انا مش شاعر

يا ابنى انت عمرك ما هاتكون شاعر طب لية كدة لانك معندكش احساس ايوة بقولهالك انا مش شاعر لكنى بحس بحس بيك وبيها وبيهم من نظرة عينكم من غير ما تحكى من غير ماتقول انا رسمت بكلامى صور ليكم كلكم بلاش الضحكة المستفزة دى انا بتكلم بجد انا مش شاعر انا انسان بقول كلام باخد حقى بية حتى لو ما جاليش حقى كفاية ان كلامى هايرسمنى قدام نفسى انسان بنى ادم لة حق وبياخدة حتى لو مش باخدة فى الحقيقة بس انا اخدتة بكلامى زمان من حوالى عشر سنين كانت اول حاجة كتبتها عشان اخد حقى اة واللة حقى
قلبى فى حبك تاة واحتار انتى بهيمة ولا حمار ساكنة فى قلبى كانة زريبة شوفت معاكى الدنيا غريبة لو يوم شوفت الكلب اقول لولو حبيبتى مش معقول بئك قد بئ الفيل وبربورك قد النيل وشك زى طبق ملوخية من غير توم ولا تقلية اللة يصبرنى عليكى واتحمل ريحة رجليكى


كبرت شوية حبيت اقول لمصر كلمتين فطلعت كلام كلة الم وحسرة مع انى كنت لسة صغير بس كنت حاسس لانى مش شاعر انا انسان بيحس

بارد يا حضن الوطن بارد وفيك احساس القلوب شارد مجروحة قلوبنا لكن عايشين تايهين فى بحور السنين خايفين نصرخ بصوت الانين ومش عارفين جنون البشر واخدنا لفين عايشين على ماضى غرقان فى بحور السنين يامصرى قوم هش الوطاويط واخبط دماغ اللى يخون فى الحيط يامصرى عيش ولو ثانية حويط ولا انت غاوى تعمل دماغ تظبيط يامصر ابنك عايش وسط الحياة محتاس يركع يبوس ويعشق رجول الناس مش عارف يوم يبيعك ولا عارف يقتل الاخلاص ومستنى يوم ماترفعية فوق رؤوس الناس زهقت منك ومن ابوكى لكن بحبك حتى لو العبيد حكموكى انا لية بحبك يا مصر لية؟ بحبها ومش عارف سبب لحبها بفرح لها وقت الفرح والظلم مالى ارضها بنزف دموع لو تنكسر برغم قسوة اهلها فيها حلى اللى ضاع وانتهى ودمعى اللى كان بيروى ارضها لكنى لسة برضو بحبها


بس برضوا منيش شاعر



يلا مش مهم

بالشفا

والعوافى عليكوا بقى