Pages

21 September 2007

للذكرى واشياء اخرى


باتوة
فى الشوارع
بضيع
فى المواجع
بطوف فى المدينة
وبيوتها الحزينة
بشوف فى العيون
الحلم اللى راجع
تتعبنى الخطاوى
تخنقنى المدينة
ياخدنى حنينى
لبستان الحياة
افرد دراعى احضن هواة
ياخدنى خيالى
لايام صباة
فـــــــــــــاكر
هناك عند الشجر
تحت المطر
اِيدها فى اِيديا تشدنى
تنسينى احساس الخطر
عينها فى عنيا تهزنى
صورة من حسن القمر
محلى بستان الحياة
فى كل ركن ليا دمعة
وفى كل ضلة ليا بسمة
وعلى كل شجرة ليا رسمة
بتحكى ذكرى فى سكتى
بتجسد براءة خطوتى
هنا بنلعب
وهنا بنضحك وهنا بنحكى
وهنا بنرقص مالفرح
بعد نتيجة الامتحان
مر الزمان بس المكان
هو المكان
صورة بتدينى الامل
ذكرى تمنحنى الامان



سؤال لو سمحت عشان افهم هو مطلوب من الانسان انة يحتفظ جواة بكل الذكريات سواء وحشة او حلوة مع العلم حسب تجربة شخصية الذكرى الحلو اكيد ملزوق فيها ذكرى وحشة ولا مطلوب مالانسان انة يفتكر الذكرى الحلوة بس ولا مش مطلوب مالانسان انة يحتفظ باى ذكرى؟؟؟؟؟

10 comments:

Anonymous said...

علشان تقدر تعيش لازم تعمل نفسك مش واخد بالك
اضحك علي الدنيا قبل ما تضحك
عليك
عمر الذكريات مكانت حلوه
حتي لو ايام حلوه لمجرد انها بقت زكريات
هتبقي وحشه لانك متاكد ان الايام دي مش هترجع
عيش وبص قدامك
وعمرك ما تفكر تبص وراك واعتبر دايما ان اللي فات مات

اقولك مش لازم تعرف انا مين
اعتبرني واحده مش فاهمه حاجات كتير
ونفسي افهما
ربنا يسعدك

محمد العدوي said...

لا يا بني الحلو والوحش علشان لما تيجي تعد الأيام تلاقيها كاملة ..


مش تيجي بعد خمس سنين تعد تلاقيهم شهرين ..

كلها حياتك .. في سلتك . متوقعش منهم يوم ولو قطران .

maha mohamed said...

الذكريات الجميله علي قد ما بتكون جميله علي قد ما بتكون مؤلمه لمجرد كونها بقت ذكري فاتت بس هي دي الحياه ايام بتفوت وايام بتيجيي ايام مليانه ذكريات منها الحزينه ومنها الجميله الحياة مش بتقف والذكري وجودها حافز كبير لانها بتدينا الامل في بكره واننا نبطل نياس عشان نقدر نعيش لبكره ونبص لقدام بنظره احسن من الاول نظره فيها تفاؤل وامل اكبر
علشان نقدر نعيش لبكره لازم يبقي عندنا امل
مع تحياتي الكبيره ليك وربنا يحميك
ويوفقك لانك موهوب قوي وشاعر كبير

NilE_QueeN said...

انا معرفش انسي حاجه

بس الزكريات الوحشه حاول تبعدها واشغل بالك بالحلو


ولا اقولك متشغلش بالك الا بالنهارده ولو فى حاجه حلوه حنتلها ماشي
لكن لما تفكر ف الحاجات الوحشه هتتعب
هتعطلك عن المستقبل

mostafa said...

تذكر ما تشاء ولكن حاذر " فالحزن يعرف المباغته "

حصان بري said...

مر الزمان بس المكان
هو المكان
صورة بتدينى الامل
ذكرى تمنحنى الامان
حلوق قوي يا صاحبي

الذكري غالبا بتبقي حلوه
حتي لو لموقف محرج بتفتكره وتضحك
اما الذكريات المولمه
فدي الحياه كفيله بيها

Unknown said...

واحدة مش فاهمة حاجة

تفتكرى فى حد يقدر يضحك عالحياة زى ما بتقولى
وفى حد بيقدر يرمى كل ماضية
عامل زى واحد كل شوية يمشى فى طريق وكل ما ينسى حاجة يرجع يبتدى مالاول تانى

Unknown said...

محمد العدوى
تفتكر الذكرى الحلوة
بتتحسب من العمر

مش انا اقدر اقول ان ايامى كاملة
بعدد ايامى الحلوة
بس

محتاج ردك
تحياتى

Unknown said...

مها

نوع ايه مالذكريات اللى ممكن يديكى الحافز دة
على تكملة المشوار

Unknown said...

NilE_QueeN


عاجبنى رايك
اوى

تحياتى على مرورك