Pages

02 September 2009

والموت بقى ؟



الاسم لية ... مايل اوى عالسطور

والبحر لية ... معلقينة فى الصور

جنب الفاظات

والشمس لية ... بتعبوا فيها وتضحكوا

تحت الظلام

والمعنى لية هربان اوى

جوة تفاصيل البياض

والمسخ لية ....

ظاهر اوى !!!
فيين الخليفة والنخيل والارض واشجار العنب

بطلتوا لية تتعلموا
إن النهور ملهاش شطوط للانتظار




هزى قوامك وإضحكى
زيدى المعانى المزعجة
قومى بدلالك اسسى .. اخر قوانين الانصهار
ضخى الرمادى فــ العروق
ومصى بواقى الاحمرار
علميهم يجمعوا
وينسوا حقيقة الخروج
وإن العدم مش محتاج جيوب
وإن البراح ملموس فــ هستريا الفلوس
مش فــ النفوس
او معنى مقصود بالقمر
فيبان وحيد


وانت الوحيد فى الجهل مسكون بإحساس الطاووس



رتل أناشيدك وقول
يا بنكنوت يا بنكنوت
انتى الامل ... انتى العمل
انتى الحياة
وانتى الهدف ...

هاندوس ونقتل بعضنا
لاجل الالة .. لاجل الفلوس
يا بنكنوت يا بنكنوت


الطفل شارد فى الوجع

كسلان وملقاش الفلوس

والحلم مقتول فى الصبا

مفيش احلام غير بالفلوس

حتى الصباح باهت اوى

اخلق صباحك بالفلوس

قلبى بينبض بالحياة

الحب : اول بدايات السقوط

والموت بقى ؟!!
والموت بقى ....
....






6 comments:

-_- said...

و الموت بقى اخر الدروس

كلام فارغ اوى said...

والموت بقى الحقيقه الوحيده في حياتنا
والموت بقى هوه الخلاص من كل ظلم وقسوة في دنيانا
والموت بقى هوه اللى كلنا مستنيينه وبنخاف منه
والموت بقى
بقى ايه تانى؟

ســـــــهــــــــــر said...

المقدمه كانت صوره رمادية اللون متمكن فيها اوى من الصور الشعريه الحزينه

انتقل لاول القصيده بحديث موجه ( لها) و هى هنا الوطن الام اللى لازم يمارس دوره ف التوجيه
و لوم بسخريه بتشلب دم
و حكمه عن وعى و رؤيه كامله

وجهت الحديث ( له ) بعتاب

انتقل لحوار كامل
اخد و رد
و رمانا على عتبة سؤال ( و الموت بقى ؟)

ده عن الروعه ف العرض و الفكره
اما عن الروعه ف التعبير و حسن البيان
فلو فتحت باب الحديث مش هينتهى

رائع
اسمح لى بالعوده مره اخرى

جابر المصري said...

من الجميل التنوع والتنقل بين الصور
وامكانيات الشاعر في السرد المركز
قصيدة متمكنة فعلا وفيها غزل معاني بشكل جميل
ولا تخلو من الشجن الجميل
اهنيكي بجد علي اسلوبك المميز
لك تقديري
وودي

Unknown said...

sharm

الموت هو الدرس اللى فية خلاصة كل الدروس السابقة يعنى ممكن تبتدى بالخلاصة وبعدى تبقى تشوف الباقى


منورنى


----------------

كلام فارغ اوى

اية بس اللى وداكى لحتة الخلاص من ظلم البشر والراحة الابدية

انتى فاهمة الموت غلط على فكرة

او يمكن فاهمة الحياة غلط فكرى فيها


--------------------

ســــــهـــر

كل دة موجود فى النص بتاعى يا نهار ابيض هو انا معرفش عن صور الشعر سواء حزينة او لذيذة ولا الحوار الكامل او المفتوح

عتبة السؤال الموت بقى يمكن جات كدة لانى بحب النهاية المفتوحة فى الافلام اعتبريها تاثر بالسينما
هو مجرد كلمتين عن اشكال المسخ اللى موجودة اللى بتسلب الروح من الاشياء او الاحاسيس يمكن انا خصصتها فى الاخر فى الفلوس ومش عارف دة ادى للنص قوة ولا ضعف بس انا مكنتش عاوزة كدة

الخلاصة
سعيد جدا بتحليلك

وتسعدنى عودتك مرة اخرى

بس خلاص

-------------

باشمهندس جابر المصرى

يسعدنى مرورك واعجابك بكلامى
خصوصا انى متابع جيد لمدونة حضرتك وتقدر تقول مسحور بمحتواها

احمد رشدى said...

جميلة جدا يا صقر ..

شد حيلك يا ريس مستنيين منك الجديد دايما ..

تحياااااتى ..


احمد رشدى