ازايز الاحلام

مفتتح :

سرقوا الضحكة ... عبّوا الخوف جوة أزايز الأحلام

قرب وإسال .... يا اللى لساك قادر تحلم

قولى يا عمّو الحلم بكام

إرفض وإخلع

كل مظاهر جهل العالم

إشخط وإنطر

وإعلن رفضك للتطبيع

ويا قانون الخوف الازلى

ضاع من عمرك عمر بحالة

شايف ضعفك وانت قوبالة

وازاى ساكت ؟ !

فاكر صورتك

لما اتسرقت منها ألوانها

متبقاش غير ابيض واسود

فِكرك لية ؟

لأجل ماتحزن

وف ضلمة حزنك ترجع تحزن

تكبر جوة ضميرك عتمة

تفقد شوفك

تخبط تكسر

تقلع شجرة حلمك منك

تصبح بوّر

جواك ساكن شىْ مكسور

مسجون حلمك فى البتارين

عاجز وسط احلام تانين

واحد يضحك

واحد يغمز فى استخفاف

واحد يسال

عموً يا عموً

قولى بسرعة الحلم بكام