Pages

12 November 2010

طقطوقة


'طريقتك فى التعامل مع الموت
لما بيزورك الصبحية
ويطلب منك بكل سفالة
ومن غير ما يرفع عينة من على الجرنال
شاى كشرى سكر برة "
مش معناها انك حر 
 

وانت بتلم تفاصيلك عشان تخرج تقابل
سحالى وتعالب وشيطاين
خد معاك صورتك
اللى نسيتها فى المراية
عشان يمكن تقابل
سحالى وتعالب وبنى ادمين




واتارى المكسب شى صعب
انك تكسب هو انك تعبر
يمكن فى عبورك تخسر منك
لكن بعبورك تكسب ليك

5 comments:

Saydalanya Mat7oona said...

و من امتى و الموت بقا كييف شاى....ده كييف قبض أرواح لسه مخلصتش _دايما_ حاجة من اللى وراها

منطقى جدا موضوع انك لازم تاخد معاك تلات تلاف وش تبدل بينهم....مبقاش نفاق قد ما بقا نصاحة و تعامل مظبوط مع كل واحد على قد حجمه

المكسب لازم يجى معاه خسارته....مفيش مكسب كامل و مفيش خسارة مش ملفوف فيها مكسب......يمكن بعبورك تقضى عليك....فى حاجات كتير لازم تتحسب قبل المرة ألف....و فى حاجات مينفعش تفكر فيها من الأساس فما بلك بإنك تحسبها بقا


سلامات كده

واحد مش فاهم حاجة said...

الموت بقى كييف شاى لما لقى اننا مبقيناش نخاف منة قد ما بقينا نخاف من حاجات تانية حاجات غير الموت بقت تقيدنا وتسيط على تفكيرنا


هو فى الاساس ان كل واحد بياخد معاة كل الوشوش اللى مش شبهة بس اصبح ضرورى ان ياخد وشة الحقيقى عشان ممكن يقابل حد لسة لابس وشه الحقيقى

المكسب يجى معاة خسارة يجى معاة اى حاجة بس اهم حاجة نعرف انة شى صعب

سلامات دايما

Anonymous said...

تلت صدمات عميقة المعنى صريحة في التعبير

بس عندي تعليق ياريت تتقبله من غير ما تضايق منه

من اول ما شفت اول طقطوقه و انا مش عارفه ارد عليها لاني بصراحه مش عارفه ليه اخترت اللفظ ده بالذات في الوصف و هل يجوز اننا نستعمله في وصف شئ ليه قدسيه زي الموت ولا لا

التانيه الوصف فيها جميل اوي بس هل في الزمن ده صعب للدرجه دي اننا تلاقي بني ادمين لدرجة اننا نضطر اننا نستعمل صوره غير صورتنا اللي بنشوفها كل يوم في مرايتنا لما نكون لوحدنا

التالته بقى لا تعليق عليها لانها حقيقيه فعلا ربنا يعينا عشان نقدر نعبر باقل خساير ممكنه

اسفه لو كان الرد ضايقك في اي جزء فيه

واحد مش فاهم حاجة said...

Anonymous

شكرا جدا على تعليقك وزيارتك
بالنسبة للوصف كلمة سفالة فهى عايدة على طريقة الطلب نفسها مش الموت والتعبير كلة مقصدش بية الموت نفسة بس اقصد اى صعوبات بنقابلها وككل هى مجرد صورة وبكدة انا معفى مالاجابة على سؤال قدسية الموت


هو مش صعب بس كتر التعامل مع الوحش بينسيك ان فى حلو فدة مجرد تذكير يعنى ان فى حلو ولازم تتعامل معاة حلو


الرد مضايقنيش ولا حاجة بالعكس خلانى افكر فيها اكتر وبالذات قدسية الموت ، هل الموت لة قدسية فعلا بمعنى قدسية او لا ؟

Anonymous said...

ال شابفو انك تبقى وش و احد بشخصية قوية و السحالي و الشياطين و التعالب هيتعاملو معاك زي ما انت عايز