Pages

30 August 2008

فكر عارى







فكر عارى


خرم ف جدار القمر


بيزيد ظلامك يا ليالى


تحريف لمعناة الكلام


والعرف بدل طلتة


وطل بالوجة القبيح


الوطن


مخنوق يا ريح


وقبل ما نغوص ف الكلام


خد منى اول خبر










قبل الفجر


ما يشنق نفسة


كان اتامل عجزة


ف مات


مات مفزوع مش مشنوق


ف نطت حكمة


ف جوف الشاعر


فزادت صمتة ......... الام وخضوع










فيين المعنى


واقع منى ف بحر غويط


تقصد يعنى سوء تخطيط


اقصد ان الغُلب محيط



تيجى ازاى ؟







تعرف قصة من غير عاشق


او ضحكة ملهاش انسان


او نسمة من غير عنوان




اذكر قصراَ او تفصيلاَ


معنى العاشق


وما كينونة فعل الحب ؟



اِستخرج من كلمة ضحكة


شى بيخص بنى الانسان







وقبل ما يرسم فكرك رد


اكتب زيى ف وسط السطر


قبل الفجر


ما يشنق نفسة كان اتامل


عجزة فمات


مات مفزوع مش مشنوق


10 comments:

مؤمنه said...

السلام عليكم ورحمة الله وبركاته
اول تعليق
يبقى فيه امل ان الفجر يشقشق والشمس تشرق

معنى جميل اوى ايه الاكتئاب الجميل دى
والفجر مات مفزوع مش مشنوق الله

لا بجد المعنى الى فهمته حلو اوى ان الامل جوانا مات من فقدان اسباب استمراره من حوالينا
مش هقول لحضرتك ايحنا الى بنزرع الامل والامل ما يموتش طول ما ايحنا موجودين ولا ياس مع الحياة ولا حياة مع الياس والكلام دى
بس هقول خلى املك فى ربنا كبير

ودومت بخير
وكل عام وانت الى الله اقرب وفى طاعته ادوم
ورمضان كريم عليك وعلينا
والسلام عليكم ورحمة الله وبركاته

Tamer silit said...

صراحة اول مرور على مدونتك

لكن بالتأكيد سوف اعود كثيرا لهذا القلم

كلامك فى الصميم وولا تعليق

OldCatLady said...

مصطفى...

تحياتى

رمضان كريم عليك و كل عام و أنت الى الله أقرب

:)

ســـــــهــــــــــر said...

لما الفكر اتعرى فشافه الفجر
وكان ده مصدق انه القادر
حبه يزيح فى تلال الليل

ولا كانش عرف ان ( العنكبوت عشش ع الحيط و سرح ع الغيط )

طيب عارف

ان الفجر ده لو مش شايف
ممكن
جايز
انه يصدق
لا مش جايز
هو اكيد احساسه العاجز
كان تاثير الشوف و الفهم

ســمـــر احمد said...

خرم ف جدار القمر ..
خلا الضلام يسيل نهر آسن
و البوصلة سابت ايد الملاح
لان الفجر بطل يتوضى بطهر القلب خلاص..
مابقاش فى اتجاه ..
وم الشرق و الغرب خيوط العنكبوت
و الاسوأ
اننا بنمد السلاسل نتكفن صمت
و نفوت
ولا حد يموت
مهو كله ميت اصلا ...
مش عايش الا صفار الوش
حبه غش
و ضحكة شيطان بترن ..

****
بوست = وجهة نظر يسلم القلب و البصر

هبة النيــل said...

جميل

كان ناوي يشنق نفسه ومات مفزوع مش مشنوق

ربما هو استعجل وماصبرش

يمكن لو كان صبر وما نواش الشنق

مكنش مات


كل سنة وانت طيب

انسان وبس ! said...

على فكره جميله الكلمات ..اقصد متناغمه

مع انى واحد مش فا...!

وكل سنه وانت طيب

Unknown said...

الكلام دة .. معناه حاجة مهمة اوي ..
معناه انك فاهم ..!
شاي فو فاهم .. و عارف .. كل اللي احنا عارفينه و تعبنا من الكلام فيه ..
و مفيش حاجة بتتغير ..
لازم نستنى الفجر .. عارف ليه ؟؟
عشان هو فرض ..!
فرض على الناس .. اللي اسمها مرسوم وسط الكلام .. بوشوشهم المرهقة ..
برافو اوي .. اوي .
:)

هبة النيــل said...

واحد فاهم كل حاجة

هو جميل فعلا

بس هكلمك عن رأيي الشخصي

بشعر أن "الشعر" هو

1-ما يشعر به الشاعر

2-وما يسهل على القاريء من الشعور به

يعني يكون فيه صور وتشابيه نعم

لكن تكون سهلة so easy to get it

بس يا فندم

والله نفسي أقولك القصة دي من زمان لكن كنت مترددة

Unknown said...

مؤمنة

مفيش شمس من غير فجر

وكون الفجر شنق نفسة فدة معناة ان الشمس فقدت سبب خروجها

املنا فى ربنا دايما

ويارب تبقى كل الاشعار عن فجر بينادى الشمس وهو فرحان

منورانى دايما بتعليقك


------------------------

تامر صليت (silit(


انا سعيد جدابالزيارة دى
خصوصا انى بتابعك دايما
ويشرفنى مرورك الدائم


تحياتى


--------------------

صيدلانية مطحونة

كل سنة ورمضان كريم

ويارب من سنة لسنة نكون لربنا اقرب

------------------------

الشاعرة اللى حروفها هادية

طبعا كالعاد حاولت انسج ردى من كلمات
شعرية بس فشلت

انى مسكتينى فى اغنية على الحجار

واضفتى اكتر للنص

منتظر تعليقك دايما


-------------------------

سمر احمد

النص التانى لسهر تقريبا بحس ان بينكم نوع من التناغم فى الكلمات

والصفة الغالبة على اشعاركم هى الهدوء

شكرا لمرورك العزيز


----------------------

هبة النيل

مش يمكن الفجر صبر كتير وكان قرارة بالشنق نوع من الموت السريع لكن جالة الموت البطيى وهو الفزع


كل سنة وانتى بخير وسلامة رمضان كريم


---------------------


انسان بلا عنوان

كل سنة وانت بخير وصحة

وانا كدة اخدت حقى وكاش كونها عجبتك فحقى وصلنى

تحياتى

-------------------

شيماء على

عجبنى اوى وصفك للفجر بانو فرض

بس الفرض دى اكيد لية شروطة

اللى بننساها واحد ورا التانى

شكرا على رايك ووصفك

ودايما منورانى بتعليقك

----------------------

هبة النيل

اقولك الصراحة يا دكتورة

انا قعدت افكر كتير هو التعليق دة كان رد على حاجة انا قولتها قبل كدة ولا لا

بس بعيد عن النقطة دى انا متفق معاكى جدا
بس فى حاجة اجمل

ان مش لازم الشاعر يفرض على القارى احساس واحد

ممكن يفتحلة زى باب كبير وراة احاسيس كتير خارجة من النص

والصور اللى فى النص
والقارى يختار منها الصورة اللى تعجبة

ممكن يكون الكلام الاحساس بتاع الشاعر وهو بيكتبة كان يائس

بس فى قارى وصلة الاحساس على انة امل

دة رايى عارفة شوفتة واستنتجتة منين

من اشعار عبد الرحيم منصور

ومجدى نجيب اللى محمد منير ياما غنى كلماتهم

تحياتى على رايك
وسعيد بنقد دايما