Pages

09 February 2008

جعلونى حالماً



جعلونى فانجعلت

حطونى فأنحططت

علونى اوآم عليت

ووفى ثانية اوآم بقيت

وفى لحظة اوآم نزلت

رابطينى من خيالى

حابسينى بين جراحى

الغنوة كاتمة صوتها

مشاعرى مش لاقية اوتها(قوت)

مخطوفة منى روحى

دبلانى يا لون طموحى

فى الحلم وردة بمبى

وجميلة قاعدة جنبى

بتقولى انت حبّى

امير على شرق قلبى

محافطة الحنان

نطيت من فرح قلبى

وفى لحظة مالجنان

إنكشف عنى اللحاف

اتارينى كنت نايم

وصحيت على اوضة غامقة

زى اوضتى

بصيت يمينى ............ شوفت صورتى

هو بغباوتة وشكلة العكر

وقعدت من تانى افتكر

جميل الحلم اصلة

بيرضيلى غرورى

بيكمل اللى ناقص

بيقلل من جنونى

الحلم بدايتة خطوة

والخطوة مش بميل

الخطوة هيا خطوة

والرجعة بالف ميل

المعنى عندى رافض

اغنى غنوة صامتة

المعنى عندى انى


احلم على قد سنى


ومشاعرى تلقى اوتها (قوت)

وروحى تعود لبيتها

ويزهر لون طموحى



---------------------------------------------


كان نفسى من زمان اكتب كلام او قصيدة

فيها النوع دة من الترميز

النوع اللى موجود فى اغانى منير

مع الفارق طبعا

النوع دة بيجبر اللى بيسمع انة يندمج مع الكلام

يعيش معاة

ويفهمها بحسب حالتة النفسية اللى بيستقبل فيها الكلام

الكلمات دى احتلت مكان الافضل عندى

وياريت تعجبكوا انتوا كمان

واللى بيعرف فى الاوزان ياريت يقولى اخطائى

عشان شكلى بوظت الدنيا



20 comments:

Desert cat said...

هو انا بصراحة مبفهمش فى الأوزان بس الكلمات عجبتنى جدا
ومن هنا ومن مكانى ومن مقعدى ومن موقعى هذا بقولك سير يا بنى على بركة الله

OldCatLady said...

أوزان ايه بس؟؟
المهم المعنى دخل قلبك و هزه ولا لأ...خلاك تفكر ولا لأ
و ممكن يخليك تدمع كمان..و ده المطلوب
عندك مليون شاعر بتلاقى القصيدة عنده كلها مرصوصة كلام ملوش علاقة ببعضه
على غرار طبق مرق علق انطلق انفلق ثم انغلق
المهم...قصدى أقول مش ده اللى حسيته..يبقا أجمل مليون مرة من كلام مسجوع
القصد برضو...الكلام ملوش تعليق...أسلوبك هادى و رايق و سلس
بجد البوست ده عجبنى أوى
تحياتى

media said...

اول زيارة ليا في مدونتك
فرحت اوى انك من المحله
كل مدخل مدونة حد ولاقية من الغربيه افرح اوى بس اول مرة اشوف حد من المحله
سعيد بزيارة مدونتك
وكلامك جميل اوى وجميل اوىان احنا نحلم
احلم فالحلم شمس مشرقه دائما اذا غابت غاب معها الامل
تحياتى ليك

ساعه الغروب said...

رابطينى من خيالى
حابسينى بين جراحى
الغنوه كاتمه صوتى

مخطوفه منى روحى
دبلان يالون طموحى


فى الحلم ورده بمبى
وجميله قاعده جنبى
بتقلى انت حبى

الحلم بدايته خطوه
والخطوه مش بميل
الخطوه هى خطوه
والرجعه بالف ميل

بجد حلو اوى "الرجعه بالف ميل "

مشاعرى تلقى قوتها
وروحى تعود لبيتها
ويزهر لون طموحى

الله الله الله بجد
ما شاء الله عليك بجد
لكماتك بجد لمستنى اوى
وقلت الجمله دى حلوه انا لازم اعلق عليها ولقيتنى كل ما اكمل سطر اخد الىب عده كمان فكان لازم انى اعمل كدا
يمكن نقلت اغلبها بس بجد الجمل دى انا اكاد اكون حفظتها من شده اعجابى بمصداقيتها القويه اوووووووووووى

ربنا معاك
ومنتظره دايما بجد الكلمات اللى بتمتعنى اوى دى

ما شاء الله ربنا معاك بجد


:)

سهر said...

الله .. حلوة اوي بجد
تفتح قلبك للدنيا
وحنا كلنا محتاجين لحاجة زي دي تشجعنا وتدينا الامل لبكرة
اكتر من رائع
تحياتي

صوت من مصر said...

كلام صعب موت لانى صوتى مش هيقدر يطلعه الى من جواه
وعجبى

Unknown said...

desert cat

بالصلاة عالنبى كدة ادخل برجلك اليمين

الحمد لله انا كدة اخدت اوراق اعتمادى عندك كشاعر

يارب اطور نفسى كمان وكمان

واخد شعادة اعتمادى عند مصر


شكرا يا جميل على رايك دة

Unknown said...

صيدلانية مطحونة

طيب هو المعنى دخلك ولا لا
خلاكى تفكرى ولا لا

لو كدة انا بقى فرحان جدا جدا

ومش عاوز اكتر من كدة

وكدة رضــــــــــــــــا

Unknown said...

لولا

اية النور دة

محلة / منصورة اى حتة فى مصر

كلنا بنشرب مية النيل

بس بينى وبينك

انا برضوا ببقى فرحان لما اقابل حد

مالغربية او

مالمحلة

فى عالم التدوين

اهلا بيكى بقى فى محافظتى انا

شكرا اوى على رايك

Unknown said...

ساعة الغروب

انتى اخترتى الكلمات اللى حسيتها انا
كمان كقارى

مش ككاتب

ورايك بيضفلى كتير

لانك برضوا من الناس اللى بيكتبوا باسلوب جميل

بجــــــــــــد

واتمنى انى مكتبش حاجة متعجبكيش
ويفضل الكلام يعجبك على طول

Unknown said...

سهر

اهلا بيكى فى الثوب الجديد

وبمدونتك الجديدة

انا برضوا كنت محتاج حاجة زى دى تشجعنى
زى منا برضوا محتاج لراى زى رايك يشجعنى

تحياتى ليكى يا سهر

Unknown said...

وعجبى عليك يا صوت مصر

والله العظيم انا مش فاهم حاجة

اعذرنى يا باشا والله حاولت افهم تعليقك بس معرفتش

بس انا حاسس انة الكلام مش عاجبك

ياريت لو مش عاجبك

تقولى انا وحش فيين بالظبط

لو عاجبك بقى

يبقى الحمد لله

منور يا باشا

شريف طلال said...

على فكره كلام جامد جداااااا
و مؤثر جداً
و يا ريت منير يغنيه يا باشا
شكراً ليك
و تحياتى

عاشقة الوطن said...

السلام عليكم

ازيك

الكلام بجد روعة وجميل اوووى
الغنوة كاتمة صوتها
فعلا صوتنا مكتوم فى الغنوة وغير الغنوة

مشاعرى مش لاقية قوتها
لان مفيش حد عارف ازاى يقوى المشاعر مبقاش فى دماغنا غير الماديات وبس ومش عارفين نغذى مشاعرنا

كلامك حلو ورقيق اوى

تحياتى الشديدة

^ H@fSS@^ said...

والله كلامك حلو و احلى ما فيه صدق شعوره و ده اللي بيوصله لعقل و قلب اللي بيقراه طوالي و مش لازم يكون مقفى او موزون
اهم حاجة في الشعر ايه؟
انه يكون مشعور
شعر يشعر شعورا و شاعرا
بس خلاص
الاحساس يعني و انت باين عليك ما شاء الله انك احساسك عالي

تحياتي

حدوته مصرية said...

القصيدة جميلة و عجبتنى جدا بس

هو بغباوتة وشكلة العكر

معجبتنيش

اما عن اوزان الشعر فاكتب بحرية افضل بكتير و ممكن توزن بودنك اقراه كده و انت هتحس شوية امتى يبقى فى كسر ومش موزون

اما لو انت بقى عايز تتعلم الاوزان فده حوار بقى انك تقرا فى البحور و الاوزان بقى وتعرف كويس و بعدين اكتب بحريتك برضه بس ساعتها هتكون فهمت اكتر فى انك تكتب بوزن و ده كويس

انا عايز اتعلم بس مفيش فرصة حاليا

تحياتى

حمامة said...

جميلة جداً
والاوزان معقوله بالنسبة للشعر العامى
بجد ابدعت فيها
بتعبر عن حالة كتير منا بيعشها
عن حلم برىء كلنا بنحلمه
سلمت يمينك يا فنان :)

Unknown said...

شريف طلال

ياريت يا باشا اوصل للدرجة ان منير يغنية

منور المدونة


-------------------------------
عاشقة الوطن

تحياتى انا العميقة

على رايك دة

واكيد احساس اننا بقينا بنميل للطبع المادى
هايخلينا لحنين للحظة نعيش فيها المشاعر بحقيقتها

--------------------------------
حفصة


منورانى يا فندم

سعيد اوى بزيارتك

وكمان رايك دة

ومادام الاحساس وصلك بجد

يبقى الاوزان دى خلاص بقت اخر حاجة فى تفكيرى وانا بكتب
انا بس بشوف عدم ظبط الوزن
هايخلى المعنى يوصل ولا اية

وفعلا طلع بيوصل

شكرا واى على رايك

-----------------------------
محمد ياسر

بص يا محمد
انا لما دخلت

هو بغباوتة وشكلة العكر

كنت عاوز ادور على كلمة

تعبر عن لحظة الصدمة
اللى بنحسها
لما نخرج من حلم جميل
لحقيقة وحشة

بعد ما وصفت الموقف بتاع البنت
حبيب ارجع اللى بيتخيل لحقيقتة
وحبيبت ابين انها حقيقة وحشة

وخلاص انا بقيت من النهاردة
من الناس اللى بيكتبوا من غير وزن

على خطى الجميل

على سلامة

تحياتى ليك يا باشا

---------------------------

غراب وحمامة

شكرا ليك يا غراب باشا
وشكرا ليكى يا حمامة هانم

سعيد جدا
بزيارتكوا

ويارب لما تزورونى المرة الجاية
الكلام يعجبكوا برضوا
ويعجبكوا دائما

ســـــــهــــــــــر said...

ظرف زمان
ما نيش منه
ما هوش منى
لكنه بقسوه يهزمنى
يعلمنى
مفيش لازم
مفيش تاكيد
يقسّمنى
و بتلصم
و اقف واحد
منيش نصين
ولا اكتر
و اقول حقدر
اغالب ظرفى
و ااخر
ساعات فاتت
و اعاندها
تعاندنى
و اقول للوقت
لا حقدر
ارجع الزمن بيا
و اشطب حبة ايامى
من الدفتر
و اعود ليا
و اتحداه
فيهزمنى
يقول خط الزمن ثابت
طريق واحد
بلا رجعه
ولا بدعه
و انا الحاوى
و غِلـْبـْتْ كل الاعيبى
عشان عيبى
منيش كداب
لكن بتدارى عن نَفـْسِى
عشان نِفْسى
اغالب نقطتين ضعفى
و اكون معفى
اعيش ظرفى

عازفة الكمان said...

اولا القصيده تحفه بجد مش مجامله والعنوان رائع و الصوره ما اقولكش بجد حلوه انا عملتلها سيف عندي