Pages

24 January 2008

بتعرفنى



بتعرفنى

بتعرف خوفى من صمتى

بتعرف شوقى من همسى

بتعرف حزنى على امسى

صدقنى

يا صاحبى

.
.
.
.
متعرفنيش


متعرفش عنى

غير اسمى


عارفنى صورة


بتضحك وقت ضحكك


تبكى وقت حزنك

ترقص لما تنجح


على الارجح

متعرفنيش

تعبيرنا

واحد مشترك

احساسنا

هو اللى اختلف




ارسمها وردة ملونة

ترسمها

شجرة من غير ورق

ارسمها شط ومركبة

ترسملى

لحظات الغرق


اية هو معنى حبنا

لبعضنا

واحساسنا

دايما يختلف

شادد رحالك للظلام


شادد رحالى للسما


دايما بيجمعنا الكلام

والفعل عمرة مانفعل


كيف العجوز

اللى بيحلم


برجوع العقارب والزمن

لاجل مايرقص

مع بنت حلوة

فى حي هم (حيهم)


رقصة تهد جبال

ناسى اصابتة

بالعما

ناسى طريقى

للسما

عارف طريقك

للظلام

دايما بيجمعنا الكلام

والفعل

يا صاحبى

عمرة مانفعل



25 comments:

NilE_QueeN said...

تعرف انى بقرء كتاباتك اكتر من مره لحد ما استوعبها
فلسفتك عميقه
فالوضع دا اللى مش فاهمه حاجه

مؤمنه said...

السلام عليكم ورحمة الله وبركاته
ياااه دى لما حضرتك توصل للتعبير دى
يبقى اكيد الالم جامد اوى
اصعب حاجه انك تلاقى اقرب الناس ليك مش فاهمينك
بس الاصعب حقيقى
انك تقدر تمثل الدور على اقرب الناس ليك عشان ما يفهمش ال جواك
خاطره جميله ودايما حضرتك بتفاجأنا بكتابات هايله
والسلام عليكم ورحمة الله وبركاته

Najwan said...

بتعرفنى

بتعرف خوفى من صمتى

بتعرف شوقى من همسى

بتعرف حزنى على امسى

صدقنى

يا صاحبى

متعرفنيش
جامده اوى اوى البدايه بجد حلوة

ghalia said...

تعبيرنا
واحد مشترك
احساسنا
هو اللى اختلف
ارسمها وردة ملونة
ترسمها
شجرة من غير ورق
ارسمها شط ومركبة
ترسملى
لحظات الغرق
اية هو معنى حبنا
لبعضنا
واحساسنا
دايما يختلف

ايه الجمال ده
المقطع ده رائع وكلمة رائع قليلة عليه
إبداااااااااع بجد
تحياتى العميقة ليك :)

لـــى لــــىِ said...

متشكرين اوي على الزيارة الحلوه
والتعليق الجميل

ياعم انت طلعت جامد اوي
بصراحة تعبيراتك روعة
والاحساس بين السطور أروع

تسلم ايدك
لك مستقبل، فى موضوع عمو حسين
يارب تكون القصة عاجباك وتكملها

سلاماتى

لى لىِ

OldCatLady said...

لا ده كده مش عارفك ولا عمره هيعرف
....الفعل يا صحبى عمره مانفعل...جملة جامدة جدا....وحش أوى احساس انك متتعرفش
و ما تتفهمش...عارف انت عبد الحليم لما قال عرفته قد ما عرفته ولا عرفتوش....

....من الصعب يوم تبقا ف مكانه و من الصعب يوم يبقا ف مكانك...عشان ده ميستهلش انك حتى تعرفه انت ايه أو مين
تصدق بقا
عندك حق ف كل كلمة كتبتها ف البوست ده

Desert cat said...

بصراحة تعبيراتك قوية جدا واحساسك عالى
تحياتى

Bossy said...

السلام عليكم ورحمه الله وبركاته

ايه الابداع دا

بعد اللي قراته اعتقد ان اي تعليق مش هيوصف قد ايه كلامك جميل


والصوره عبقريه بجد
ربنا يوفقك دايما

Anonymous said...

السلام عليكم ورحمة الله وبركاتة

يااااااه جامد أوي الكلام دا
كلامك في عمق في المشاعر شديد جدا

اية هو معنى حبنا
لبعضنا
واحساسنا
دايما يختلف

دي جميلة جدا

انا اول مرة ادخل ومش هتبقى أخر مرة ان شاء الله

يا مراكبي said...

أولا .. حلو بجد الجرس الموسيقي اللي في الكلمات .. عندي مشكلة كبيرة في الكتابة بالعامية لما يكون شعر .. علشان كده بأعجب بالحاجات اللي زي كده قوي

ثانيا .. أنا معاك تماما إن صاحبك .. مايعرفكش .. مهما حاول أو إفتكر إنه بجد يعرفك

Doaa Ebrahim Aaql said...

احترت فى امر الكلمات
أى المقاطع انقلها هنا
لأخبرك انها لمستنى بعمق
فاكتشفت اننى ساضطر لنقل
البوست كاملاً
فما فعلت
.
.

كلمات أكثر من رائعة فعلا


.
.

مودتى الصافية لك

عاشقة الوطن said...

السلام عليكم

ايه اخبارك

تعرفنى
فعلا فيه كتير فاكرين انهم يعرفونا بس ميعرفوناش ولا حاجة
طلع اننا بننخدع بالناس وبمعرفتهم لينا ومعرفتنا ليهم

تحياتى

Unknown said...

nile queen

وصفك لها بالفلسفة تقيل عليها شوية

قوليها راى قوليها تعبير

فلسفة كبيرة عليا

واخوكى يا عينى غلبان

ملحق فلسفة اولى ثانوى

---------------------------------
الجميلة مؤمنة

البعد الشخصى اللى حضرتك (اشمعنا انا)
فسرتيها بية دة طبيعى لاى حد
مش بخصة بنفسى او بتهم بية حد من اللى حواليا

نيجى بقى للصعوبة فى تمثيل الدور
عاوز اقولك ان الدور مش محتاج تمثيل
اللى عاوز يفهمك هايفهم حتى لو انتى بتحاولى تدارى
واللى مش عاوز يقرب منك عمرة اكيد ما هايفهمك

بشكرك جدا على رايك فى الكلمات
ويارب تعجبك دايما


مالحق

مينفعش اكتب بوست
ومتجيش تعليقى
رجاء
---------------------------
najwan

اهلا بيكى


المرة اللى فاتت الصور عجبتك

المرة دى البداية عجبتك

انا متفائل جدا
ان البوست كلة يحوز على اعجابك المرة الجاية

ويارب تنورينا كل بوست

انا حاسس ان البوست دة
قرب مالمعنى اللى انتى كنتى قصداة فى بوستك الاخير

لو فعلا دة

قوليلى

---------------------------------
ghalia


يارب تكون زيارتك الاولى اديتك انطباع جيد عن المدونة

شكرا جدا على رايك

تحياتى
الاعمق من عمق تحياتك

Unknown said...

لى لى

عم حسين دة راجل معدى محدش قدة

قصتك عجبتنى اوى

والحمد الله ان كلامى عجبك

اكيد هاعدى اكملها

بس متغيبيش انتى علينا

تحياتى


-----------------------------

صيدلانية مطحونة

اممممممم انا اتفهمت غلط يا اسيادنا

بصى هو الكلام كلة لوم

فا دة هو اللى ادى انطباع ان فى صاحب مخنوق من صاحبة

مع انى كنت قاصد اللوم بمعنى النصيحة

حتى الطرف اللى المفروض بيقول النصيحة

كان فى نفس الوقت بيلوم نفسة


لما قولت



ناسى طريقى

للسما

عارف طريقك

للظلام

دايما بيجمعنا الكلام

والفعل

يا صاحبى

عمرة مانفعل


صاحب بيحلم من غير مايفكر يحقق حلمة ازاى

وصاحب مبيعرفش يحلم فالنتيجة انة عمرة ما هايشوف السما اللى هيا رمز للنجاح


مستنى تعليقك تانى على كلامى

ويارب تكون مواصيعى القديمة كلها عاجباكى

ومواصيع الجديدة كمان

تحياتى

-----------------------------

desert cat

شكرا جدا على رايك
ويارب تفضل على طول كدة فى نفس القوة
ويفضل رايك فى نفس الاتجاة

تحياتى

Unknown said...

الجميلة بوسى

بجد بقى بعيد عن البوست واى حاجة


انا مفتقدك جدا

وعلى استعداد انى اربط ابتعادى عن التدوين برجوعك للتدوين


يعنى مالاخر يا ترجعى او توضحى اسباب للبعدك

او ابطل انا كمان تدوين


على فكرة انا قعدت كتير اصيغ فى كلام تعليقى

بس فى الاخر كتبتة زى منا عاوز اقولة

من غير تزويق

OldCatLady said...

خيييير....كل خييير :)
فى الحقيقة انا بفهم بحسب حالتى النفسية و الامتحانية..
شكرااااااا على التوضيح اللى خلى البوست معبر بشكل مخيف
نردهالك فى الافراح:)

Unknown said...

iam legend

شكرا جدا على رايك وعلى مرورك

ويارب دايما الكلام يعجبك

Unknown said...

يا مراكبى

انا سعيد جدا بزيارتك
وخصوصا ان انا من متابعين مدونتك
بس بحب اتابع فى صمت


ويارب تنورنى دايما

تياتى


-------------------------------
princess dodo

احترت انا فى امر تعبيراتك
وصورك وتشبيهاتك وخيالك
اللى دايما بيجبرنى
انى لما اعدى من عندك
اعدى فى صمت
عشان لو حد بيقرى جنبى
مشتتش خيالة

سعيد جدا ان الراى دة يجى من حد بيجيد
التعبير عن المشاعر

---------------------------------

عاشقة الوطن

اهم حاجة اعرفى اللى عاوز يعرفك
وعرفية بنفسك

واللى مش عاوز بيقولوا لتر البنزين رخص

وعلبة كبيريت

الحكاية سهلة

منورانى بعد انقطاع

-----------------------------

صيدلانية مطحونة


الحمد لله

حمدلا على سلامة الوصول

ا بـن عــمــر said...

اول مرة أدخل على مدونتك
أبيات جميلة نابعة من احساس صادق
جزاك الله خيرا

بحاول اكون said...

سيدي يا سيدي على الابداع
بجد كلامك روعه واحساسك عالي اوي
تعبيرنا
واحد مشترك
احساسنا
هو اللى اختلف
ارسمها وردة ملونة
ترسمها
شجرة من غير ورق
ارسمها شط ومركبة
ترسملى
لحظات الغرق
المقطع ده عجبني اوي
يسلملنا ابداع يا باشا
ربنا يوفقك واسفة على تأخيري
موني

Unknown said...

حلوه اوي بجد

بس اتمني انها تكون خيال ومش تكون عن تجربه شخصية

Ana keda said...

عارف مش هقولك حلوة برضه

لانى زعلانة بس الاهم وصلتلى بجد

اصحابك اصحابك

ياما بييبقوا فاكيرنك حاجة وانت جواك حاجة تانية

ومتحسش انك مفهوم بس اكيد هتلاقى حد يفهمك دور حوالك صح

حدوته مصرية said...

انت يا عم
مش تنشر كلامك الجامد ده بقى ؟

بجد انت من الناس اللى بيعجبنى كتابتهم

تحياتى

Unknown said...

ابن عمر

بشكرك جدا على رايك

واتمنى تفضل كلماتى عاجباك دايما



--------------------------------
مونى

منورة
ايوة كدة
الواحد كان مفتقد تعليقاتك




-------------------------------

اسراء

لا الحمد لله خيال مطبوع فى نفسية كل واحد

ماتحاوليش تنكرى


----------------------------

انا كدة

اسف يا فندم

ماهى هى دى الفكرة
انك لو ملاقيتش هنا
روح دور هناك
اصلك يبقى عبيط اللى يدور فى وسط حاجات كلها لونها ابيض
على حاجة لونها اسود


--------------------------

محمد باشا ياسر

على فكرة بقى
رايك دة ادانى انتعاش
خلانى مانتخ عالكرسى

بجد اعتز بية
ودة رايى فى كتاباتك
مش مجاملة عشان رايك والله
بس هو كدة فعلا

Hannoda said...

غريبة قوي

فيها معاني كتير متزاحمة خلتني عاوزة أقراها مرة بعد مرة

لمست حاجات جواي ولا عارفة هي ايه
يمكن عشان جواي ملخبط
ولا عشان هي زي السهل الممتنع

مش عارفة؟؟
بس جمية قوي