Pages

17 November 2009

عبد الرحمن الابنودى : الله يجازيك ياعم عبد الناصر








لله يجازيك يا عم عبدالناصر
الليل مليّل
والألم عاصر
لسه اللي بيبيع أمته كسبان
وكل يوم
أطلع أنا الخاسر


أما انت خميت مصر دي خمة
يوم ما ناديت بالعشق للأمة
ورطتنا نعشق خريطة عبيطة
وبشر ما نعرفهاش
وبلاد.. ما بنـزورهاش
إلا.. فواعلية وبنايين وسواقين
وخدامين.. وطباخين.. وكناسين
بلاد أسافرها سعيد
ارجع حزين
حبيتها زي ما قلت لي.. واكتر
ع الأجنبي ما استكترتش عليا تستكتر
ع الأجنبي ما اتنقورتْش عليا تتنقور.
تطمع في دمعي
وف تعاسة راتبـي.
مُلهم أنا.. واعمل غبـي
وادي الألم يا عم عبدالناصر
زاحف وبيحاصر
وآدي الجميع خاسر
وآدي فجر أمتنا الجميل مغلوب
وآدي انتحار الأمة بالمقلوب
وأنا... غريب الدار..
لابسنـي توب العار
ساكن في وطني بالإيجار


قاعد أنا ع الجسر في القيَّالة
من قلب اللهيب مِنشالة
وقلبي.. ساقية حزن سَيالة
باغنـِّي..
ما اعرف مغنى والاّ عديد
زي افتكار الميتين.. في العيد.
باعاني وحداني
شياطيني لابساني
والأمة قدامي.. مفارقاني
يا رب...
ما تحببني في الناس الملاح تاني
يا رب
ما ترجعني أعشق
ضحكة اخواني
يا رب
كرهني في أوطاني


ما أخيبك أمَّة
ما أتعسك أمة
لا عقل... ولا همة...
لا مصدقه فعلك
ولا تحفظي كلمة.
أمة.. تدور وتلف..
تقيلة.. مش حتخف
حماسية... وحماسها
بكتيرُه ساعة.. يجف.
أمة بتتخابِط
أمة بتتعابط
أمة ومالهاش
لا زابط ولا رابط
ولا كبير عيلة
ولا قرابةْ دم
وفكرة وهمية
ما تورث إلاّ الهمّ...
ما تحل عني يا عم..
إحنا ورثنا كلام
إحنا تاريخنا كلام
علشان كده لما تقول..
علي طول أقول:
وبكام؟؟
ما هو حب؟؟ دبرني
وتاريخ؟.. فكرني
وطريق؟.. نورني
ومصير؟.. بصرني
ده انا بقيت عربي
من قبل ما القي
اللي يمصرني.
أنا انتمائي لأمتي...
ممسخرني.
محسوبة في الأحزان عليّ
في الفرح تنكرني
ياللي انتي لا أمة
ولا انتي أم..
فيه أم
ما تعرفش ساعة الألم..
تضم؟..


قد ما ننورها
هيه مضلمة
قد ما نعلمها..
مش متعلمة.
كل ليلة بايتة مظلومة
وهيه الظالمة!!
آخرة السكك الوعار
مجد.. متلطخ.. بعار.
قد ما نحجمها...
تفلت م الإطار!!
السلاح من صنع بره
والكلام من صنع بره
المآكل
الملابس
والهوا البارد في بيتي..
صنع بره.
لا نسجْت الهدمة..
لا زرعْت.. ولا اكتفيت
شفتها.. جريت اشتريت.
جلاّبيتي.. عمامتي.. سجادتي
وحواديت الصغار
والحلاوة: حلوة.. مرة
شغل بره.
إيه يهم
إن مت من أجل البشر
ولا سبت الديب يصرَّخ
واتغابيت؟...
أو نسيتها؟ أو اتناسيت؟؟..
الشهادة مجانية...
والبطولات...
نفحات استعراضية
والليل مليّل
والألم... عاصر
لسه اللي بيبيع أمته
كسبان..
وكل يوم..
أطلع أنا الخاسر...
الله يجازيك
يا عم عبدالناصر
 
 
عبد الرحمن الابنودى

6 comments:

OldCatLady said...

والله حزننى زيادة

فكرنى بالمعركة العبيطة اللى ملهاش لازمة بتاعه مصر و الجزاير

تسلم

Unknown said...

ملهم انا واعمل غبى
الابنودى يلقى كلمته فتعود لها فى كل العصور وكانه كتباها فى هذه اللحظه مسجلا لواقع اليوم والامس القريب لادرى سر هذا الخلود نعم انا عاشق لكلمته ولكل كلمه مصريه من صيميم قلب الانسان المصرى

مثل نجم وجويده انهم الشى الوحيد الذى يجعلنى اجد طريقى وسط كل ما يحدث

Anonymous said...

انت رجعت في كلامك و لا ايه مع ان معجبنيش التعليق بتاعك على الفيديو اللي فات بس كان الفيديو حلو برضه

هوه اللي حصل من الجزائرين خلا الموازين اتقلبت في دماغ الواحد بس برضه المصرين مسكتوش و ردوا عليهم

يلا ربنا يهدي الجميع و يرجعنا امه واحده زي زماااان عشان الموضوع كده زادعن حده اوي فين الروح الرياضيه بتاعتهم الله اعلم

Unknown said...

صيدلانية مطحونة

وهو دة المطلوب اثباتة

منورانى


-----------------
gohen985

انا حاليا مسحور بالجمال اللى موجود فى خطابات حراجى القط العامل بالسد العالى الى زوجتة المصونة فاطمة احمد عبد الغفار فى جبلاية الفار

واعتقد انة مينفعش يختلف علية اتنين

ربنا يخليهم لينا

-----------------
مجهول

هو الوضع يخلى الواحد خلانى اغير رايى وانا مقتنع جدا لان معدش فى مبررات اقدر بيها اؤمن بالراى التانى

انتى فى حالك وانا فى حالى خدنا اية او هما ادونا اية غير الاهانات

ميين انت بقى ؟

Anonymous said...

مش مهم تعرف انا مين
انا شخصيه بتعجبها كتير من افكارك وخلاص
اما لو كان بيضيقك وجود المجهول في مدونتك و بيضيقك انك ترد عليه ممكن ابطل ارد و اقرأ بس
المهم ركز انت في امتحاناتك دلوقتي
و متبقاش تغيب عننا كتير :)

بنت الصالحين said...

هي دي المصيبة

اننا نفكر في كدا

تعرف

انا ليا اخوات جزائريات كتير
اجتمعنا على كتاب الله وعلى حفظه ودراسته

بيقولولي ان عندهم الاعلام مش موضح حاجة

ياريت نفهم ان اللي بيحصل مش من الجزائريين نفسهم وان فيه لعبة حقيرة بتتلعب من ورانا

ودا الهدف نمسك في خناق بعض وماشاء الله علينا شطااااااار اوي في كدا


ربنا يعينك في امتحاناتك