Pages

01 February 2008

حكم الهوى


حكم الهوى فوق الجبين

حكاية غامضة بتحكيها السنين

احلام عبيطة

بتترسم

على شكل قلبين سوا

مع بعضهم

متجمعين

وبيرقصوا رقصة امل

هيا الاخيرة فى حبهم

من بعدها

اتحولت كل المعانى الطيبة

لدمعتين

على خد واحد منهم

نفس الاماكن والوشوش

اللى بتدارى الوحوش

من تحتها

نفس الرتوش

الكدب طالل مالعيون

يا مين يحوش


قلوب محتاجة للمشاعر

قلوب بتعشق

لاجلن تعيش

قلوب بتشرب مالجراح

مبتترويش

قلوب بيسرقها الفراق

تصبح مفيش

وكاْن هو البوح قدر

مزروع فى ارض الخوف

شجــــــــــــــر
على كل فرع فى نبتتة

واقف غراب الشوم

واقف بيرمى اللوم

على قلب حس المشاعر

على قلب باح بالحقيقة

والنهاية

كاس مليان بالهموم

يسكر قلوب

كانت بريئة

وتبقى البداية

للحكاية

حكاية غامضة بتحكيها السنين

احلام عبيطة هاتترسم

على شكل قلبين سوا

مع بعضهم متجمعين

ويسرقها الفراق

تصبح مفيش



----------------------------------

البوست اللى فات

كان فى تعليق من واحد لا دينى

بيقول كلام اقل وصف ممكن يتقال علية

انة مجنون

عشان كدة انا اكتفيت بانى امسح تعليقة

من غير ما ارد علية

لانى معنديش استعداد ادخل فى حوار

مع واحد مجنون

هادعيلة بان ربنا يشفية ويهدية

وبعد كدة هابقى اتحاور معاة

-------------------------------------
البوست بتاع النهاردة مش بقصد فية فكرة الخيانة

قد ما بقصد فكرة غياب المعنى الحقيقى للحب


29 comments:

د/اجدع بنوته said...

قلوب بتشرب مالجراح

مبتترويش

قلوب بيسرقها الفراق

تصبح مفيش

الله عليك .. وكفى

بنت الصالحين said...

ماشاء الله
علي فكره الشخص اللي بتتكلم عنه ده
داير في كل المدونات

افضل شئ قمت به هو عدم الرد عليه لانه ببساطه لا يدخل في اي حوار اساسا
يكتب ويجري ليس له حجه

Coca said...

جميل البلوج كله بجد مش البوست دا بس

انا جيت ابل كدا بس مش عارفه علقت ولا لا لكن هو فعلا عاجبني من زمان

تحياتي

Unknown said...

القذافى


شكرا يا باشا على الدعوة

ربنا يوفقكم
وتقدروا تلموا المدونين العرب

Unknown said...

اجدع بنوتة

بس خلاص كدة


بس فى حتة بقى عجبانى اكتر من دى


وكاْن هو البوح قدر

مزروع فى ارض الخوف

شجــــــــــــــر


شكرا على مرورك

Unknown said...

عاشقة الفردوس



اصل هايقف يدافع عن اية

ولا فكرة ولا ادلة ولا معنى

ربنا يهدينا

ويهدية


شكرا على مرورك

Unknown said...

coca


انا برضوا مش فاكر

بس بيتهايئلى جيتى وعلقتى

عالعموم منورة البلوج

ويارب يعجبك باستمرار

قوليلى رايك بقى فى البوست

sahr said...

انت طلعت فاهم كل حاجة ليه مسمي نفسك واحد مش فاهم حاجة
جميل اول البوست
شدني اوي
وكلماتك عجبتني اوي

د/اجدع بنوته said...

سمحت لنفسى .. انى اقدملك تاجين هديه

هتقبلهم ..

النبى قبل الهديه ؟؟

ع العموم هما عندى .. شرفنى وخدهم

صوت من مصر said...

انا مش فاهم حاجه خالص

smraa alnil said...

احلام عبيطة بتررسم

مش كل القصص بتنتهي بفشل
ولا كل النس انعدم منها الحب

الحب موجود بس اختياراتنا هلي اللي غلط
متسلابعين وخلاص

الحب موجود
جايز في بعض الحالات مش يكون مكتوب لقصة الحب دي اي امل
نظرا لظروف خارجة عن ارادتهم
بيئة اهل ظروف ماديات

اي كان
بس دة لا يمنع ان الحب موجود

Bossy said...

السلام عليكم ورحمه الله وبركاته


قريت البوست كتير كتير اوي يا مصطفي
وكل ما اخلصه ارجع اقراه تاني
بجد رائع ربنا يوفقك ومعاك حق معني الحب الحقيقي اختفي لا انقرض اصلا احنا بشر
بوستك رائع خصوصا اما قلت
يسكر قلوب
كــــــانت بريئة

رائع دائما
طبعا بالنسبه لتعليق الشخص الغير ادمي دا
بصراحه الصح اننا نحزف تعليقاته بس هو اجا لحد عندنا يبقي لازم نرد عليه ونحزف تعليقه
معاك حق انه مريض بس كلامه مستفز اوووي
ربنا ينجيه من نفسه

تحياتي

max.adams said...

نفس الاماكن والوشوش

اللى بتدارى الوحوش

من تحتها

نفس الرتوش

الكدب طالل مالعيون

يا مين يحوش

البيتين دول ادو معنى فظيع قوي و الناس اللي بتخبي الدواهي تحت السواهي ورغم انهم مكشوفين و طالل من عنيهم الكدب ما بيرجعوش

فائق يا مصطفى فائق .

Ana keda said...

مصطفى

فى كلام هنا لازم اعلق واقولك رايى لانى عارفة انه هايل وواحد يمشى مش بتحبه

الشوم والغراب

تعبير جامد شويتين مع انى ماليش فى الادب بس كنت ماشى كويس

بحب فى شعرك انه سهل بجد يعنى يدخل علطول

وحبيت توضيحك بجد فى الاخر

بس غياب الحب ممكن يبقى مش اختيار صح وةمش كميا مظبوطة وظروف اكتر

بس فى حب بس بقى منعدم

Hannoda said...

لو تسمحلي أخالف رأيك في الحكاية ده
هو مش غياب لمعنى الحب الحقيقي
بالعكس
الحب ده بيبقى أكتر حب حقيقي
الحب اللي بنحسه و إحنا صغار
وقلوبنا لسة صغير
و الصغر مش بالسن إنما بالجروح و التجارب

ساعتها بيبقى الحب حقيقي
لكن الحياه بتبقى أقسى
و القلب بيبقى أضعف.. بيتخبط بسرعة
بيخاف و يهرب بسرعة
لكنه بيقدر ع الحب أكتر

و أما نجرب و نتجرح كتير
و نكبر و الحياه تعلم فقلوبنا

بنعرف نعافر و نفهم و نقرب رغم الظروف و الصعوبات
بس بنعمل كل ده عشان نعيش
مش عشان بنحب حقيقي

حاسة اني بعدت قوي عن المعنى اللي قصته و مش معنى كده إني ما فهمتهوش

:)

تحياتي

OldCatLady said...

برضو أنا مصرة ان أسلوبك فى البوست ده برضو بيفكرنى بصلاح جاهين زيه زى بوست لسه بلف...بجد يسلم عقلك...بس المرة دى فهمتها من غير توضيح :)
على فكرة حلو موضوع التوضيح تحت البوست ده برضو :)
و تقولى مش فاهم حاجة؟؟؟؟
اسفه على التأخير بس الدنيا بقا الله يجازيها
تحيااااتى

Unknown said...

sahr

زيارة جميلة بعد غياب

شكرا جدا على رايك دة

ويارب تفضل البوستات تشدك عشان تزورينا




تحياتى


-----------------------------

اجدع بنوتة

شكرا يا جميل عالتاج
وباذن اللة جارى الاجابة علية

هدية مقبولة

--------------------------

صوت من مصر

ياعم ومالك زعلان
منا برضوا زيك

اخوات

منور

Unknown said...

سمراء النيل

اكيد رايك لة تاثير مقنع عندى

بس فى حاجة ناقصة

وعشان متفهمش غلط مش عن تجربة شخصية

بس ناقص حتة على راى وجية عزيز

حتى القصص الكاملة
اللى كلنا بنقول عليها قصص ناجحة


ممكن يتقال عليها ملل

او ساعات اسمها خوف من مستقبل

بصراحة مش عارف اسميها

وكمان انا معبرتش عنها زى ما هى فى
دماغى

بس كل ماوزن الاقى لسة ناقصلى حتة


فرحان بجد بتعليقك ومرورك

Unknown said...

الجميلة بوسى

شكرا اوى يا بوسى
بعتبر زيارتك ليا رغم غيابك عن مدونتك

تقدير او وسام ليا

بس هاكون سعيد اكتر لو ترجعى
تدونى

يسكر قلوب كانت بريئة

اصل اللى بينجرح اول مرة

ممكن يكون هو اللى بيجرح المرة التانية

Unknown said...

حبيب قلبى ابو الفناكيش

شكرا ليك يا جميل على رايك

وانا اسمحلى يعنى يا زميل
على راى المحلاوية

انا ضيفت ايميلك

مستنى اكلمك

Unknown said...

ana keda


انا مش عارف اذا كانت كلمة غراب الشوم

عاجباكى ولا مضايقاكى


بس انا كنت عاوز اقول

بعد كلمة البوح قدر

ان بعد الانسان لما يبوح بمشاعرة

للانسان الغلط

وينخدع فى النهاية

الناس كلها بتلوم البنى ادم اللى قال
مشاعرة بصدق

ومش بتلوم الانسان اللى استغل المشاعر دى
انا بقى كنت عاوز اشبة الناس دول

بصورة وحشة ومش وحشة

لاقيت ان الغراب

فى منة ابيض ومنة اسود

الابيض الناس بتحبة
وبتتفائل بية

الاسود
الناس بيتشائموا منة

اللى هو غراب الشوم

فكدة التعبير احسن
عشان الناس مخليهمش وحشين اوى
ومخليهمش حلوين عشان موقفهم السلبى

شكرا اوى يا مروة على رايك دة

واكيد فى حب بيتكون مع الظروف المناسبة


صحيح هو يعنى اية

كلمة

فى حب بس بقى منعدم

مش هو الانعدام يعنى الفناء يعنى مفيش خالص

صححيلى المعنى اللة يخليكى

Unknown said...

هنودة

اصدق حد شوفتة بيحب مصر

من ناحية بعدتى فا انتى بعدتى

انا كنت اقصد اننا بنختصر الحب فى كلمة بحبك

ولو بحب بزيادة شوية

هايبقى الحب
بحبك و بموت فيك

بقى هو دة المعنى اللى طاغى

مجرد اتنين قاعدين يقولوا كلام حب

حتى فى القصص اللى هيا بنقول عليا ناجحة

برضوا فى حاجة واقعة فى النص
بينهم
زى الظروف او الملل


شكرا جدا على مرورك ورايك

Unknown said...

صيدلانية

يا بنتى انتى بتتكلمى ازاى

صلاح جاهين دة عمى وعم اى مخلوق يفكر يكتب شعر

ازاى بس اقدر احصل ربع اسلوبة

يمكن انا ساعات بسرق كلمات من رباعياتة

او اشعارة

لان بصراحة اللى يشوف جواهر مرمية من غير حارس

لازم يسرقها

بس برضوا كونك تقوليلى كدة
يخلينى
انفخ صدرى كدة وانا ماشى فى الشارع




شكرا اوى على رايك

بسمه عبدالباسط said...

ليك تاج عندى روح خده

Unknown said...

البلوج جميل جدا
والشعر اللي فيه أجمل
بس مكتوب على لينك التعليقات
"مش فاهمين حالجه"
ليه ياعم
احنا الحمد لله فاهمين وصاحيين وهنغير باذن الله
.............
ياريت تشيل الفيرفكشن

Desert cat said...

oid
واقف غراب الشوم

واقف بيرمى اللوم

على قلب حس المشاعر

تعبيرها قوى جدا جدا
بجد هايلة

Unknown said...

bos bos

شكرا جدا عالتاج

وباذن الله هاجاوب علية

وشكرا على مرورك



----------------------------

انا انسان

مع احترامى لشعورك كانسان فاهم

انت بطلبك دة
بتعتبرنى غبى او حاجة من هذا القبيل

اسم مدونتى مجرد مجاز عن كونى حاسس بتخبط فى الافكار

وكون لينك التعليقات بيحمل اسم مش فاهمين

برضوا مجرد مجاز عن التوهان الفكرى اللى احنا فية

بس الفرق ان كل اللى علقوا قبل كدة
استقبلوها عادى

انما انت حملت الامور اكبر من وضعها


يعنى متاخدش الكلام على صدرك

شكرا على مرورك

واسف على عدم ازالتى لللينك


-----------------------
desert cat

شكرا يا جميل على رايك

بكون سعيد
بان جملة بعينها تعجب اللى بيقرا

وخصوصا لما تكون الجملة دى

انا كمان بحبها

Selfmeaning said...

الحب لسه موجود

و دورنا ندور عليه

يا ما تعرف تلاقيه و تحافظ ع

ياما تحسس نفسك انك لسه بدور

و ساعتها هتفضل دور

حمامة said...

على شكل قلبين سوا

مع بعضهم

متجمعين

وبيرقصوا رقصة امل

هيا الاخيرة فى حبهم

من بعدها

اتحولت كل المعانى الطيبة

لدمعتين

...

جميلة جدا

تحفة يعنى
عجبنى اوى المقطع ده

تقبل تحياتى :)