Pages

30 December 2006

انا والخروف


خروف انتا وانا انسان
مدبوح انتا وانا مدبوح
لو ها تماما وانا لو انوح
برضوا الدبح فينا مسموح
انتا بلحمك تسعد ناس
لكن لحمى رخيص ينداس
قلبى وقلبك هما قلوب
قلبك انتا فى الزيت بيدوب
لكن قلبى للاحزان مخطوب
مخك جوة الصلصة عجايب
بس انا عندى فى المخ مصايب
ممكن اخد صورة معاك
تبقى ذكرى للمرحوم
بكرة هاتبقى انتا هناك
وانا راح اقضى العيد مهموم
الهم فى بلدى فى منة الوف
سبعين مليون بين نعجة وخروف
صوت الظلم اصبح مالوف
مهما نماما مهما نكاكى
برضوا هايفضل صوتنا واطى

لون الفرح اصبح مكبوت
دمع عيونا عالخد يفوت
ولا ودن بتسمع ولا عين بتشوف
مش قولتلكم نعجة وخروف
لما الطفل يكون لة اهات
بعد ميلادة يموت بساعات
مستشفى حكومى مفيهاش خدمات
ولا ودن بتسمع ولا عين بتشوف
مش قولتلكم نعجة وخروف
لما الراى يكون لة نقيض
وصاحب الحق يبقى اسمة عبيط
وانتخابات ظالمة وتزوير
والحق غفير والظلم وزير
ولا ودن بتسمع ولا عين بتشوف
مش قولتلكم نعجة وخروف
بس خلاص مش راح اكمل
اصل قالولى الليلة دى عيد
وقال اية بيقولوا
عيد سعيد

2 comments:

OldCatLady said...

تماام....أنا أول كومنت :)

و أرجع أقولك برضو و تقولى مش فاهم حاجة....!!!!!!
مخك جوه الصلصة عجايب
بس انا عندى فى المخ مصايب....عجبتنى جدا جدا جدا
هنفضل طول عمرنا نقول عيد سعيد عشان احنا نفسنا يبقا فعلا عيد سعيد... حتى لو عمره ما هيكون سعيد...خليها على الله حتى لو من غير امل كله هيهون طول مانتا معاه...
تحيااتى

فارس بلا جواد said...

الضاهر كدا كلنا خرفان
وكلنا مش فهمين اى حاجة
او بنطنش على كل حاجة
وحطين دمغتنا فى ثلاجة
ودرجة حرارتها مولعة
وحنا كلانا ولا حاجة
حرام علينا سبناها
للديابة
ترتع وتعربد ومستاقة
لدمانة
وحنا فيها ولا حاجة