Pages

01 December 2009

سيناريو افتراضى





وإبتدى العرض الدرامى 


واقفة بتبكى ... فى الركن البعيد


فى السيناريو 


مكتوب عدد دمعتين 


وأهة واحدة مكبوتة من سنين


صوت الحكيم : البكا عهر وغواية 


اخر مزاد للمشنوقين 


بالخوف وهستريا الحنين 






قلبى فى هواكى كان وطن 


بيحدة  بحر الاسئلة 


جغرافيا فيها الامكنة 


مرسومة بشموس الصباح 


فِكرك براح الاجوبة

هايزيد هيام المعشقة


متصدقيش


فلاش باك ... لعبة منطق


فِكرك لما هاتوة فى عيونك 


هالقى بعد التوهة 


خط نهاية 

بيكشف اصل الفرح الواضح 


جوة عيونى 


لما بشوفك ابيض واسود جوة الكادر


شايلة فى قلبك 


حس سذاجة سينما قديمة 




فى عمق الكادر 


واقف هو ... راسم ضحكة 


شر هايجى 




ليل \ خارجى 


ظلام اول ... ظلام ثانى 


ظلام خامس عشر


خدعتنا الاحلام 


او جايز مخدوعة معانا 


ومنين هاتجود .. الارض البوٌر 


بغيطان الورد




شوًفان العلم 




إزاى تشوف الكون وسيع 


من خرم إبرة ملوش حدود 


فى الجهل .. طفل مفطوم عالخيال 


راسم طريقة للقمر 


ومعرفش يعنى إية جناح

او إية هايبقى .. او اية اللى راح 


( فى الاطار الدرامى)


ملوش فى صنع الحدث 






مشهد ختامى 




فارغ  جدا  مالاحداث



3 comments:

ســـــــهــــــــــر said...

الصمت مش دورك
لو كلمتك سيفك
ازاى تكون فارس
المشهد المحذوف
بيكرر الحيره
ف تتابع الاحداث
و الفيلم مش اكشن
( ساسبنس ) اه يمكن
و دراما محسوبه
و الكلمه مكتوبه
بحرفنه ممكن
لكن الالم فيها
مش حرفة الموجوع
رجعنا للموضوع
الكلمه فى الممنوع
راح تحذف المشهد
لكنى راح اشهد
كان فيه هنا انسان
صدقنى مش ندمان
ع اللى انكسر بيا
ع اللى انتحر فيا
و اللى ما هوش راجع
و رجعنا لمواجع
معلش يا صاحبى
اصل الوتر مخلوع
شديته كان محنى
و صلبت له عوده
دندن عليه لحنى
لو يوحشك صوته
لو يوحشك صوتى
ابقى افتكر موال
عالى الجبين مرفوع


----------------


كنت بكتب ده و بعدين جيت اقرا هنا فلقيت السيناريو الافتراضى العالى جدا
الواجع جدا
المنطقى جدا جدا
تحيه لروعتك

Anonymous said...

مع انك مقلتش موافق اكمل ولا لا بس حبيت اعلق لانه بجد روووعه مع رنة الحزن المدفونه فيه
الاول كل سنه وانت طيب بالمناسبتين العيد وعيد ميلادك
ثانيا فيه حد يغمقها كده في يوم عيد ميلاده
بحسه ان فيه احساس الخوف من الفرح و هروب منه و الارتماء في احضان الحزن اللي فيه ثقه اكتر من الفرح
حيره من وضع الحياه اللي مبيرساش على بر
بس استغربت اوي من الدموع و تفسيرها في الموضوع ليه ؟!!!
كانها معناها تمثيل مع انك قايل ان الاهه مكبوته من سنين يبقى اكيد الدموع حقيقيه بس يمكن بتحاول تخفيها ولا ايه
الموضوع كله كده حاله جميله من الاحاسيس المتشابكه
الكلام كتير بس سؤال اخير من غير ما تضايق عايز ترد عليه رد مش عايز دي حاجه تخصك
هوه انت عندك كام سنه بالضبط لاني شفت كذا سنه لتاريخ الميلاد فمفهمتش و لا يمكن مش انت

واحد مش فاهم حاجة said...

سهر

الصمت والمشهد المحذوف كلمتين لمعنى واحد بياثروا فقدرتنا لتحديد نوع الفيلم بيفكرنى بفيلم اسمة stranger than fiction كان البطل مطلوب منة يحدد نوع الرواية اللى هو عايشهاسواء كوميدى او تراجيدى عشان يقدر يحدد نهاية الرواية

انتى اخترتى المشهد المحذوف وانا اخترت فكرة الفلاش على جزء صغير من الصورة

الفرق ان النص بتاعى ظهر اضعف من الروعة الموجودة فى نصك واللى مش بسمحلك ابدا تنادية بكلمة "دة" زى ما كتبتى فى تعليك

الف شكر لتعليك وخالص احترامى لقلمك




---------------------------
Anonymous

يا فندم المدونة كلها تحت امرك بس هى الفكرة انك تكتبى بس اسم مستعار عشان اقدر احدد اذا انتى هو انتى ولا انتى حد تانى

- كل سنة وانتى بالصحةوالسلامة هو عيد الاضحى وعيد ميلادى وعيد ميلاد المدونة تلاتة فى واحد وبالنسبة للبوست فدة انا كتبتة من زمان يعنى مش مقصودة انة ابقى غامق او كدة والفرح والحزن مسائل نسبية حتى البوست اللى انتى وصفتية انة هروب من الفرح او ارتماء فى احضان الحزن هو بعيد عن دة كلة تقدرى تقولى هو استفهام او تعجب
والدليل الصيغة الاستفهامية الموجودة كتير بس انتى ليكى مطلق الحرية فانك تاخدى المعنى اللى وصلك من اول قراءة لان هو دة الغرض من الشعر


- الانسان اللى يقدر يصتنع الدموع لانها مكتوبة فى السيناريو يقدر يصتنع الاهة المكبوتة برضوا لانها برضوا فى السيناريو وحتى لو كان تصنع فهى بتعبر جزئيا عن حالة جواة


السؤال الاخير

هو انا كنت لحد امبارح 21 سنة صحيت الصبح فجاة ولاقيتنى كبرت فجاة وبقيت 22


منورانى