حتى لا نفقد الامل

محاولة الرجوع بالذاكرة لورا .. لقبل يوم 25 يناير .. محاولة مرعبة مش عارف مرعبة ولا مضحكة .. اعتقد ان اى محاولة قبل 25 يناير لتصور اللى بيحصل دلوقتى كانت هاتتقابل بسخرية شديدة او مكانتش هاتتقابل بحاجة اساسا لان الكل كان هايعتبر اللى اتصور كدة انة مجنون ميستحقش حتى محاولة الرد .. حد فاكر جماعة المولعين بجاز .. طيب احداث كنيسة القديسين والبلد كانت بتغلى ازاى او انتخابات مجلس الشعب .. حد لسة فاكر سيد قرارة وسيبوهم يتسلوا البلد كانت رايحة فى سكة مرعبة .. حكمة السيد الرئيس والقيادة الحكيمة ومن اجلك انت والقلة المندسة والعبور للمستقبل ومش عارف الحاج ابو صلاح الرمادى يبايع حسنى وولدة لرئاسة الجمهورية , قد اية الثورات دى طلعت حاجة ممتعة, لما تونس عملت ثورتها انا كنت فرحان اوى بس كان جوايا قدر كبير اوى مالحسد .. حسدتهم اوى كان شكلهم وهما فرحانين بيرد ليا جزء من روح نفسى اعيشها, طيب سيبك من دة كلة عارف احنا دلوقتى بنتكلم عن اية ؟ عن محاكمة حسنى مبارك ايوة القيادة الحكيمة واحمد عز محبوس على ذمة التحقيق ولابس البدلة البيضة وحبيب العادلى بيتحقق معاة بيقولولة انت فاسد وعملت كذا وكذا عندك رد على الاقوال دى وجمال مبارك قاعد فى البيت تخيل من سنة 1995 وهما بيجهزوة عشان يبقى رئيس ولحظة كدة كلة راح راح راح .. خد قلبى وراح تخيل دلوقتى تقدر تقعد مع ولادك فى المستقبل وتقولهم انا حضرت ثورة 25 يناير وهما هايسمعوك باهتمام بس بالله عليك متبقاش تكدب وتعمل فيها سوبر مان ,الثورة ليها فوائد لينا كمجتمع اكتر من اننا خلينا الرئيس يمشى , اول حاجة عرفنا قيمة نفسنا قوى وقد اية لما بنتجمع على هدف واحد بيكون تحقيقة سهل , وتانى حاجة عرفنا بعض كويس ان الاختلافات اللى مابينا تافهة جدا قدام الاشياء المشتركة فينا , الثورة علمتنا درس احنا كنا حافظينة مش فاهمينة " لكل ظالم نهاية " كنا بنقولها ونتواكل على ربنا مع ان ربنا امرنا نواجة الظلم , الثورة برغم الفساد اللى كشفتة عرفتنا بناس لسة نظيفة فى مصر ناس وقفت من زمان قالت لا قبل ما نفكر نقولها كلنا مع بعض , الثورة سمحت لكل المصريين انهم يتصورا جنب الدبابات وعرفتنا بالراجل اللى ورا عمر سليمان , ارادة الشعوب بتقدر تعمل اى مستحيل وتقدر تبنى مهما كان حجم الدمار بس صعب تبنى بناء جميل على انقاض شى قبيح ومهدود مش هانقدر نبنى مصر تانى ووسطنا ناس جزء من منظومة التخريب الكبيرة اللى اتحطينا فيها لعقود منظومة كان من اعمدتها الرئيسية الوزراء وامن الدولة و الحزب الوطنى والسكوت عن الحق , عمرنا ما هنقدر نبنى كويس والاعمدة دى لسة موجودة وحكومة احمد شفيق هى جزء من النظام دة سواء باشتراكها فى الفساد او بمحاولتها اللى كانت واضحة جدا قبل التنحى محاولتها الدائمة بالدفاع عن الرئيس و لو لسة بتحاول تنفى عنها التهمتين دول ففى تهمة انها شافت الفساد وفضلت ساكتة .. انت متخيل مصر هاتبقى اية بعد الثورة ؟ اهو الصورة اللى فى خيالك دى عمرنا ما هنعرف نحقق نصها و الحكومة دى لسة موجودة , و امن الدولة باسلوبة فى حماية النظام وليس الشعب لسة موجود ، والمجالس المحلية بفسادها وتعاملها بطريقة عبد المامور والحزب الوطنى بفلوس اعضائة اللى دفعوا كتير من فلوسهم عشان يعيش الفساد ومستعدين يدفعوا اكتر عشان يرجع الفساد تانى

فاكر الرعشة اللى حسيتها فى جسمك لما مشيت فى اول مظاهرة يوم 25 وقلت أرحــــــــل وفاكر الناس اللى اتخنقت مالغاز ومكانتش قادرة تتنفس طيب فاكر الدم اللى سال والناس اللى ماتوا حد منهم مات قدامك .. طيب شوفت صورهم تفتكر كان حلمهم بس مجرد رئيس يمشى ولا كانوا عاوزين وطن نقدر نتباهى بية قدام الدنيا

وطن جديد, مهندسين مدنى يقدوا ياكدولك ان استحالة بناء وطن جديد واعمدة القديم لسة موجودة .. بتوع التاريخ يقدر ياكدولك ان دى تجربة محكوم عليها بالفشل .. الاطباء اكيد هايقنعوك ان السرطان لازم يتشال كلة