا سيدي..مبروك عليك القرنين الجداد..نسيت اقولك (دول من شروط الحزب..بسيطة مش كدة)

Bossy said...

قدرنا اننا نعيش في دولة ظلم
بس المفروض اننا نهي الطلم دا
بس تفتكر ننهيه ازاي
وتفتكر في حد بيفكر ازاي ينهي الظلم دا
؟؟؟؟؟؟؟؟؟؟
البلد ملهاش ذنب العيب فينااااااا
وفيهم

مش فاهم حاجة said...

البتاع
منقدرش غير نقول كلمة واحدة
مبروك يا جمال
مبروك يا مبارك
ومبروك للشعب جهنم جديدة

سكوت هانصوت
رايك واللة لعب فى دماغى
واعتقد انى جربتى
بس عاوزك تجرب تعمل كدة
وبعدها بساعة
انزل امشى فى الشارع
وشوف وشوش الناس عاملة ازاى
وابقى قولى نتيجة التجربة


بوسى
العيب فينا فعلا
ولازم نعترف اننا شعب جبان بيخاف
ومنلومش الا نفسنا
بس فى حاجة
هما اللى عملوا كدة
من غير ضمير كدة
انا مش قادر اتصور انسان ضميرة معدوم للدرجة دى

shams said...

زمان كان الواحد يمشي في أي حتة يقول انا مصري ولو سافر في اي بلد يبقوا عاملينله هيبة كده وقيمة .. ده مصري .. دلوقت تعال شوف واتفرج واضحك كركر .. المصري بقى مسخرة ونكتة وبيضحكو عليه وبيشتموه .. طب ده انا اعرف ناس حقيقي كانوا في السعودية الأطفال الصغيرين يحدفوهم بالطوب وهم ماشيين في الشارع ويشتموهم .. يا المصري .. يا المصري .. عمرك شفت كده .. خلاص قيمتنا بقت في الحضيض ومعدناش عارفين نرفع راسنا .. بقيت بتدارى واقول يارب .. محدش يعرف اني مصرية