Pages

09 June 2008

بيان هام






بند رقم واحد


نعلن نحن

تأميم فكرى

يشطح يجرى

يعبر حاجز الحلم الوردى

يسبح جوة فضاء الصمت

يلعن كل ظلام الامس

ويلمس شمس

يجرب يسكن ..... جوة الممكن

يصبح ذرة

مخزن طاقة .............. شعاع مالنور

بلّور مسحور

يقابل نجمة ............... يتوة فى شعاعها

ويزول فاصل

بين تكوينة .................. وبين تكوينها

يصبح كونها

يعبر بيها خط مدارها

وأرجع تانى أقول من تانى بيانى الهام

البند التانى

هاخطف ضحكة من تكشيرتى

أكمل بيها باقى مسيرتى

هامشى ف شارع فاضى لوحدى

وأكسر كل عقارب ساعتى

وألغى الباقى من مواعيدى

واشرب شاى

على قهوة صعيدى

وأتنهد ... تنهيدة عاشق

وأرتل ... ترنيمة شاعر

يتبعتر ... للحزن جموع

وينور...... ف ضبابى شموع

وأتخيل

إحساسى مدينة

مرصوص الضحك ف بترينة

وف قلبى رصيف للعشاق

وف عينى للخوف ترياق

ولذلك

البند التالت

راح اذيعة من ننّ عنيكى

فى عنيكى ..... توهان وغموض

إشارات .... رافضانى أعود

فى عنيكى ..... رسمانى شيطان

بيشكل ..... حزن الانسان

فى عنيكى .... انا شوق نساى

وبينكر كل الاحاسيس

فى عنيكى

انا فرح رخيص

وكأن بنايا اللى ف قلبك

كان مبنى من غير تراخيص

وطبيعى

واحساسى بيحكم

إنى أهدم

إنى أرحل

إنى أحزن

إنى أندم على ننّ عنيكى

ولذلك بعلن وبشدة

مش هاندم

على ننّ عنيكى

الرابع : بيانى دة كاذب


الخامس : على بكرة هاحاسب


السادس : انا حر طليق

السابع : فى الحزن حياة

التامن : فى الحزن علام

التاسع : انا بشكر زوقك وقبولك انك تقرا فى تخاريفى

العاشر : انا بحلم

انا بحلم ببساط الريح











ليا عندك طلب صغنون او ممكن تعتبرة مجنون

انا هابعد عن التدوين فترة من يوم لشهرين

اصل الوضع مش مضمون

فى دماغى حاجات كتير



بحلم اتعلم السواقة واشتغل سواق

ممكن ادعى الغباء

او ممكن تشوفنى فى هوليود

ماسك العود

وبغنى انشودة دانتى

الانشودة الخامسة فى الجحيم

او امسك الهوا بايدى زى حليم

او ابعت لميج رايان ايميل

ممكن اشرب الشاى مع نابليون

او اخد القهوة مع محمد عفيفى

تحت ظل تمارا واحنا بنشم فى ريحة اللمون

ممكن اقنعة يكتب رواية

تبقى انتى فيها التفاحة وانا الجمجمة

او اشرب عرقسوس مع ابن الفرد او الفرض

مش عارف هى بالضاض ولا بالدال

هاقنعة يكتب قصيدة غزل فى كعب رجلى

اكيد رجلى اليمين

لان كعب رجلى الشمال

فية تعويرة من زمان

من وانا فى رابعة ابتدائى

عورهالى واحد اسمة ميدو جميل

فكرة
ممكن ابن الفرد يكتب قصيدة هجاء فى ميدو جميل

يبعتهالوا عالموبايل

نمرة موبايلوا

زيرو واحد زيرو ستة اربعين تسعين تلاتين

وليسقط عباس العبد

ويبقى احمد العايدى احد من كتبوا فى مجانين

هاقنع ديستويفسكى انة يجعل بين الاخوة كرامازوف محبة بدل العداوة

امتثالا للمثل الشعبى

الصلح خير

ممكن اقابل غاندى

واحاول اثبتلة ان اللى حصل فى المحلة

مكنش خروج عن افكارة السلمية للاعتصام المدنى

هافهمة نظرية البادى اظلم

هاشرحلة الفرق مابين ظلم الاستعمار وظلم الحكام

اكيد مش هاحاول اقرب من ليوناردو دافنشى

وهاقول لانيس منصور ان اللى يفكر انة فهم دماغ النساء

يبقى حمار

بحلم من زمان ارقص بالية

على موسيقا بيتهوفن

معزوفة الفرح او السعادة

مش فاكر

هو الفرح هو الاشمل ولا السعادة ؟

مش عارف

بس الافضل هو شعور الانتخة

هو انا مت ولا وصلت للانتخة












43 comments:

Anonymous said...

جامدة
عجبتنى اوي
بجد انت موهوب
مستنى اول كتاب ليك

تهامي

rtrcbh said...

السلام عليكم ورحمه الله وبركاته

حقا الكلمات جميلة واعجبتنى واعجبنى اسلوبها وفكرتها

وليس تسجيل حضور ولا فتح باب

وفقكم الله وجزاكم خيرا

والسلام عليكم

zahra said...

كل ده و بتقول انك مش فاهم حاجة
مشكلتك انك فاهم اكتر من اللازم

فعلا كلمة موهوب قليله قوى

Coca said...

رووووووووووعه بجد
علي راي زهره الياسمين
ازاي مش فاهم حاجه
دا انت سيد الفاهمين هههههه
اكتر حاجه عجبتني اوي يمكن علشان عايزه اعملها
هاخطف ضحكة من تكشيرتى

تحياتي بشده

بيتنا القديم said...

"هاخطف ضحكة من تكشيرتى"

(:

والله

انت

جميل

بجد

ده

احساسي

باللي

انت

كتبته

(:

بالشكل

ده

اتمنى

ان

تظل

مش

فاهم

حاجه

(:

فوكيره said...

حلووووووووو اووووووووووووووى

اووووووووووووووووووووووى اوووووووووووووى

بجد ... حلو اوى الى انت كتبته ده

بما فيه من جد ومن هرتله ...
رغم ان الي واصل منه انه سببه حزن ما ... يمكن ...!!

متمناش في يوم يحصل واي مدون يبعد عن التدوين ...

تحياتى لموهبتك العفويه ...

OldCatLady said...

يااااااه يا مصطفى فاتنى كتير فى الفترة اللى بعدت فيها عن الحياة كلها دى
بالذات هنا فى مدونتك لما قريت كل اللى فاتنى فيها حسيت انى فى وقت اتسرق منى و وقت طويل كمان
أتكلم بقا عن البوست ده بالتحديد
البند التانى و السابع و التامن..يندرجوا تحت بند العبقرية أنت لا مت ولا و صلت للأنتخة انت يا عزيزى وصلت للفلسفة
انا فرحانة قوى قوى باللى قريته أسلوبك اتطور و زاد غموض بس غموض ساحر
تصدق من زمان كان نفسى اقرا كلام زى كده
نفسى انا كمان اخدلى أجازة من الدنيا و أعيش حاجات انا عارفة كويس انى هعيش و أموت من غير معملها
خد أجازة لو هترتاح بيها و فيها بس تبعد عن التدوين مش هينفع...يعنى مش هينفع ...

بس كده
سلامات يا فنان

مؤمنه said...

السلام عليكم ورحمة الله وبركاته
أنا كل ما أقرا بوست فى الدونه دى بحس انى مش فاهمه حاجه ويمكن دى يكون سبب قلة تعليقاتى
هو البوست من أول البنود جميل جدا وعجبنى
وفيه قرارات اتاخدت واتحسمت ومشاعر اتعبر عنه بصوره موجزه
اما بعد كده جهازى العقلى ما قدرش يستجيب
كل الناس دى ممكن تقعد معاها
طب انت كسرت عقارب ساعتك بس هما ساعتهم اتسرقت ولا ايه
وليه فكرة البعد عن التدوين
على العموم كل واحد ادرى بظروفه
ونتمنى مزيد من التفائل كما وعدتنا فى البنود
والسلام عليكم ورحمة الله وبركاته

-_- said...

صيف سعيد لك وللجميع

آفاق الحرية said...

السلام عليكم
اولا انا اشكر حضرتك كثيرا علي زيارتك الكريمة للمدونة
ثانيا انا من المحلة فيا ىريت حضرتك تقولي انت منين من المحلة
ثالثا بجد انت موهوب والاسلوب اكثر من جميل

ساعه الغروب said...

msh 3arfa a2ol eh bgd??


يسبح جوة فضاء الصمت

يلعن كل ظلام الامس

ويلمس شمس

يجرب يسكن ..... جوة الممكن




هاخطف ضحكة من تكشيرتى

أكمل بيها باقى مسيرتى

هامشى ف شارع فاضى لوحدى

وأكسر كل عقارب ساعتى

وألغى الباقى من مواعيدى



السادس : انا حر طليق

السابع : فى الحزن حياة

التامن : فى الحزن علام





او ابعت لميج رايان ايميل







هو الفرح هو الاشمل ولا السعادة ؟




el gomal di k3adt ktabatk lmstni awi

msh 3arfa bgd a2ol eh !!

bs ha2olk zy kol mara rabena ydim 3lek
e7sask

bs ana el mara di msh metaena !!

ya rab tkon b5er

tamena 3lek f a2rab w2t momken

maioya said...

هاخطف ضحكة من تكشيرتى

أكمل بيها باقى مسيرتى

هامشى ف شارع فاضى لوحدى

وأكسر كل عقارب ساعتى

اكتر حته عجبتني
وخصوصا هاخطف ضحكه من تكشيرتي
هاحاول اخطف انا كمان كده:)
بجد البوست عجبني
رغم طوله بس محسيتش بملل
تحياتي :))

أسوور said...

جريدة الأسرة العربية
قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها وصورهم
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى

amyasser@hotmail.com

أو بتعليق على هذا البوست نفسه
يترك لينك البوست اللى عايز ينشره الجرنال له
تحت عنوان جريدة الأسرة العربية
الشـــــــــــــــــروط
-مراعاة الصحة اللغوية والنحوي والإملائية قدر الإمكان.
-مراعاة الا يزيد البوست المراد نشره فى الجريدة عن صفحة ايه فور.
- أولوية النشر تكون للبوستات التى فيها موضوعات عامة تهم فراء الصحف.
-اولوية النشر للبوستات التى ترسل على الميل المذكور أعلاه كفايل وورد مرفق.
الجريدة تصدر الإثنين من كل أسبوع

Anonymous said...

بصراحه جامد جدا

وسلس اوى

وعجبنى حاجتين

ايما لميج ريان

وانيس منصور اللى عامل فيها فزلوك

وخنقنى من طريقه كلامه عن الست


تقبل مرورى

NilE_QueeN said...

والله واحشنى كلامك

Unknown said...

اسلوبك جميل
و طريقتك ف يالكتابة مش شبه طريقة حد

في ناس كتير بتحاول تقلد ناس تانية
بس انت
لأ
انت خيالك منفصل و ملون
كلامك عجبني

محمد حلمي مخلوف said...

سيدي العزيز انت شاعر مهم تملك ادوات الكتابة الشعريه من موسيقي ولغة وصور شاعرية جميلة
اعجبتني الفكره قصيدتك الرائعة تحمل رؤية عميقة وفقك الله

Unknown said...

بنى ادم مع وقف التنفيذ

فرحت اوى بتعليقك يا تهامى

وباذن الله لو فيها كتاب

يبقى مستنى توقيعك علية

واخلى الصفحة الاولى

تحليل نقدى منك

والتانية وصف تحليلى

اقولك

احنا ننزل تحليلك ونقد على الكتاب

ونبقى ننزل الكتاب بعدين

منورى يا ملك

Unknown said...

د/أبويحيى وادم

منور يا دكتور

انا بسعد جدا باى راى

واتمنى متكونش فاهم كلمتى بعدم فتح باب للمجاملات غلط

انا بس بتمنى دايما

ان التعليق يضيفلى
لانى بحب اتعلم من كل واحد بيزورنى

عشان ابقى افضل فى المرة اللى بعدها

تحياتى ليك ولا ليحيى ولادم

Unknown said...

زهرة الياسمين

مشكلتى دايما انى بتفهم غلط

شكرا على رايك

واتمنى يطلع كلامك صح ( اطلع موهوب بجد )

ويعجبك الكلام فى الزيارة الجاية

Unknown said...

كوكا

اخطفى ضحكى ووزعيها على كل اللى حواليكى

وبكدة اقدر اقول على نفسى سيد وعمدة ورئيس منظمة الفاهمين


منورانى

Unknown said...

بيتنا القديم

والله

انت

اللى

راجل

زى

العسل

بفرح

اوى

لما حد

بيعلق

ويقولى

انى

قدرت

اوصف

احساسة

اية يا عم التعليق دة

تعليقك عامل زى البيت الجديد

اللى اتبنى بعد القديم

تعليق 10 ادوار

تحياتى

Unknown said...

فوكيرة

اممممم

انا مش عارف بجد كل التعليقات ورا بعض
عجبها الكلام ومع كل تعليق بفرح اكتر

كونى انا اللى كتبت الكلام دة اللى عجبهم

وعجبك اكيد بيرفع المؤشرات المعنوية عندى شكرا جدا

وانا برضوا متمناش ان اى مدون يبطل تدوين

بشكر ردك على كلماتى العفوية

Unknown said...

صيدلانية مطحونة

تسعد المدونة وصاحبها بكونها تحمل جزء كاد ان يضيع منكى فى زحمة ما يسمى مجازا بالامتحانات

انتى اخترتى اكتر 3 بنود حبيتهم

بالذات التانى تخيلى كتبتة وثقفت لنفسى

مش لانى ابدعت فية لانى فى الحقيقة لسة موصلتش لدرجة الابداع بس لانى لاقيتنى فية اوى

لاقيت فية شعور الانتخة بمفهوم الانتخة اللى عندى

خالص تحياتى

Unknown said...

انا مش عارف اقول ايه لان التعليقات اللى قبلى قالت كل حاجه انا عاوز اقولها
بس انا فعلا لما ببقى عندك بحس انى بعيش لحظه صدق مع نفسى حزن بصد او سعاده بصدق مش عارف بس اللى عارفه متأكد منه انى بحس معاك بالصدق

هبة النيـــــل said...

مش بعرف أجامل يا أستاذ مش فاهم حاجة

بس المدونة ككل تصفحتها سريعا مؤقتا لأني لسه مكتشفاها حااالن

وقرأت التدوين الأخير لك

لا ينعكس منه إنك مش فاهم حاجة لكن يبني شكلك فاهم كل حاجة

هفصصلك المكتوب ولو تسمحلي يعني

بس انتظريني غدا ان شاء الله

صعيدة اني اكتشفت مدونتك دي

أختك هبة

Unknown said...

مؤمنة

كيف الحال ؟

سعيد جدا بتعليقك بعد غياب طول عن التدوين

انا بكرر اسفى ليكى ولاى حد

دخل هنا عشان يقرا حاجة يفهمها وانا معرفتش اوصلة الفكرة لانى انا فى الاساس مش فاهم

وكونك تطلبى من مزيد من التفاؤل

يبقى كدة انتى وصلك انا كنت بقول اية

وانا موجود فى التدوين
اتمنى بقى رجوعك انتى واستمرارك

خالص خالص تحياتى

Unknown said...

شارم

صيف سعيد لنا جميعا وحياة اسعد

فكرتنى بديفيد سانتوس

Unknown said...

افاق الحرية

اولا : انا اللى سعيد بزيارتى لمدونتك وبزيارتك لمدونتى

انا دورت على ميلك فى مدونتك ملقوتوش

ياريت تكلمنى عالميل

منتظرك عالميل

Unknown said...

ساعة غروب

كدة 14 دقيقة قاعد بفكر فى تعليق اقولة ليكى

اعبر فية عن سعادتى لما بتعلقى عندى

وكمان لما بلاقى كلامى بيلاقى اثر طيب عندك

انا بعشق
الممكن

وبكرة ظلام الامس وباخد منة النور بس

ممكن اسرق الضحكة لو ملقيتش ليها طرق شرعية رغم حبى للشرعية

وبرضوا بقدس الحزن وبحترم تفاصيلة

وبحب ميج رايان

اما تعبيرات الفرح او السعادة ميين فيهم الاشمل

مش هاتفرق مادام الكلمات لمست حد

وانا فرحان لو الفرح اشمل

وانا سعيد لو السعادة اشمل


تحياتى

Unknown said...

may

اخطفى ضحكة بسرعة

اخطفيها من حد مش محتاجها

وياسلام لو ضحكة اطفالى من اللى طالعة مالقلب

تحياتى لمرورك وعبورك و سلامك

Unknown said...

اسور

بشكرك جدا عالدعوة دى

خالص تحياتى

Unknown said...

همس

انا قعدت مع الراجل وحاولت افهمة

بس منشف دماغة

مش عارف بقى انتى بتتعاملوا مع الفزاليك (جمع فزلوك ) بس عاوز اسمع اخبار حلوة عنة


شكرا على رايك

Unknown said...

NilE_QueeN

ربنا يوفقك فى امتحانات الثانوية العامية

وترجعى تانى تقرى براحتك

Unknown said...

شيماء على

انا حلم من احلامى انى لما اكتب

ابقى مش زى حد

تعليقك ادانى دفعة انى اكمل

ومش هاقدر اكمل باسلوبى الا لما اقرا ارائكم ونصايحكم

اتمنى دوام الزيارة

خالص تحياتى

Unknown said...

محمد حلمى مخلوف

اشكرك جدا

واشعر بالفخر لان هذا الراى اتى من

كاتب يحمل هو الاخر ادواتة واسلوبة القصصى

خالص تحياتى

Unknown said...

sasatifa

بشكرك يا درش على صدق تعبيرك وتعليقك

ويارب دايما افضل اكتب بصدق ويوصلك احساسى بصدق

ربنا معاك فى الامتحانات

Unknown said...

هبة النيل

المدونة اهى فصصيها وحلليها

وانا كلى عيون صاغية

وبحب اسمع كل الاراء

فمتحرمناش من رايك

مستنيكى

تحياتى

حمامة said...

جميلة جداً جداً
بس اللى عجبنى اكتر الجزء اللى تحت
بجد يابنى انت فنان
لو عايز تقعد مع نفسك شوية وتحرمنا من فنك مش هنقولك لأ
بس مش تطول بقى

الصورة اللى ف البوست جميلة اوى
والأجمل اللى فوق ف المدونة

:)

Unknown said...

حمامة

انا بشكر زوقك وقبولك ان تقرى فى تخاريفى


دة البند التاسع

موجود اهو مقدرش اروح فى اى حتة تانية

شكرا اوى على رايك

واتمنى دايما الكلام يعجبك

أسماء علي said...

عارف لما تقرا حاجة و تحس إن اللي كتبها
كتبها في لحظة جنون أو بمعنى آخر في لحظة سرحان من الدنيا وبس ..
لما تكتب وانت منفصل عن كل حاجة ع الأرض..
...
انا حسيت انك كتبتها كده ..
معظم الأحيان هادخل كل شوية عندك اقرا البيان ده ..

سالي محمد said...

جميل جدا ده ياخويا اللى بيسموه تداعى الافكار ولا ايه؟؟بجد من احلى الحاجات اللى قريتها

Unknown said...

دكتورة اسماء على

بينى وبينك

تعبت كتير وانا بكتبها

بس اخدت قصاد تعبى
كل التعليقات الجميلة دى

اللى مش محتاج اى دليل عشان احس فيها بالصدق

لانها بتشع صدق بذاتها

عارفة لية بقى تعبت
اصل صعب تنفصلى عن كل حاجة

عشان كدة انا برضوا بعدى اقراها كل فترة

عشان انفصل لفترة


وطبعا هازداد سعادة لما اعرف ان فى حد بيعمل زييى

خالص تحياتى ليكى


-----------------------------
سالى محمد


مش فكرة تداعى افكار قد ما هى انتخة

انتخة بقت مذهب فكرى يحترم

سعيد انها عجبتك ويارب البوست الجاى واللى بعدة وكلة يعجبك

تحياتى