Pages

09 March 2008

الحزن المبين

DSC04400_sm.sized

الخوف قفل

كل الدروب

مش باق لينا

غير يادوب

كلمتين عن الخيانة والخداع

وموسيقا هادية

فى الوداع

من عزف أوتار القلوب

ومعدش باقى غير يادوب

ورقة نبـــــــــات

راقدة وفى حالة سكات

جوة خيوط العنكبوت

بتحلم تموت

أو ينتهي بيها المطاف

في بير غويط

تشرب حياة


تصبح خضار

شجر بثمار

وتقطع خيوط العنكبوت

ومعدش باقي غير يا دوب

حالة شجن

فيها اتسجن

عصفور وطالع مالعدم

معرفش معنى للألم

غير لما فكر في الحياة

على إنها

كتلة مشاعر

دراما طايرة للسما

وفى السما ولأنة طالع مالعدم

اتعاقب على كونة ثاير

هووووووووووب

اتسجن

جوة اطارة مالشجن

وماعدش باقى غير يادوب

فقرة يتيمة

فى مسرحية النهاية

مشهد ختامى

وقف البطل

وفى ايدة سيف

على خلفية الحزن المبين

بيقول بيان الانتصار

في يومنا هذا

قد عبرنا

قد كسرنا

للهم الحصار

ويثقف الجمهور بشدة

الشكر واجب علية

وهووووووووب

انقفل عنة الستار

في حاجة ناقصة في الدراما

في كسر في سيناريو الرواية

في حزن في فروع الشجر

في خوف وماشى في الدروب

في دمعة في عيون البطل

على خلفية

الحزن المبين

40 comments:

بطوط حبوب said...

مش باق لينا غير يادوب كلمتين عن الخيانة والخداع
------------------
والله ما عارف اكتب
بس اصعب حاجه انك تكتب كلام مؤلم اوى لناس متألمه اوى بيمر عليهم زى سكينه حاميه اوى اوى اوى

د/اجدع بنوته said...

وجعتنا كالعاده

تحياتى

ضــى القمــر said...

كلمات فى منتهى الروعة والقسوة ..

ولكن دائما يكون الحزن هو الألهام الذى ينثر اروع الكلمات والأحساسيس ..
وبكل صدق ابدعت . ابدعت

لأول مرة يا اخى ادخل مدونتك .. وبكل صدق وجدت بها راحه نفسيه غريبه ..

أسمحلى اضيف رابط مدونتك بمدونتى ..

Desert cat said...

كلمات خارجه من عمق الاعماق
نابعة عن قلب مجروح واحساس مش لاقى طريقه حاسس بفقدان لكل المعانى
حقيقى قلبى وجعنى
دمت بكل ود

Unknown said...

بطوط حبوب

متاسف اوى اذا كان الكلام كان صعب

بس فايدة الكتابة او التدوين


مش هاتتم الا اذا استخدمناها فى التعبير عن مختلف الاحاسيس

Unknown said...

اجدع بنوتة


يا دكتورة

متاسف جدا

خالص تحياتى

Unknown said...

ضى القمر

مش الحزن بس هو اللى بيلهم

ممكن تقولى ان الحالات الواقعية

هى اللى بتلهم الانسان

وكل ما تزيد الواقعية

بيزيد العمق

بشكرك جدا على رايك

وانا هاكون اسعد لو شوفت لينك مدونتى عندك


منورة

Unknown said...

قطة الصحراء

بجد بتاسف تانى وتالت لكل حد الكلام

اثر فية زيادة عن اللزوم

ووصل بية لدرجة الوجع

اعذرينى

اخر مرة


شكرا اوى على رايك

واحساسك اوىبالكلام

دمتى بكل خير

Rania Lelah said...

اعجبتتى كلمات عند صديق
تقول
ان الالم العظيم يصنع المعجزات
هذا هو حالنا
حزن اصبح كظلنا
اول مرور
مودتى

(( قيثارة الأحلام )) said...

كلماتك بتوصف اللى جواك عايزه اقولك ان الوجع هوا اللى بيولد الاحساس والقلب المرهف صدقنى لو كنت سعيد سعاده مطلقه مكنتش هتعرف يعنى ايه حياه احساسك فعلا جميل

صوت من مصر said...

بجد 100 مره اقول انت من الافضل تسمى نفسك واحد فاهم كل حاجه
بجد البوست جميل جدا

موناليزا said...

موجعة جدا بس تستاهل تتقرا اكتر من مرة
أحييك

حمامة said...

عصفور وطالع مالعدم
معرفش معنى للألم
غير لما فكر في الحياة
على إنها
كتلة مشاعر
دراما طايرة للسما
وفى السما ولأنة طالع مالعدم
اتعاقب على كونة ثاير
هووووووووووب
اتسجن

جميلة رغم الحزن اللى فيها

لكنه هو اللى خلاها جميلة

على فكرة انت فنان بجد والله

فضفضة said...

اية الروعة دى


عظمة جامدة جدا

مؤلمة اه موجعة اه

بس رهيييييييييبة

وبرفع القبعة احترامى استاذ والله

تحيااااااتى

shirry said...

علي فكرة بجد البوست جامد جدا
هو فعلا حزن مبين مش عارفة ليه مع ان المحلاوية بيحبوا الهيصة
بس طبعا كل واحد فينا وله لحظة كدة
بس بجد احساسك عالي جدا
واختيارك للكلمات كمان موفق كدا
بجد تسلم ايدك
مستنياك بقي

ساعه الغروب said...

مش عارفه اقولك غير انه كلماتك لا تقرأ بالعين بل تقرأ بالقلب فقط




ومعدش باقى غير يادوب


ورقة نبـــــــــات


راقدة وفى حالة سكات


جوة خيوط العنكبوت


بتحلم تموت


أو ينتهي بيها المطاف


في بير غويط






بجد ما شاء الله عليك

سامحنى لو بجد جيت هنا بعد كدا قريت وبس لانى فعلا مش بلاقى كلام اعبر بيه عن مدى تاثير الكلمات فيا


شكرا ليك وادام الله عليك احساسك لانه اصبح عمله نادره فى عالم البشر

يا مراكبي said...

الموضوع باين من أول عنوان البوست على فكرة

مؤلم جدا إن الأحداث والنهاية تكون من النوع ده: حزن ومبين كمان

ما بأحبش الحزن لما يكزن مسيطر ومنتصر بالشكل ده

لكن بيحصل للأسف

OldCatLady said...

مش لاقيالاك كلام....حالة ابداع على نوستالجيا و رفض و سخرية ووجع و كلو فى بعضو...بقولك ايه


حد قاللك قبل كده انك انسان بجد؟؟؟

مظنش

مليون تسلم و مليون تحية ليك

ღϠ₡ღأمير الهدوءღϠ₡ღ said...

جميل جميل جميل جدا

بجد الواحد اتألم وهو بيرا الكلام

:)

تحياتي

Anonymous said...

سلام يا فنان وجعتنا والله
ممكن سؤال؟؟متعرفش مصطفي بتاع صراخ جمجمة راح فين؟؟؟؟ شهر والتاني والراجل لا حس ولا خبر والله كانت كتابته روعة والله محدش شاف مصطفي يا جدعان
يا تري انت فييييييييييييين يا مصطفي
لي لي

Anonymous said...

يا ريت ترد عليا ضروري جدا مش لحاجة والله الا اني عايزة اعرف الراجل مبقاش بييكتب
لييييييييه؟؟؟؟
ولو بتكلمه قله احنا خلاص هننزل ديروط وننده يا تري انت فين
يا مصطفي؟؟؟؟؟؟؟؟؟؟؟؟؟؟؟؟؟؟

Unknown said...

رانيا

ساعات بشوف الحزن هو الحالة اللى بنتعلم

فيها

يعنى تقدرى تقولى عليها هو المدرسة اللى بنتعلم فيها

ازاى نعيش

شكرا على زيارتك

واتمنى تكون دايمة

تحياتى

Unknown said...

قيثارة الاحلام

معلش انا هاختلف معاكى

الاحساس مش ناتج من الحزن بس

يعنى فى احساس حزين

وفى احساس سعيد

وفى احاسيس كتير

بمدى عمق احساسى بيها

بقدر اعبر عنها

ولو انا فكرت اكتب عن الحزن فى وقت الفرح او العكس بعتبرها نوع من السخرية من نفسى
ومن الوضع

بس برضوا المحاولة بتبقى جميلة

Unknown said...

صوت من مصر

شكرا يا باشا على رايك الجميل دة


وخلينا مش فاهمين احسن

هما اللى فهموا كانوا عملوا اية

تحياتى

Unknown said...

الموناليزا

اسف على موضوع الموجع

واتمنى انك تكونى استمتعتى بيها

واتمنى اكتر انها تكون عجبتك

Unknown said...

حمامة

اعتز برايك كتير

وبشكرك علية جدا

تحياتى

Unknown said...

فضفضة

شكرا يا ست الكل

والواحد ان مكنش يفضفض هنا كان هايفضفض فيين بس

اسف على الالم اللى ممكن تكون سببتة

وبشكرك على وصفى بالاستاذ

تحياتى

Unknown said...

Cognition-sense

شكرا على رايك

تحياتى

Anonymous said...

ازيك يا فنان



يا ريت تعبرني
وتقولي

مصطفي بتاع صراخ جمجمة
راح فين
لي لي

Unknown said...

لى لى

والله يا ست الكل انا كنت جايلك فى السكة

اهو

انا بصراحة برضوا بدور علية

هو كان بيكلمنى كتير عالميل

واخر مرة كلمتة

كان من حوالى شهر كدةاو شهر ونص

وبعد كدة مش بشوفة اونلان اتمنى يرجع

بسرعة


لو وصلتى لحاجة بلغينى

Anonymous said...

متشكرين علي الرد يا فنان

بس انا لا هعرف اوصل لاي حاجة ولا عندي ميل من اصله

بس اخوان النت لازم يسئلوا
علي بعض
وخصوصا اني كنت بخنقه بخالد كساب
مش عارفة ليه طفش وساب القراء كدهوت

يا تري انت فين يا مصطفي؟؟؟؟؟؟؟؟؟؟؟؟؟؟؟لي لي

doda said...

طب انا راضيك زمتك وضميرك
ازاى اسمك واحد مش فاهم حاجة وتكتب الكلام الجامد دة

هو فى حد يبقى مش فاهم حاجة ويكتب الكلام دة

وبالنسبة للدراما بقا والرواية والمسرحية والحاجات دى بندرسها دلوقتى لما ابقى استفيد منها اكتر هبقى افيدك ان شاء الله عشان تبقى اكثر فهما ومتقولش على نفسك واحد مش فاهم حاجة.

max.adams said...

بما اني جاي متأخر كالعادة وحاطط وشي في الأرض و بفحص الجزمة يا ترى بتلمع ولا الإسكافي خدعني ..... أقدر أقوللك الحزن أصل الحياة مزروع في كل ركن من المكان من زاوية المسرح لحد زاوية المثلث التلاتيني ستيني و من زاوية صورة الغروب اللي بيموت فيها النهار لزاوية صورة الشروق اللي بيموت فيها الليل ومن زاوية مدونتك لزاوية كل المدونات الحزينة أو اللي أصحابها حزانى فإنني من هذه الزاوية بقوللك تقدم كلامك في الشبكة

سلام يا أجمد مش فاهم

ابو العربى said...

اخى الكريم كلامك اكثر من رائع
مؤثر للغايه
تقبل تحياتى

تايه في وسط البلد said...

اول مرة استعذب الالم !!
مع هذه الكلمات اصبحت حتي ان الالم لا يقارب الضعف في شئ بل هو للقوة وللعزة اقرب

Anonymous said...

اسفة بقي مفيش مكان تاني اكتب فيه
mustafa you canot go and leave your readers feel the with drawal symptoms>>plz 3333oooodddd you are athing dosenot look like any thing
?????????

Mkjwe said...

كلام جميل ورائع والله
والي الامام دائماً
تحياتي

(( قيثارة الأحلام )) said...

حزنك مدى كلماتك احساس رائع

Tamer Nabil Moussa said...

ازيك ياصاحبى

عامل اية

-----

الدنيا والحياة ياما فيها

المهم الواحد يكون عندة امل ديما على طول

تحياتى

ANN said...

كلامك رائع مؤلم حزين ...يشرفنى انى فى مدونتك