صبر ايوب

أيوب رماه البين بكل العـــــــــلل
سبع سنين مرضان وعنده شلل
الصــــبر طيب .. صبر أيوب شفاه
بس الأكـــــــــاده مات بفعل الملل

وعجبى

عذرية احساس :1

نهار \ خارجى

الشمس تبدو ضاحكة او ساخرة حسب موقعك فى قاعة السينما ربما تشاهدها حزينة من المقاعد الخلفية , البطل يقف على سور احد البنايات شاهقة الارتفاع فى وضع استعداد للسقوط او قل للقفز

الراوى ( voice over)

عذرية الاحساس .. الجوع الساكن امعائك فى تحدى اجبارى للنظام الغذائى

ونبض القلب اللى بيعلن بدء مواسم العشق والتنهيدة فى اخر سكة حلم طويلة

والاحزان والدمع خالى الرتوش حتى الخوف الساكن فى العتمة

اغبيا كل الادباء اللى ضيعوا وقتنا فى قراءة تعريفاتهم المستفيضة للاحاسيس

انت الانسان .. على الصفحة البيضاء بتتعرى قدامك كل الاحساسيس

بدافع الغواية او شبهة اغتصاب

ارجوك : بعد ما تعبر طوفان الدهشة اتامل لون الصفحة

وفى مكان ما من عقلك خليك عارف ان معركتك القادمة هاتكون مع الملل

بعد اختفاء اللون الابيض من الصفحة

والنهاية هاتكون هنا مع ... الغواية الاخيرة

البطل يفتح ذراعة كمن يعناق الهواء ثم يقفز

(موسيقى صاخبة )

يتبع

مواصلة

واصل حديثك للنجم الساطع هناك , فلن تخرج من ظلمة الليالى الا بخلاصة حكمة , لشاهد وقف يراقب الارض منذ ملايين السنين

سيناريو افتراضى

وإبتدى العرض الدرامى 

واقفة بتبكى ... فى الركن البعيد

فى السيناريو 

مكتوب عدد دمعتين 

وأهة واحدة مكبوتة من سنين

صوت الحكيم : البكا عهر وغواية 

اخر مزاد للمشنوقين 

بالخوف وهستريا الحنين 

قلبى فى هواكى كان وطن 

بيحدة  بحر الاسئلة 

جغرافيا فيها الامكنة 

مرسومة بشموس الصباح 

فِكرك براح الاجوبة

هايزيد هيام المعشقة

متصدقيش

فلاش باك ... لعبة منطق

فِكرك لما هاتوة فى عيونك 

هالقى بعد التوهة 

خط نهاية 

بيكشف اصل الفرح الواضح 

جوة عيونى 

لما بشوفك ابيض واسود جوة الكادر

شايلة فى قلبك 

حس سذاجة سينما قديمة 

فى عمق الكادر 

واقف هو ... راسم ضحكة 

شر هايجى 

ليل \ خارجى 

ظلام اول ... ظلام ثانى 

ظلام خامس عشر

خدعتنا الاحلام 

او جايز مخدوعة معانا 

ومنين هاتجود .. الارض البوٌر 

بغيطان الورد

شوًفان العلم 

إزاى تشوف الكون وسيع 

من خرم إبرة ملوش حدود 

فى الجهل .. طفل مفطوم عالخيال 

راسم طريقة للقمر 

ومعرفش يعنى إية جناح

او إية هايبقى .. او اية اللى راح 

( فى الاطار الدرامى)

ملوش فى صنع الحدث 

مشهد ختامى 

فارغ  جدا  مالاحداث

عبد الرحمن الابنودى : الله يجازيك ياعم عبد الناصر

لله يجازيك يا عم عبدالناصر
الليل مليّل
والألم عاصر
لسه اللي بيبيع أمته كسبان
وكل يوم
أطلع أنا الخاسر


أما انت خميت مصر دي خمة
يوم ما ناديت بالعشق للأمة
ورطتنا نعشق خريطة عبيطة
وبشر ما نعرفهاش
وبلاد.. ما بنـزورهاش
إلا.. فواعلية وبنايين وسواقين
وخدامين.. وطباخين.. وكناسين
بلاد أسافرها سعيد
ارجع حزين
حبيتها زي ما قلت لي.. واكتر
ع الأجنبي ما استكترتش عليا تستكتر
ع الأجنبي ما اتنقورتْش عليا تتنقور.
تطمع في دمعي
وف تعاسة راتبـي.
مُلهم أنا.. واعمل غبـي
وادي الألم يا عم عبدالناصر
زاحف وبيحاصر
وآدي الجميع خاسر
وآدي فجر أمتنا الجميل مغلوب
وآدي انتحار الأمة بالمقلوب
وأنا... غريب الدار..
لابسنـي توب العار
ساكن في وطني بالإيجار


قاعد أنا ع الجسر في القيَّالة
من قلب اللهيب مِنشالة
وقلبي.. ساقية حزن سَيالة
باغنـِّي..
ما اعرف مغنى والاّ عديد
زي افتكار الميتين.. في العيد.
باعاني وحداني
شياطيني لابساني
والأمة قدامي.. مفارقاني
يا رب...
ما تحببني في الناس الملاح تاني
يا رب
ما ترجعني أعشق
ضحكة اخواني
يا رب
كرهني في أوطاني


ما أخيبك أمَّة
ما أتعسك أمة
لا عقل... ولا همة...
لا مصدقه فعلك
ولا تحفظي كلمة.
أمة.. تدور وتلف..
تقيلة.. مش حتخف
حماسية... وحماسها
بكتيرُه ساعة.. يجف.
أمة بتتخابِط
أمة بتتعابط
أمة ومالهاش
لا زابط ولا رابط
ولا كبير عيلة
ولا قرابةْ دم
وفكرة وهمية
ما تورث إلاّ الهمّ...
ما تحل عني يا عم..
إحنا ورثنا كلام
إحنا تاريخنا كلام
علشان كده لما تقول..
علي طول أقول:
وبكام؟؟
ما هو حب؟؟ دبرني
وتاريخ؟.. فكرني
وطريق؟.. نورني
ومصير؟.. بصرني
ده انا بقيت عربي
من قبل ما القي
اللي يمصرني.
أنا انتمائي لأمتي...
ممسخرني.
محسوبة في الأحزان عليّ
في الفرح تنكرني
ياللي انتي لا أمة
ولا انتي أم..
فيه أم
ما تعرفش ساعة الألم..
تضم؟..


قد ما ننورها
هيه مضلمة
قد ما نعلمها..
مش متعلمة.
كل ليلة بايتة مظلومة
وهيه الظالمة!!
آخرة السكك الوعار
مجد.. متلطخ.. بعار.
قد ما نحجمها...
تفلت م الإطار!!
السلاح من صنع بره
والكلام من صنع بره
المآكل
الملابس
والهوا البارد في بيتي..
صنع بره.
لا نسجْت الهدمة..
لا زرعْت.. ولا اكتفيت
شفتها.. جريت اشتريت.
جلاّبيتي.. عمامتي.. سجادتي
وحواديت الصغار
والحلاوة: حلوة.. مرة
شغل بره.
إيه يهم
إن مت من أجل البشر
ولا سبت الديب يصرَّخ
واتغابيت؟...
أو نسيتها؟ أو اتناسيت؟؟..
الشهادة مجانية...
والبطولات...
نفحات استعراضية
والليل مليّل
والألم... عاصر
لسه اللي بيبيع أمته
كسبان..
وكل يوم..
أطلع أنا الخاسر...
الله يجازيك
يا عم عبدالناصر

 

 

عبد الرحمن الابنودى