Pages

03 June 2008

اهمية ان تكون جهاز


ان يائتيك احد الاصدقاء بوجة يحمل تعابير من انهى لتوة قضاء حاجتة فى احد المراحيض العامة

ويخبرك

بانك جهاز

فتبتسم انت بوجة يحمل تعابير من اتى لتوة من احدى مصحات العلاج النفسى

وتخبرة

ايوة انا جهاز

ان يخبرك السائق مشيرا الى احد عربات النقل العام بان الفوج الامريكانى فى العربية دى

فتدرك فى قرارة نفسك بان هذا السائق جهاز

فيبادرك احد الاصدقاء (اخر من تبقى من عصور المماليك)

بتاكيد قولك بان هذا السائق

جهاز

فينمو شعور داخلى فى نفسك لدراسة الابعاد السيكلوجية لهذا الجهاز

لتضع ما يسمى بكتالوج التعامل مع الاجهزة

علك تعرف طريقة التعامل مع نفسك باعتبار انك جهاز

وينضم اسمك لقائمة الاسماء الموجودة فى موسوعة الارقام القياسية

باعتبارك اول بنى ادم استطاع ان يدرك طريقة للتعامل مع نفسة

قد تجيد اقناع الاخرين ولكن لا تجيد اقناع نفسك

قد تقنع اخر بضرورة التوقف عن التدخين ولا تقنع نفسك

قد تجعل صديق يتوقف عن فكرة السفر للخارج لما لهذا البلد من قيم حضارية والشباب اللى بجد بيبنى مش بيهد ولكن لا تقنع نفسك

قد تقنع الاخرين ب اهمية البعد الثالوثى للكوز ولا تقنع نفسك

ومن هنا تدرك مدى التعقيد فى نفسك

ومدى البساطة فى الاجهزة

وتتمنى فى النهاية ان تكون


جهاز


12 comments:

LAMIA MAHMOUD said...

لاء المرة دي مش فاهمين بجد
طيب دي حاجة كده زي استراتيجية التحول؟
ولا التبرمج؟

MoHaMeD HoSSaM said...

هو الواحد يعني المفروض

يعمل صيانه ولا يجيب واحد جديد قسط

ممكن يبقي الجهاز صيني مضروب
وومكن يبقي مصري مضروب بس بالشبشب

مش عارف بقي انا ححاول اتمركز عشان اعرف افهم

هو انت حتنزل كتالوج البوست الجاي تشرح
ولا ايه؟

المخبر العام said...

تعالى عندنل ...ولحنل نعملك أحلى كتالوج

مع أمن الدولة..انسى نفسك

Desert cat said...

طيب هو انا ممكن استعين بصديق
طيب ممكن احاول اعرف احنا ايه اللى موجود حوالينا مش يخلينا نتمنى نكون اجهزة تعمل دون شعور حتى لا نشعر بمرارة ما يحدث من حولنا
قولى بقى اخبار الامتحنات ايه

حمامة said...

واحده مش فاهمة حاجة

:D

max.adams said...

صحيح موضوع الأجهزه ده بس رغم أني ببقى مقتنع أن لسه البلد فيها أجهزه كتير الا انه صعب أني أقتنع أن أنا نفسي جهاز حتى لو ربع اللي أعرفهم بس هما اللي ماقالوليش اني جهاز
ده غير أن الكتالوجات شاحه في السوق و ده شئ مشجع على انك تسوق الهطل من غير رخصه!!؟ غريب الكلام؟؟ طبعا ماهو أنا مش فاهم .........

مرحبا بيك في الملاعب

واحد مش فاهم حاجة said...

لمياء محمود

انا بقدم كل الشكر للبوست اللى محدش فاهمة دة

حتى انا

لانة خلاكى تعلقى عندنا

اقولك
هو اقرب للتبرمج شوية

ببصة كدة سريعة عالنفس

او النفوس

متقدريش تحطى لها قانون
تتوقعى بية كدة

لما بنيجى نعمل

نكتب كود لبرنامج

بنقولة لو حصل كذا اعمل كذا

ولو دة محصلش اعمل كدة

وافضل اعمل كدة لحد ما يحصل كدة

نقدر نعمل كدة مع نفسنا

الجواب لا

طب لية

؟؟؟؟؟؟؟؟؟؟؟؟ظ

قولى انتى


ويارب اشوف تعليقك هنا دايما

تحياتى

واحد مش فاهم حاجة said...

محمد حسام

ازيك يا محمد باشا

فى الاول كدة يا محمد باشا انا مفتقدك عالميل

بالنسبة للبوست
والله ماقصد اللخبطة دى

بس انا معرفتش اوصل الفكرة

معتقدش ان فى كتالوج

لو مان فى كتالوج مالبداية

مكنتش هاكتب

واحد مش فاهم حاجة said...

المخبر العام

موافق احجزلى جناح فى امن الدولة

منور يا سعادة الباشا المخبر


-------------------------------

قطة الصحراء

سيبك من دة كلة

الامتحانات زى الفل

قاعد اهو فى البيت ومانتخ


----------------------------

حمامة

اهلا بيكى فى بيتك ومطرحك


------------------------------
ابو الفناكيش

صباح نظريات الاستغلال

والكسب غير الحلال

واهلا بيك فى حديد عز

----------------------

هبة النيـــــل said...

تمنيت أن حياتي كلها تكتب في كتاب ويسلم لي على أن يكون مكتوب في هذا الكتاب عواقب ومساويء ومزايا كل اختيار وقرار بحياتي وعليَّ أن أختار وفق هذا الكتاب

أما عن نفسي ففعلا لم أكن أعلم ما هو "النظام" داخل نفسي التي تسميها "جهاز" وفعلا ليتها جهاز ومسلم لي طريقة التشغيل من البداية لكي أعلم كيف أتعامل معه

أخي اللي فاهم كل حاجة

أحييك إنك رغم صغر سنك وصلت لهذا الدرجة من التفكير

انتظرني بردو لسه

هبة النيـــــل said...

على فكرة احنا بلديات :)

واحد مش فاهم حاجة said...

اجد فى طريقة الكتالوج حلم بعيد المنال او اريد ان اوكد انة مستحيل

فبرغم كل قصص وسير السابقون نتعثر فى نفس الفخاخ التى سقطوا فيها


مش عاوز اتفلسف واقولك ان الدرجة دى مالتفكير كانت نتاج تجارب والكلام دة

بس انا مش هاتفلسف

بصيلها ببساطة كدة
هاتلاقيها بسيطة
يعنى مفيش ولا درجة تفكير ولا حاجة


على فكرة احنا بلديات :)
تقصدى محلاوية يعنى
اذا فلابد ان اعزف السلام المحلاوى

سلام مربع للجدعان
وتحية لكل ركاب العربيات الاصفر فى كحلى

وتحية للبغل وسندوتشاتة

وسعيد بانضمامك لقائمة المحلاوية

المدونين اللى بعتز بيهم جدا

القائمة اللى مفيهاش غير بتاع الفنكوش


تابعى تفصيص المدونة انا منتظر