Pages

08 January 2011

سألنى الصبر

سالنى الصبر : هاتصبر ؟
فلطشنى طوفان افكار
السكة صعيبة مفيهاش شموس
وقمرها يوماتى يبان خجلان
تترجى فى بكرة يكون انسان
فيجيك متغندر
لكن من غير ولا ورقة توت
يا صبر ومين كان صبر
وسط البشر عريان
هو احنا فى الاصل للبكا
ولا البكا فينا

كل القصص بدموع
بيزوق معانيها
ابكى تنول اكتر
ولا القوى مابكاش

ولو تستعجب النخلات
وبرغم كون الثمر عالى
تطرح بلح مالح
يقولوا عليك ساذج

وسذاجة الفكرة
ان العجب ممنوع

و برىء الحلم اصلة
ملوش فى فن اللوع
يرضية سراب فانى
ومترضهوش قسمة

بحتاج ساعات اضحك
على الف طعنة وجع
لكن بخاف جدا
لو ضحكى صار مسموع
فاسكت .. واعيش صابر
كيف ما صبر ايوب!!

4 comments:

last anonymous said...

بكرة اكيد راح يجي نهار
والشمس تنور تملى الشرد

او يمكن حبة مطرة لطاف
وسعاتها الشجرة هتطرح ورد

بس انتى ابتدي ازرع حبات
واوعاك تخاف من شتى او برد

طول مانت معاه .. ربك هيعينك و يقويك
وهيجي اليوم و القوي ينهد


كلمتين كده على قدى من وحي كلماتك

كلمات جميله و حزينة بس حاساها فيها امل جاي من بعيد

فيها روح جايا من الجنوب
صعيبة- فيجيك - النخلات - كيف ما

كنت قاصدهم ولا تأثر باحد شعراء الجنوب

معلش طولت في الكلام بس حاولت اكتب اللي حسيت بيه من الكلمات الجميلة دي

ارجو انها تكون زيارة خفيفة :)

Tamer Nabil said...

الصبر مطلوب

فى حياة كل انسان

كلمات جميلة ومعبرة

تسلم عليها

مع خالص تحياتى

star said...

جميله الكلمات و واقعيه بس فى النهايه احنا ملناش غير الصبر

Saydalanya Mat7oona said...

العجب مش ممنوع....موجود بس بقا ترف

اشرب و أنت ساكت حتى و إن مكانش قدر ....دى القاعده

اللى يرضيه سراب فانى و مترضيهوش قسمته (الحقيقية مش اللى أقنع نفسه بيها) يبقا بيستغفل عقله و قلبه سوا

الضحك لوأنت تحديدا خايف تسمعه....يبقا اللى حواليك هيلوموك ساعة ما يطلع منك

حسيت الكلام مرتبك شوية

حلو البوست

سلامات