Pages

19 January 2007

حلم مسجون

حلمت وحلمى مسجون

وانا واقف على الباب سجان
وباب السجن مقفول

ومفتاحة فى بحر من النسيان

يا حلم راقد فى السجون ابكى

وللذكرى ارسم دمعتى واكتب

عن قلب طاير فى السما فرحان

دلوقتى عندة من الشجن بركان

واكتب تاريخ وفاتى

وبلاش تشطب عمرى اللى أتى

حاول ترسملى فرحة

حاول تشطبلى دمعة

حاول تبنى طريق

حاول ترسملى ضحكة

وارسملى مركب لبحرى

قبل ما اموت غريق

أصحى يا امل اصحى وفوق

بعد المغيب جاى الشروق

بعد الطوفان بيبان شطوط

بكرة الجراح تدبل تموت

رغم الكبوت

رغم صوت الظلم وقت السكوت

وانت يا طير يا عارف شكوتى

احكى حكايتى لكل قاضى
فى دنيتى
يمكن يحكم حكم عادل
فى قضيتى
ويخرج حلمى تانى ينور سكتى

يا اللى سجنتوا الحلم

الحلم ساكن فى الغيطان بذرة

الحلم صاحى فى الكتب فكرة

الحلم طالل فى اللوح رسمة

الحلم عايش جوة قلبى رغم جدران السجون

4 comments:

حائر في دنيا الله said...

بنحلم
ومش هنبطل نحلم
ولا أعرف هل سنبدأ نخرج من الواقع تدريجيا حتى تسجننا أحلامنا
أحب أن أحلم ولكن أخاف أن أظل أسير حلم لا أعرف تحقيقه
لا أدعو أحد لعدم الحلم فالإنسان كائن حالم ولكن لا أح أن يأخذنا ترف الحرف وننسى مرارة الواقع

مع تحياتي

Unknown said...

الحلم هو سر الحياة ومش معنى ان حلمك قابلة صعاب كتير انك لازم تخترع حلم جديد تعوض بية الحلم القديم لا انت المفروض تحاول

karakib said...

حلوه
المدونه كلها حلوه لأنها مليئه بالجاهينيات و حتي أشعارك مشبعه بروحه

Unknown said...

الحمد للة انها عجبتك يا كراكيب باشا
ومستنيك كل مرة
وصلاح جاهين شرف ليا انى ابقى ماشى على طريقة